କଟକ ଅଫିସ,୧୫।୪: ବାଙ୍ଗିରିପୋଷି-ଭୁବନେଶ୍ୱର ସୁପରଫାଷ୍ଟ ଏକ୍ସପ୍ରେସ୍ ଟ୍ରେନ୍ (୧୨୮୯୧)ରେ ଶୁକ୍ରବାର ଯାନ୍ତ୍ରିକ ତ୍ରୁଟି ଯୋଗୁ ପ୍ରାୟ ଅଢ଼େଇ ଘଣ୍ଟା ଧରି ରେଳ ଚଳାଚଳ ବାଧାପ୍ରାପ୍ତ ହୋଇଥିଲା। କଟକ ରେଳଷ୍ଟେଶନର ୫ ନମ୍ବର ପ୍ଲାଟଫର୍ମରେ ଗାଡ଼ିଟି ଅଟକି ରହିବା ହେତୁ ଅପ୍ ଲାଇନ୍ରେ ସେହି ସମୟ ମଧ୍ୟରେ କୌଣସି ରେଳ ଚଳାଚଳ ହୋଇପାରି ନ ଥିଲା। ଫଳରେ କଟକ ଷ୍ଟେଶନ ପୂର୍ବରୁ ୪ଟି ଟ୍ରେନ୍କୁ ଅଟକାଇ ରଖାଯାଇଥିଲା। ଯାତ୍ରୀମାନେ ଗନ୍ତବ୍ୟ ସ୍ଥଳରେ ପହଞ୍ଚତ୍ ନ ପାରି ହନ୍ତସନ୍ତ ହୋଇଥିଲେ। ଟ୍ରେନ୍ଟିର ଅନ୍ତିମ ଷ୍ଟେଶନ ଭୁବନେଶ୍ୱର ହୋଇଥିବାରୁ ଯାତ୍ରୀମାନେ କଟକରେ ଓହ୍ଲାଇ ସଡ଼କ ପଥରେ ବସ୍ ଯୋଗେ ଯିବାକୁ ବାଧ୍ୟ ହୋଇଥିଲେ।
ମିଳିଥିବା ସୂଚନା ଅନୁସାରେ, ଉକ୍ତ ଟ୍ରେନ୍ ପ୍ରତିଦିନ ଭଳି ଶୁକ୍ରବାର ପୂର୍ବାହ୍ନ ପ୍ରାୟ ୯.୧୫ରେ କଟକ ରେଳଷ୍ଟେଶନର ୫ ନମ୍ବର ପ୍ଲାଟଫର୍ମ ମଧ୍ୟକୁ ପ୍ରବେଶ କରୁଥିଲା। ଏହି ସମୟରେ ଟ୍ରେନ୍ର ଲୋକୋ ପାଇଲଟ୍ ଯାନ୍ତ୍ରିକ ତ୍ରୁଟି ସମ୍ପର୍କରେ ଅବଗତ ହୋଇଥିଲେ। ୨୨ ବଗିବିଶିଷ୍ଟ ଟ୍ରେନ୍ର ଇଞ୍ଜିନ୍ ଓ ଦୁଇଟି ବଗି ପ୍ଲାଟଫର୍ମ ମଧ୍ୟକୁ ପ୍ରବେଶ କରିସାରିଥିଲା। ହେଲେ ଯାନ୍ତ୍ରିକ ତ୍ରୁଟି ୩ୟ ବଗିରେ ଜଣାପଡ଼ିବାରୁ ଟ୍ରେନ୍କୁ ସେହି ଅବସ୍ଥାରେ ଅଟକାଇ ରଖାଯାଇଥିଲା। ଦୁଇ ବଗି ମଧ୍ୟରେ ଧକ୍କାରୁ ରକ୍ଷା କରିବା ପାଇଁ ଥିବା ବଫର କୌଣସି କାରଣରୁ ବଙ୍କା ହୋଇଯାଇଥିଲା। ସେହି ଅବସ୍ଥାରେ ଟ୍ରେନ୍ଟି ପ୍ରାୟ ଅଢ଼େଇ ଘଣ୍ଟା ରହିବାରୁ ଅପ୍ ଲାଇନ୍ରେ ଟ୍ରେନ୍ ଚଳାଚଳ ସମ୍ପୂର୍ଣ୍ଣ ବନ୍ଦ ହୋଇଯାଇଥିଲା। ଭୁବନେଶ୍ୱର ଓ କଟକର ଟେକ୍ନିକାଲ ଟିମ୍ ସହ ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚତ୍ ନଷ୍ଟ ବଫରକୁ କାଟି ବାହାର କରିବା ପରେ ନୂତନ ବଫର ଯୋଡ଼ା ଯାଇଥିଲା। ପୂର୍ବାହ୍ନ ପ୍ରାୟ ୧୧ଟା ୧୫ ପରେ ଟ୍ରେନ୍ଟି ଭୁବନେଶ୍ୱର ଅଭିମୁଖେ ଯାତ୍ରା କରିଥିଲା। ଅପରପକ୍ଷରେ ରେଲ୍ଓ୍ବେ ପକ୍ଷରୁ ଭଦ୍ରକ ଆଡୁ ଆସୁଥିବା ଟ୍ରେନ୍ଗୁଡ଼ିକୁ ବିଭିନ୍ନ ଷ୍ଟେଶନରେ ଅଟକାଇ ରଖାଯାଇଥିଲା। କେନ୍ଦ୍ରାପଡ଼ା ରୋଡ୍ ଷ୍ଟେଶନ୍ରେ ଜଳେଶ୍ୱର-ପୁରୀ ମେମୋ, କପିଳାସ ରୋଡ୍ ଷ୍ଟେଶନରେ ତାଳଚେର-ପୁରୀ ଏକ୍ସପ୍ରେସ୍, ଧାନମଣ୍ଡଳ ଷ୍ଟେଶନ୍ରେ ଦୂରନ୍ତୋ ଓ ନନ୍ଦନକାନନ ସୁପରଫାଷ୍ଟ ଏକ୍ସପ୍ରେସ୍ ଟ୍ରେନ୍କୁ ଅଟକାଇ ରଖାଯାଇଥିଲା। ଯାତ୍ରୀମାନେ ଅଢ଼େଇ ଘଣ୍ଟାରୁ ଅଧିକ ସମୟ ଧରି ଟ୍ରେନ୍ ଭିତରେ ଫସି ରହିଥିଲେ। ଗରମ ଓ ଗୁଳୁଗୁଳି ଯୋଗୁ ବହୁସଂଖ୍ୟକ ଯାତ୍ରୀ ଗନ୍ତବ୍ୟ ସ୍ଥଳରେ ପହଞ୍ଚତ୍ ନ ପାରି ବିଭିନ୍ନ ଷ୍ଟେଶନରେ ଅଟକି ଅତିଷ୍ଠ ହୋଇପଡିଥିଲେ।
