ଲାଠୋର,୧୪/୫(ଭୁବନେଶ୍ୱର ବାରିକ): କାଳବୈଶାଖୀ ବଲାଙ୍ଗିର ଜିଲା ହରିଶଙ୍କର ରୋଡ ରେଳ ଷ୍ଟେଶନ ପ୍ଲାଟଫର୍ମରେ ଥିବା ସେଡର ଆଜବେଷ୍ଟସ ଉଡ଼ିବା ସହ ଲୁହା ପାଚେରି ଲେଉଟି ପଡ଼ିଥିବା ଗୁରୁବାର ସକାଳେ ଦେଖାଯାଇଛି l ସୂଚନା ଅନୁସାରେ ଏହି ଅତୀତ ନିକଟରେ ହରିଶଙ୍କର ରୋଡ ରେଳ ଷ୍ଟେଶନ ଅମୃତ ଭାରତ ଷ୍ଟେଶନର ମାନ୍ୟତା ପାଇ ଜୋରସୋରରେ କୋଟି କୋଟି ଟଙ୍କାର ଉନ୍ନୀତକରଣ କାମ ଚାଲିଛି। ମାତ୍ର ୫ ମିନିଟ ପବନ ବହିବାରୁ ପ୍ଲାଟଫର୍ମ ନଂ-୧ରେ ନିର୍ମାଣ ହୋଇଥିବା ସେଡରେ ଲାଗିଥିବା ଟିଣ ଆଜବେଷ୍ଟର ଉଡ଼ିବା ସହ ସୁରକ୍ଷା ପାଇଁ ନିର୍ମାଣ ହୋଇଥିବା ଲୁହା ପାଚେରି ମଧ୍ୟ ଲେଉଟି ପଡ଼ିଛି l
ସେହିପରି ସେଡ ମାନଙ୍କୁ ଲାଗିଥିବା ଫେନ ମାନ ମୋଡ଼ି ମାଡ଼ି ହୋଇ ଯାଇଛି l ବର୍ତ୍ତମାନ କାମ ଚାଲିଛି ସମ୍ପୂର୍ଣ୍ଣ ହୋଇ ନାହିଁ l କାମ ଅଧାରୁ ମାତ୍ର ୫ ମିନିଟ ପବନ ଯଦି ଏପରି ପରିସ୍ଥିତି ସୃଷ୍ଟି କରିଛି ତାହେଲେ ଆଗକୁ କଣ ହେବ ଲୋକଙ୍କ ମନରେ କାମର ସ୍ଥାୟିତ୍ୱକୁ ନେଇ ଆଶଙ୍କା ସୃଷ୍ଟି ହୋଇଛି l ରେଳ ବିଭାଗର ଅଧିକାରୀ ମାନେ କାମ ଦେଖିବା ପାଇଁ ନିୟମିତ ଆସୁଥିଲେ ନା ଠିକାଦାର ପାଖରୁ ମୋଟା ଅଙ୍କ ନେଇ ଚୁପ ହୋଇ ବସି ରହିଥିଲେ ବୋଲି ଲୋକ ଆଲୋଚନା କରୁଛନ୍ତି l ଯଦି କାମ ଦେଖିବା ପାଇଁ ଆସୁଥିଲେ ତାହେଲେ ନିମ୍ନମାନର କାମ ହେଉଥିବା କେମିତି ଜାଣି ପାରିଲେ ନାହିଁ ତାହା ପ୍ରଶ୍ନବାଚୀ ସୃଷ୍ଟି କରୁଛି l ଏନେଇ କଣ୍ଟାବାଞ୍ଜି ଆଇଓଡବ୍ଲୁ ମାନସ ରଞ୍ଜନ ବେହେରାଙ୍କୁ ପଚାରିବାରେ ପବନ ବହୁତ ଜୋର ବହିବା ଫଳରେ ସେଡ ଆଜବେଷ୍ଟର ଉଡେଇ ନେଇଛି l ବାକି ରହିଲା ଲୁହା ପାଚେରି କାମ ସମ୍ପୂର୍ଣ୍ଣ ହୋଇ ନ ଥିବା ଯୋଗୁ ଓଲଟି ପଡ଼ିଛି l ଆମେ ଠିକାଦାରକୁ କହିଛୁ ସେ ଦେଖିଲା ପରେ ପୁଣି କାମ କରିବ ବୋଲି କହିଥିଲେ l ତେବେ ବିଭାଗୀୟ ଉଚ୍ଚ କର୍ତ୍ତୁପକ୍ଷ ଏଥିପ୍ରତି ଦୃଷ୍ଟି ଦେଇ ଆଗକୁ କାମ କେମିତି ଠିକ ଠାକ ଚାଲିବ ସେ ଦିଗରେ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହେଉଛି l
Dharitri – Odisha’s No.1 Odia Daily
