ନନ୍ଦପୁର/ପାଡୁଆ,୧୩ା୫(ତୁଷାର କାନ୍ତ ମହାନ୍ତି/ଶଙ୍କର ପୂଜାରୀ)-କୋରାପୁଟ ଜିଲା ନନ୍ଦପୁର ବ୍ଲକ୍ ପାଡୁଆ ପଞ୍ଚାୟତ ରାଜୀବ ଗାନ୍ଧୀ ସେବାକେନ୍ଦ୍ର ଓ ୫ ଦୋକାନ ଗୃହ ବେସରକାରୀ ଜମିରେ ସରକାରୀ ଅର୍ଥରେ ନିର୍ମାଣ ହୋଇଥିଲା। ଉକ୍ତ ୨ ପ୍ରକଳ୍ପ ଜମି ମାଲିକ ଭାଙ୍ଗି ନିଜ ଅକ୍ତିଆରକୁ ନେଇଛନ୍ତି। କିନ୍ତୁ ଦୋକାନ ଗୃହ ନିର୍ମାଣ ବେଳେ ସ୍ଥାନିତ ୫ ସଟର ରାଜୀବ ଗାନ୍ଧୀ ସେବାକେନ୍ଦ୍ରରେ ସ୍ଥାନିତ ୪ କବାଟ, ୬ ଝରକା, ୧୦ ଲୁହା ଗ୍ରିଲ, ୨ ଲୁହା ଗେଟ ଆଦି ଲକ୍ଷାଧିକ ଟଙ୍କା ମୂଲ୍ୟର ସାମଗ୍ରୀ ସୁରକ୍ଷିତ ରଖାଯାଇ ନ ଥିବା ଦେଖିବାକୁ ମିଳିଛି।
ସୂଚନା ମୁତାବକ ନନ୍ଦପୁର ବ୍ଲକ ଓ ପାଡୁଆ ପଞ୍ଚାୟତ ପ୍ରଶାସନ ପକ୍ଷରୁ ନିର୍ମିତ ୨୦୦୮-୦୯ରେ ୧୩ ଲକ୍ଷ ୪୭ ହଜାର ୭୩୨ ଟଙ୍କା ବିନିମୟରେ ପାଡୁଆ ରାଜୀବ ଗାନ୍ଧୀ ସେବାକେନ୍ଦ୍ର ଓ ସେବାକେନ୍ଦ୍ର ସମ୍ମୁଖ ଭାଗରେ ପଞ୍ଚାୟତର ସ୍ଥାୟୀ ସମ୍ପତି ବୃଦ୍ଧି ଉଦ୍ଦେଶ୍ୟରେ ୧୦ ଲକ୍ଷ ଟଙ୍କା ବିନିମୟରେ ୫ ଷ୍ଟଲ ନିର୍ମାଣ କରାଯାଇଥିଲା। କିନ୍ତୁ ପରେ ୨ ପ୍ରକଳ୍ପ ନିର୍ମାଣସ୍ଥଳ ଜମି ବେସରକାରୀ ବୋଲି ଚିହ୍ନଟ କରାଯାଇ ଉକ୍ତ ଜମିକୁ ମାଲିକଙ୍କୁ ହସ୍ତାନ୍ତର କରିବାକୁ କୋର୍ଟ ନିର୍ଦ୍ଦେଶ ଦେଇଥିଲେ। ପ୍ରକଳ୍ପରେ ସ୍ଥାନିତ ଲକ୍ଷାଧିକ ଟଙ୍କାର ଲୁହା ସାମଗ୍ରୀକୁ ପ୍ରଶାସନ ପକ୍ଷରୁ ସୁରକ୍ଷିତ ରଖାଯାଇ ନାହିଁ। ଅଳ୍ପ କିଛି ସାମଗ୍ରୀ ଭଙ୍ଗା ଗୃହ ନିକଟରେ ପଡ଼ି ରହିଛି। ଅଧିକ ସ୍ଥାନୀୟ ଲୋକେ ବୋହି ନେଇଯାଇଥିବା ଜଣାପଡ଼ିଛି। ଏ ସମ୍ପର୍କରେ ନନ୍ଦପୁର ବିଡିଓ ଦୁର୍ଗା ପ୍ରସାଦ ଦୋରାଙ୍କୁ ପଚାରିବାରୁ ସେ ପଞ୍ଚାୟତ ପିଇଓ ଏବଂ ସରପଞ୍ଚଙ୍କୁ ଉକ୍ତ ଲୁହା ସାମଗ୍ରୀଗୁଡ଼ିକୁ ସଂଗ୍ରହ କରି ସଂରକ୍ଷିତ ରଖିବା, ଯଦି କିଛି ଜିନିଷ ଚାରି ହୋଇଥାଏ ତେବେ ଥାନାରେ ଏତଲା ଦେବାକୁ ନିର୍ଦ୍ଦେଶ ଦେବେ ବୋଲି କହିଛନ୍ତି।
