ନୂଆଦିଲ୍ଲୀ, ୩୦।୮ : ନ୍ୟାଶନାଲ କ୍ରାଇମ ରେକର୍ଡ ବ୍ୟୁରୋ (ଏନସିଆରବି) ଦ୍ୱାରା ପ୍ରକାଶିତ ସର୍ବଶେଷ ତଥ୍ୟ ଅନୁଯାୟୀ, ପୂର୍ବ ବର୍ଷ ତୁଳନାରେ ୨୦୨୧ ମସିହାରେ ମହିଳା ନିର୍ଯାତନା ୧୫.୩ ପ୍ରତିଶତ ବୃଦ୍ଧି ପାଇଛି। ୨୦୨୦ ବର୍ଷରେ ୩ ଲକ୍ଷ ୭୧ ହଜାର ୫୦୩ ମାମଲା ପଞ୍ଜିକୃତ ହୋଇଥିଲା। ୨୦୨୧ ମସିହାରେ ଏଥିରେ ବୃଦ୍ଧି ହୋଇ ୪ ଲକ୍ଷ ୨୮ ହଜାର ୨୭୮ ମାମଲା ପଞ୍ଜିକୃତ ହୋଇଛି।
ବଳାତ୍କାର ମାମଲାରେ ରାଜସ୍ଥାନ ପୁଣି ଥରେ ଦେଶରେ ଏକ ନମ୍ବର ସ୍ଥାନରେ ରହିଛି। ୨୦୨୧ ମସିହାରେ, ରାଜସ୍ଥାନରେ ଏତେ ସଂଖ୍ୟକ ବଳାତ୍କାର ମାମଲା ପଞ୍ଜିକୃତ ହୋଇଥିଲା, ଯାହା ଦୁଇଟି ବଡ ରାଜ୍ୟରେ ମଧ୍ୟ ପଞ୍ଜୀକୃତ ହୋଇନଥିଲା। ଜାତୀୟ ଅପରାଧ ରେକର୍ଡ ବ୍ୟୁରୋ ପକ୍ଷରୁ ୨୦୨୧ ବର୍ଷ ପାଇଁ ଏହା ପ୍ରକାଶ କରାଯାଇଛି।
ଏନସିଆରବି ରିପୋର୍ଟ ଅନୁଯାୟୀ, ଗତ ୨୦୨୧ରେ ଉତ୍ତରପ୍ରଦେଶରେ ମହିଳାଙ୍କ ବିରୋଧରେ ସର୍ବାଧିକ ଅପରାଧିକ ମାମଲା ୫୬ ହଜାର ୮୩ ରେକର୍ଡ କରାଯାଇଥିଲା। ମହିଳାଙ୍କ ବିରୋଧରେ ୪୦ ହଜାର ୭୩୮ ଅପରାଧ ସହ ରାଜସ୍ଥାନ ଦ୍ୱିତୀୟ ସ୍ଥାନରେ ରହିଛି। ସେହିପରି ମହାରାଷ୍ଟ୍ରରେ ୩୯ ହଜାର ୫୨୮ମାମଲା ପଞ୍ଜିକୃତ ହୋଇଥିଲା। ଏନସିଆରବି ରିପୋର୍ଟରେ ଦର୍ଶାଯାଇଛି ଯେ ସାରା ଦେଶରେ ମହିଳାଙ୍କ ପ୍ରତି ଅପରାଧ ହାର ଏକ ଲକ୍ଷ ଜନସଂଖ୍ୟାରେ ଘଟୁଥିବା ଘଟଣା ଆଧାରରେ ୨୦୨୦ ରେ ୫୬.୫ ପ୍ରତିଶତରୁ ୨୦୨୧ ମସିହାରେ ୬୪.୫ ପ୍ରତିଶତକୁ ବୃଦ୍ଧି ପାଇଛି।
ରିପୋର୍ଟ ଅନୁଯାୟୀ, ରାଜସ୍ଥାନରେ ୨୦୨୦ ଏବଂ ୨୦୨୧ ମସିହାରେ ଯଥାକ୍ରମେ ୫ ହଜାର ୩୧୦ ଏବଂ ୬ ହଜାର ୩୩୭ ବଳାତ୍କାର ମାମଲା ପଞ୍ଜିକୃତ ହୋଇଥିଲା। ଏହା ପଛକୁ ମଧ୍ୟପ୍ରଦେଶରେ ୨୦୨୦ମସିହାରେ ୨ ହଜାର ୩୩୯ ମାମଲା ଥିଲା, ଯାହା ୨୦୨୧ରେ ୨ ହଜାର ୮୪୭ କୁ ବୃଦ୍ଧି ପାଇଥିଲା ।
