ଇସଲାମାବାଦ,୨।୫ : ବଲିଉଡ କିମ୍ବଦନ୍ତୀ ରାଜ କପୁରଙ୍କ ମହଲର ମାଲିକାନା ଅଧିକାର ପାଇଁ ଦାଖଲ ହୋଇଥିବା ଆବେଦନକୁ ପେଶୱାର ହାଇକୋର୍ଟ ଖାରଜ କରିଦେଇଛନ୍ତି। ପେଶୱାରରେ ଅବସ୍ଥିତ ଏହି ମହଲକୁ ସରକାର ଏକ ଜାତୀୟ ଐତିହ୍ୟ ବୋଲି ଘୋଷଣା କରିଛନ୍ତି। ପେଶୱାର ହାଇକୋର୍ଟର ଦୁଇ ଜଣିଆ ବେଞ୍ଚ ଇସ୍ତିଆକ ଇବ୍ରାହିମ ଏବଂ ଅବଦୁଲ ଶକୁରଙ୍କ ମାଲିକାନା ଅଧିକାର ସମ୍ବନ୍ଧରେ ଦାଖଲ ହୋଇଥିବା ଆବେଦନ ଉପରେ ଶୁଣାଣି କରିଛନ୍ତି।
ଏହି ମହଲର ଅଧିଗ୍ରହଣ ପ୍ରକ୍ରିୟା ସହ ସମାନ ଅଦାଲତର ପୂର୍ବ ରାୟକୁ ଦୃଷ୍ଟିରେ ରଖି କୋର୍ଟ ଏହି ଆବେଦନକୁ ଖାରଜ କରିଦେଇଛନ୍ତି। ଏହାକୁ ନୱାଜ ସରିଫ ସରକାର ଏକ ଜାତୀୟ ଐତିହ୍ୟ ଘୋଷଣା କରିଥିଲେ। ଖାଇବର ପାସ୍ତୁନଖ୍ବା ପ୍ରାଦେଶିକ ପ୍ରତ୍ନତତ୍ତ୍ୱ ବିଭାଗ ମଧ୍ୟ ମଧ୍ୟ ଏହାକୁ ଏକ ବିଜ୍ଞପ୍ତି ମାଧ୍ୟମରେ ୨୦୧୬ ରେ ଜାତୀୟ ଐତିହ୍ୟ ଭାବରେ ଘୋଷଣା କରିଥିଲା। ଏହି ମାମଲା ସିଭିଲ କୋର୍ଟକୁ ନିଆଯିବା ଉଚିତ ବୋଲି ପରିଷଦକୁ କୋର୍ଟ କହିଥିଲେ।
ସୂଚନାଯୋଗ୍ୟ, ଏହି ମହଲ ବର୍ତ୍ତମାନ ଜୀର୍ଣ୍ଣଶୀର୍ଣ୍ଣ ଅବସ୍ଥାରେ ଅଛି। ଏହାର ବର୍ତ୍ତମାନର ମାଲିକମାନେ ଏହାର ମୂଳ ସ୍ଥାନକୁ ଦୃଷ୍ଟିରେ ରଖି ଢାଞ୍ଚାକୁ ଭାଙ୍ଗିବାକୁ ଏବଂ ଏକ ବ୍ୟବସାୟିକ ପ୍ଲାଜା ନିର୍ମାଣ କରିବାକୁ ଚାହୁଁଛନ୍ତି। ତେବେ, ଐତିହାସିକ ଗୁରୁତ୍ୱକୁ ଦୃଷ୍ଟିରେ ରଖି ପ୍ରତ୍ନତତ୍ତ୍ୱ ବିଭାଗ ମହଲକୁ ସଂରକ୍ଷଣ କରିବାକୁ ଚାହୁଁଥିବାରୁ ଏହିପରି ସମସ୍ତ ପଦକ୍ଷେପ ନିଆଯାଇଥିଲା। ଏହି ମହଲ ୧୯୧୮ ରୁ ୧୯୨୨ ମଧ୍ୟରେ ମହାନ ଅଭିନେତା ରାଜ କପୁରଙ୍କ ଜେଜେବାପା ଦେୱାନ ବଶେଶ୍ୱରନାଥ କପୁରଙ୍କ ଦ୍ୱାରା ନିର୍ମିତ ହୋଇଥିଲା। ରାଜ କପୁର ଏବଂ ତାଙ୍କ ମାମୁଁ ତ୍ରିଲୋକ କପୁର ଏଠାରେ ଜନ୍ମ ହୋଇଥିଲେ।
