ମୁମ୍ବାଇ: ସରକାରଙ୍କ ବିତ୍ତୀୟ ନିୟଣ୍ଟ (ସରକାରଙ୍କ ଆୟ-ବ୍ୟୟ ମଧ୍ୟରେ ପାର୍ଥକ୍ୟ)କୁ କମ୍ କରିବା ଲାଗି ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ(ଆର୍ବିଆଇ) ନୋଟ୍ ପ୍ରିଣ୍ଟ ନ କରୁ। ଏହା ବିତ୍ତୀୟ ଅପବ୍ୟୟ ହେବ ବୋଲି ବିଶିଷ୍ଟ ଅର୍ଥନୀତିଜ୍ଞ ପିନାକୀ ଚକ୍ରବର୍ତ୍ତୀ ରବିବାର ମତପ୍ରକାଶ କରିଛନ୍ତି। ପିଟିଆଇକୁ ସାକ୍ଷାତ୍କାରରେ ସେ କହିଛନ୍ତି, ଭାରତୀୟ ଅର୍ଥ ବ୍ୟବସ୍ଥା ଯଦି ତୃତୀୟ ଲହରର ସାମ୍ନା ନ କରେ ତେବେ ଜିଡିପି ଅଭିବୃଦ୍ଧି ଉନ୍ନତ ହେବ। ନ୍ୟାଶନାଲ ଇନ୍ଷ୍ଟିଚ୍ୟୁଟ ଅଫ୍ ପବ୍ଲିକ ଫାଇନାନ୍ସ ଆଣ୍ଡ ପଲିସି(ଏନ୍ଆଇପିଏଫ୍ପି)ର ନିର୍ଦ୍ଦେଶକ ଭାବେ ଚକ୍ରବର୍ତ୍ତୀ ବର୍ତ୍ତମାନ କାର୍ଯ୍ୟ କରୁଛନ୍ତି। ସେ କହିଛନ୍ତି, ଉଚ୍ଚ ମୁଦ୍ରାସ୍ଫୀତି ଚିନ୍ତାଜନକ। ଦରଦାମରେ ସ୍ଥିରତା ଆଣିବା ସହ ଏହାକୁ ଏକ ନିୟନ୍ତ୍ରଣ କରିବା ଭଳି ସ୍ଥିତିକୁ ଆଣିବା ଆବଶ୍ୟକ।
ମହାମାରୀ ଆସିବାରୁ କେନ୍ଦ୍ରୀୟ ବ୍ୟାଙ୍କ ନୋଟ ଛାପିବା ଆବଶ୍ୟକ ବୋଲି ଚର୍ଚ୍ଚା ଆରମ୍ଭ ହୋଇଥିଲା। ଆର୍ବିଆଇ ଏଭଳି କରି ନ ପାରେ ବୋଲି ସେ ମତ ଦେଇଛନ୍ତି। ରିଜର୍ଭ ବ୍ୟାଙ୍କ ଏବଂ ସରକାରଙ୍କ ମଧ୍ୟରେ ସହମତି ଭିତ୍ତିରେ ଏଭଳି ଧାରାକୁ ୧୯୯୬ରେ ବନ୍ଦ କରାଯାଇଛି। ଏଭଳି ବ୍ୟବସ୍ଥାକୁ ପୁଣି ଫେରାଇ ଆଣିବାର କୌଣସି ଆବଶ୍ୟକତା ନାହିଁ। କୋଭିଡ୍ ପ୍ରଥମ ଲହର ତୁଳନାରେ ଦ୍ୱିତୀୟ ଲହରରେ ବଜାର ବେଶି ପ୍ରଭାବିତ ହୋଇନାହିଁ। ନୂଆ କରି ଯଦି କୌଣସି ବଡ ଲହର ନ ଆସେ ତେବେ ଆର୍ଥତ୍କ ସୁଧାର ତ୍ୱରାନ୍ବିତ ହେବ ବୋଲି ସେ ଆଶା ପ୍ରକଟ କରିଛନ୍ତି।
ମହାମାରୀରେ ଜିଡିପି ହ୍ରାସ ହୋଇଥିବାରୁ ଏହାଦ୍ୱାରା ନିଯୁକ୍ତି ପ୍ରଭାବିତ ହୋଇଛି। ରୋଜଗାର ବଢାଇବା ଲାଗି ଦୃଢ ଆର୍ଥତ୍କ ପୁନରୁଦ୍ଧାରର ଆବଶ୍ୟକତା ରହିଛି। ଆର୍ଥତ୍କ ପ୍ରୋତ୍ସାହନ ଦ୍ୱାରା ସରକାର ଅର୍ଥ ବ୍ୟବସ୍ଥାରେ ଉନ୍ନତି ଆଣିବା ଲାଗି ପ୍ରୟାସ କରୁଥିବା ସେ କହିଛନ୍ତି। ସରକାର ବଜେଟରେ ଦେଇଥିବା ପ୍ରୋତ୍ସାହନ ଯୋଗୁ ବିତ୍ତୀୟ ନିୟଣ୍ଟ ଜିଡିପିର ୯.୫%କୁ ବଢିଛି। ସେହିଭଳି ରାଜ୍ୟଗୁଡିକର ବିତ୍ତୀୟ ନିୟଣ୍ଟ କଥା ବିଚାରକୁ ନେଲେ ଏହା ୪.୫% ରହିଛି। ମୋଟାମୋଟି ଭାବେ ବିତ୍ତୀୟ ନିଅଣ୍ଟ ଜିଡିପିର ୧୪ରୁ ୧୫% ରହିଛି। ଏଭଳି ସ୍ଥିତିରେ ଆହୁରି ଖର୍ଚ୍ଚ ବଢାଇବା ବେଳେ ଅନେକ କଥା ବିଚାରକୁ ନେବାକୁ ହେବ ବୋଲି ସେ ମତ ରଖିଛନ୍ତି।
