ନୟାଗଡ଼ ଅଫିସ,୧୪।୧୧: ନୟାଗଡ଼ ଜିଲାରେ ଲଘୁଚାପଜନିତ ଲଗାଣ ବର୍ଷା ଶୁକ୍ର ଓ ଶନିବାର ୨ଦିନ ହେଲା ଲାଗି ରହିଛି । ଏହାର ପ୍ରଭାବରେ କଟା ଯାଇଥିବା ଧାନ ଜମିରେ ଜମା ହୋଇଥିବା ବର୍ଷା ପାଣିରେ ଭାସୁଛି । ପୁଣି ଜମିରେ ଥିବା ଧାନ ଫସଲ ମାଟିରେ ପଡି ନଷ୍ଟ ହେବା ଆରମ୍ଭ ହୋଇଛି । ଖାଲୁଆ ଜମିରେ ବେଶି ଧାନ ଫସଲ ନଷ୍ଟ ହେବାର ଆଶଙ୍କା ରହିଛି ବୋଲି ଚାଷୀମାନେ କହିଛନ୍ତି । ଅନ୍ୟପକ୍ଷେ ଖଣ୍ଡପଡ଼ା ବ୍ଲକରେ ସର୍ବାଧିକ ବର୍ଷା ହୋଇଛି ।
୧୩ ତାରିଖ ଶନିବାର ଭାପୁର ବ୍ଲକରେ ୪୫.୧ ମିମି, ଦଶପଲ୍ଲା ବ୍ଲକରେ ୪୫.୮ ମିମି, ଗଣିଆରେ ୪୬ ମିମି, ଖଣ୍ଡପଡା ବ୍ଲକରେ ୯୧.୪ ମିମି, ନୟାଗଡ଼ ବ୍ଲକରେ ୮୫.୦ ମିମି, ନୂଆଗଁା ବ୍ଲକରେ ୬୫.୦ ମିମି, ଓଡ଼ଗଁା ବ୍ଲକରେ ୬୬.୪ ମିମି, ରଣପୁର ବ୍ଲକରେ ୫୩.୪ ମିିମି ବର୍ଷା ହୋଇଛି । ସେହିପରି ଶୁକ୍ରବାର ଭାପୁର ବ୍ଲକରେ ୩.୨ ମିମି, ନୟାଗଡ଼ ବ୍ଲକରେ ୨.୦ମିମି, ରଣପୁର ବ୍ଲକରେ ୧୦.୨ ମିମି ଅନୁରୂପ ଭାବେ ବର୍ଷା ହୋଇଛି । ଏନେଇ ନୟାଗଡ଼ ବ୍ଲକ ଗମ୍ଭାଡି ସାମନ୍ତରାପୁର ଗଁାର ଚାଷୀ ବିଜୟ ବେହେରା କୁହନ୍ତି, ମୁଁ ୩ ମାଣ ଜମିରେ ଧାନ ଫସଲ କରିଥିଲି। ବର୍ଷା ଆସିବା ପୂର୍ବରୁ ଅଢ଼େଇ ମାଣ ଜମିରୁ ଧାନ କାଟି ଦେଇଥିଲି । ବର୍ଷା ପରେ ଜମିରେ କଟା ଯାଇଥିବା ଧାନ ଭାସୁଛି । ଏଭଳିସ୍ଥଳେ କଟା ଯାଇଥିବା ଧାନକୁ ବର୍ଷାରେ ଭିଜି ପରିବାର ଲୋକେ ଏକାଠି ହୋଇ ରାସ୍ତା ଉପରକୁ ଆଣିଛୁ । ଖରା ହେଲେ ଏହାକୁ ଶୁଖାଯିବ । ଖରା ନ ହେଲେ ଆହୁରି ଅଧିକ କ୍ଷତି ହେବ। କୁମ୍ଭାରିଆ ଗଁାର ପୂର୍ଣ୍ଣଚନ୍ଦ୍ର ମହାପାତ୍ର କୁହନ୍ତି, ମୁଁ ୮ମାଣ ଜମିରେ ଫସଲ କରିଥିଲି । ମୋର ଭଲ ଧାନ ହୋଇଥିଲା। ବର୍ଷା ପୂର୍ବରୁ ୬ମାଣ ଜମିର ଫସଲ କାଟି ଦେଇଥିଲି । ବର୍ଷା ଯୋଗୁ କଟା ଧାନ ଜମିରେ ଭାସୁଛି । ମୁଁ ଏକୁଟିଆ ଲୋକ, ପାଣିରେ ଭାସୁଥିବା ଧାନକୁ ମଧ୍ୟ ସଂଗ୍ରହ କରି ପାରୁ ନାହିଁ କହି ସେ ଦୁଃଖ ପ୍ରକାଶ କରିଥିଲେ । ଲୋକ ଲଗାଇ ବୋହିବା ସମ୍ଭବ ହେଉ ନାହିଁ। ବର୍ଷା ସମୟରେ ଶ୍ରମିକ ମିଳୁ ନାହାନ୍ତି ବୋଲି କହିଛନ୍ତି । କେନ୍ଦୁଢ଼ିପିର ଯୋଗେନ୍ଦ୍ର ନାୟକ କୁହନ୍ତି, ମୋର ୪ ମାଣ ଧାନ ପାଣିରେ ବୁଡି ରହିଛି। ପ୍ରାୟ ୨ମାଣ ଜମିର ଧାନ କାଦୁଅରେ ରହିଛି । ଏ ବର୍ଷ ପାଣି ଓ କାଦୁଅରୁ ଧାନ ସଂଗ୍ରହ କରିବାକୁ ପଡିବ । ଅମଳ କମିବା ସହ ଧାନର ମାନ କମିଯିବ ବୋଲି ସେ କହିଛନ୍ତି । ଗଣିଆର ସୁଦାମ ପ୍ରଧାନ, ନୂଆଗଁାର ହୀନ ନାୟକ, ଦଶପଲ୍ଲାର କୁଞ୍ଜ ବେହେରା, ଫତେଗଡ଼ର ରାମଚନ୍ଦ୍ର ସ୍ବାଇଁ କୁହନ୍ତି, ଧାନ ଅମଳ ସମୟରେ ବର୍ଷା ଧାନ ଫସଲକୁ ନଷ୍ଟ କରିବ । ବେଶି କ୍ଷତି ଖାଲୁଆ ଜମିରେ ହେବ । ଉଚ୍ଚା ଜମିରେ ପାଣି ଗଡ଼ି ଯାଇଛି। ଏବେ ବର୍ଷାରେ ଚାଷୀ ବିଲକୁ ଯାଇ ହୁଡା ହାଣି ଜଳ ନିଷ୍କାସନ କରିବାରେ ଲାଗି ପଡିଛି । ତେବେ ଧାନ ଫସଲ ଭଲ ହେବ ବୋଲି ଯାହା କୁହାଯାଉଥିଲା ଏହି ଲଗାଣ ବର୍ଷା ସେହି ଆଶାକୁ ଧୂଳିସାତ୍ କରିଛି ବୋଲି ଚାଷୀମାନେ କହିଛନ୍ତି ।
