ବ୍ରହ୍ମପୁର/ଦିଗପହଣ୍ଡି, ୮।୫(ସୁବାସ ଚନ୍ଦ୍ର ପାଢ଼ୀ/ଅଶେଷ ନାଥ ମିଶ୍ର): ନବରଙ୍ଗପୁର ଜିଲା ଉମରକୋଟ ଗ୍ରାମର ସଞ୍ଜିତ ହରିଜନଙ୍କ ପୁଅ ଓମ (୩) ଗତ ୨୮ ତାରିଖ ଅପରାହ୍ନରେ ଘର ସାମ୍ନାରେ ଥିବା ଗଛ ମୂଳେ ଖେଳୁଥିବା ବେଳେ ଆକସ୍ମିକ ଝଡ଼ ପବନ ହେବାରୁ ତାଙ୍କ ମୁଣ୍ଡ ଉପରେ ଗଛ ଡାଳ ଭାଙ୍ଗି ପଡିଯିବା ପରେ ପ୍ରାୟ ୪ ଇଞ୍ଚ ଲମ୍ବର ଏକ କାଠ ଖଣ୍ଡ (ବାଡ଼ି) ଶିଶୁଟିର ମୁଣ୍ଡର ମଝି ଭାଗରେ ଲାଖି ଯାଇ ପ୍ରଚୁର ରକ୍ତସ୍ରାବ ହୋଇଥିଲା। ଗୁରୁତର ଶିଶୁଙ୍କୁ ପ୍ରଥମେ ଉମରକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପ୍ରାଥମିକ ଚିକିତ୍ସା ପରେ ନବରଙ୍ଗପୁର ସରକାରୀ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ସ୍ଥିତିରେ ସୁଧାର ନ ଆସିବାରୁ ତାଙ୍କୁ କୋରାପୁଟ ଡାକ୍ତରଖାନାକୁ ନିଆ ଯାଇଥିଲା। କିନ୍ତୁ ଶିଶୁଟିର ଅବସ୍ଥା ଅତ୍ୟନ୍ତ ବିପଦଜନକ ଥିବାରୁ କାଠଖଣ୍ଡ କଢ଼ାଯାଇପାରି ନ ଥିଲା। ପରେ ତାଙ୍କୁ ବ୍ରହ୍ମପୁର ବଡ ଡାକ୍ତରଖାନାକୁ ଅଣାଯାଇଥିଲା। ତାଙ୍କ ମୁଣ୍ଡରେ ତୁରନ୍ତ ଅସ୍ତ୍ରୋପଚାରର ଆବଶ୍ୟକତା ଥିବାରୁ ଶିଶୁକୁ ସ୍ନାୟୁ ଶଲ୍ୟ ବିଭାଗରେ ଭର୍ତ୍ତି କରାଯାଇଥିଲା। ଅତ୍ୟନ୍ତ ଜରୁରୀ ଏବଂ ଯୁଦ୍ଧକାଳୀନ ଭିତ୍ତିରେ ତାଙ୍କ ମୁଣ୍ଡରେ ଅସ୍ତ୍ରୋପଚାର ଆରମ୍ଭ କରାଯାଇଥିଲା। ନିଶ୍ଚେତକ ବିଭାଗୀୟ ମୁଖ୍ୟ ଡା. ସଞ୍ଜୀବ ପାତ୍ର, ଡା. ନିବେଦିତା ସାହୁ ଓ ସହଯୋଗୀଙ୍କ ଉପସ୍ଥିତିରେ ସ୍ନାୟୁ ଶଲ୍ୟ ବିଭାଗୀୟ ମୁଖ୍ୟ ପ୍ରଫେସର ଡା. ରବି ନାରାୟଣ ପଣ୍ଡା, ଆସିଷ୍ଟାଣ୍ଟ ପ୍ରଫେସର ଡା. ଦେବଦତ୍ତ ସେନାପତି, ଡା. ତୁଷାର କାନ୍ତ ରଥ, ଡା. ଦେବଶ୍ରୀ ମହାରଣା, ଡା. ପି. ହରିଶ ପ୍ରସାଦଙ୍କୁ ନେଇ ଗଠିତ ଡାକ୍ତରୀ ଟିମ ଦୀର୍ଘ ୪ ଘଣ୍ଟା ଧରି ଅକ୍ଲାନ୍ତ ଉଦ୍ୟମ କରିବା ପରେ ଶିଶୁଙ୍କ ମୁଣ୍ଡରେ ଲାଖିହୋଇ ରହିଥିବା କାଠଖଣ୍ଡକୁ ସଫଳତାର ସହ ବାହାର କରିବାକୁ ସକ୍ଷମ ହୋଇଥିଲେ । ଯାହାଫଳରେ ଆସନ୍ନ ମୃତ୍ୟୁ ମୁଖରୁ ଶିଶୁଟି ବଞ୍ଚିଯାଇଥିଲେ। ସେ ବର୍ତ୍ତମାନ ସମ୍ପୂର୍ଣ୍ଣ ସୁସ୍ଥ ଥିବା ସ୍ନାୟୁ ଶଲ୍ୟ ବିଭାଗୀୟ ମୁଖ୍ୟ ଡା. ପଣ୍ଡା କହିଛନ୍ତି। ଅପରପକ୍ଷରେ ଶିଶୁଙ୍କ ଜୀବନ ବଞ୍ଚାଇ ପରିବାର ମୁହଁରେ ହସ ଫୁଟାଇଥିବା ଡାକ୍ତରୀଟିମର ସମସ୍ତ ସଦସ୍ୟଙ୍କୁ ଶିଶୁଙ୍କ ବାପା ଓ ପରିବାର ଲୋକେ କୃତଜ୍ଞତା ଜଣାଇଛନ୍ତି।
