କଟକ ସଦର,୧୦।୧(ଡି.ଏନ୍.ଏ.): କଟକ ବଡ ଡାକ୍ତରଖାନା ପରିସରରେ ଜଣେ ୧୫ ବର୍ଷୀୟା ନାବାଳିକାଙ୍କୁ ବଳାତ୍କାର କରାଯାଇଥିଲା। ଘଟଣାଟି ଗତ ୬ ତାରିଖରେ ଘଟିଥିଲେ ମଧ୍ୟ ଜଗତ୍ସିଂହପୁର ଜିଲା ବିରିଡି ଥାନାରେ ଶନିବାର ଏ ନେଇ ଅଭିଯୋଗ ହୋଇଛି। ଏହି ଅଭିଯୋଗକୁ ଭିତ୍ତିକରି ପୋଲିସ ଦଫା ୩୭୬(୩) ଓ ପୋକ୍ସୋ ଆଇନ ଧାରା ୪ ଅନୁଯାୟୀ ଏକ ମାମଲା(ନଂ.୭/୨୧) ରୁଜୁ କରି ତଦନ୍ତ ଆରମ୍ଭ କରିଛି। ଘଟଣାଟି କମିଶନରେଟ୍ ପୋଲିସ ଅଞ୍ଚଳରେ ଘଟିଥିଲେ ମଧ୍ୟ ସରକାର ଓ କୋର୍ଟଙ୍କ ନିର୍ଦ୍ଦେଶକ୍ରମେ ଅଭିଯୋଗକାରିଣୀ ଯେକୌଣସି ଥାନାରେ ଅଭିଯୋଗ କଲେ ତାହା ଗ୍ରହଣଯୋଗ୍ୟ ହେବ। ସେହି ଦୃଷ୍ଟିରୁ ବିରିଡି ଥାନାରେ ମାମଲା ରୁଜୁ କରାଗଲା ବୋଲି ଥାନାଧିକାରୀ ଦିଲୀପ କୁମାର ସାହୁ କହିଛନ୍ତି।
ପୋଲିସ ସୂତ୍ରରୁ ପ୍ରକାଶ, ବୁଧବାର ନାବାଳିକା ଜଣକ ମାଆଙ୍କ ଦେଖାରଖା କରିବା ପାଇଁ ଡାକ୍ତରଖାନାକୁ ଯାଇଥିଲେ। ସେହିଦିନ ଅଭିଯୁକ୍ତଙ୍କ ସ୍ତ୍ରୀ ମଧ୍ୟ ପ୍ରସୂତି ଓ୍ବାର୍ଡରେ ଚିକିତ୍ସାଧୀନ ଥିଲେ। ଅଭିଯୁକ୍ତ ଓ ନାବାଳିକା ଗୋଟିଏ ଗ୍ରାମର ହୋଇଥିବାରୁ ପରସ୍ପର ମଧ୍ୟରେ ଚିହ୍ନା ପରିଚୟ ହୋଇଥିଲା। ସେହିଦିନ ରାତି ୧୦ଟାରେ ଅଭିଯୁକ୍ତ ବାହାରକୁ ବୁଲିଯିବାର ବାହାନା ଦେଖାଇ ନାବାଳିକାଙ୍କୁ ଡାକିଥିଲେ। ପରେ ଭାଙ୍ଗ ଖାଇବାକୁ ଦେବାରୁ ନାବାଳିକା ଅଚେତ ହୋଇପଡିଥିଲେ। ଏହାପରେ ତାଙ୍କୁ ଏକ ନିଛାଟିଆ ସ୍ଥାନକୁ ନେଇ ଅଭିଯୁକ୍ତ ଜଣକ ବଳାତ୍କାର କରିଥିଲେ। ନାବାଳିକା ଗଁାକୁ ଫେରିବା ପରେ ପରିବାର ଲୋକଙ୍କୁ ଘଟଣା ସମ୍ପର୍କରେ ଜଣାଇଥିଲେ। ଶେଷରେ ସ୍ଥାନୀୟ ଲୋକ ପ୍ରତିନିଧିଙ୍କ ପରାମର୍ଶକ୍ରମେ ନାବାଳିକାଙ୍କ ମାଆ ଥାନାରେ ଏତଲା ଦେଇଥିଲେ।
