ଦାରିଙ୍ଗବାଡି, ୧୬।୯ (ଅରୁଣ ସାହୁ): ସରକାର କଚ୍ଚା ଘରକୁ ପକ୍କା ଘରେ ପରିଣତ କରିବା ଲାଗି ଆବାସ ଯୋଜନା ଆଣିଛନ୍ତି। ହେଲେ ଏହି ଯୋଜନାର ଲାଭ ମିଳିଥିଲେ ମଧ୍ୟ ବହୁ ହିତାଧିକାରୀ ପ୍ରଧାନମନ୍ତ୍ରୀ ଆବାସ ଯୋଜନା ଓ ଅନ୍ତୋଦୟ ଯୋଜନାରେ ଗୃହ ନିର୍ମାଣ ପାଇଁ ଆର୍ଥିକ ସହାୟତା ଏବଂ କାର୍ଯ୍ୟାଦେଶ ପାଇଥିଲେ ମଧ୍ୟ ଗୃହ କାର୍ଯ୍ୟ ଆରମ୍ଭ ନ କରିବା ଓ କିଛି ହିତାଧିକାରୀ ଅଧପନ୍ତରିଆ ଭାବେ ଛାଡିଦେଇଥିବା ଏବେ ମହାଙ୍ଗା ପଡିଛି। ଶେଷରେ ବ୍ଲକ ପ୍ରଶାସନ ପକ୍ଷରୁ ଲାଲ ରଙ୍ଗର ନୋଟିସ ହିତାଧିକାରୀଙ୍କୁ ଦିଆଯାଇଛି। ଏଭଳି ଘଟଣା ଦେଖିବାକୁ ମିଳିଛି କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ହାତୀମୁଣ୍ଡା ଓ ତାଜୁଙ୍ଗିଆ ପଞ୍ଚାୟତ ଅଞ୍ଚଳରେ। ବିଡ଼ିଓ ପ୍ରୀତିରଞ୍ଜନ ରଥ, ସହକାରୀ ନିର୍ବାହୀ ଯନ୍ତ୍ରୀ ସଞ୍ଜୟ ରଥ, ବ୍ଲକ କାର୍ଯ୍ୟକ୍ରମ ସଂଯୋଜକ ଜଗନ୍ନାଥ ରଥ ଏବଂ କନିଷ୍ଠ ଯନ୍ତ୍ରୀ ସୁଶାନ୍ତ ପ୍ରଧାନ ଏହି ୨ଟି ପଞ୍ଚାୟତ ର ହିତାଧିକାରୀଙ୍କୁ ଶୀଘ୍ର ଗୃହ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ କରିବାକୁ ନିର୍ଦ୍ଦେଶ ଦେଇଛନ୍ତି। ଏଥିସହ ସମୟସୀମା ମଧ୍ୟରେ ଯେଉଁ ହିତାଧିକାରୀଥମାନେ ଗୃହ କାର୍ଯ୍ୟ ସାରିପାରିବେନି ସେମାନଙ୍କ ଉପରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ କୁହାଯାଇଛି। ଏହାକୁ ନେଇ ହିତାଧିକାରୀମାନେ ନୋଟିସ ଗ୍ରହଣ କରିବା ପରେ ଛାନିଆ ହୋଇଯାଇଛନ୍ତି। ସମସ୍ତେ ଶୀଘ୍ର ଗୃହ କାର୍ଯ୍ୟ ସାରିବୁ ବୋଲି ପ୍ରତିଶୃତି ଦେଇଥିବା ଜଣାପଡିଛି । ପ୍ରଥମ ଦିନରେ ୫୦ଖଣ୍ଡ ନୋଟିସ ଦିଆଯାଇଛି ଏଭଳି ଗୃହ କାର୍ଯ୍ୟ ସମ୍ପୂର୍ଣ୍ଣ କରି ନ ଥିବା ସମସ୍ତ ୨୫ ଟି ପଞ୍ଚାୟତରେ ରହିଥିବା ହିତାଧିକାରୀଙ୍କୁ ନୋଟିସ ଦିଆଯିବ। ଯେଉଁମାନେ ନୋଟିସ ପାଇବାର ୧୫ ଦିନ ମଧ୍ୟରେ ଗୃହ କାର୍ଯ୍ୟ ସାରିବେ ନାହିଁ ତେବେ ତାଙ୍କ ବିରୋଧ ରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସହକାରୀ ନିର୍ବାହୀ ଯନ୍ତ୍ରୀ ସଞ୍ଜୟ ରଥ କହିଛନ୍ତି।
