ନୂଆଦିଲ୍ଲୀ,୭ ।୨: କଂଗ୍ରେସ ଏମପି ରାହୁଲ ଗାନ୍ଧୀ ମଙ୍ଗଳବାର ଲୋକ ସଭାରେ ତାଙ୍କ ଭାଷଣ ଦେବା ସମୟରେ କେନ୍ଦ୍ର ସରକାରଙ୍କ ଉପରେ ଖୁବ୍ ବର୍ଷିଛନ୍ତି । ରାହୁଲ ଗାନ୍ଧୀ, ଅଗ୍ନିବୀର ଯୋଜନା, ଅଦାନି ମାମଲାକୁ ନେଇ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି । ସେ କହିଛନ୍ତି, ‘ଭାରତ ଯୋଡୋ ଯାତ୍ରା’ ସମୟରେ ସେ ଲୋକଙ୍କ କଥା ଶୁଣିଛନ୍ତି ଓ ନିଜ କଥା ବି କହିଛନ୍ତି, ଆମେ ଯାତ୍ରା ସମୟରେ ମହିଳା, ଶିଶୁ ଓ ବରିଷ୍ଠ ନାଗରିକଙ୍କ ସହ କଥା ହୋଇଛୁ ।
ଲୋକ ସଭାରେ କଂଗ୍ରେସ ଏମପି ରାହୁଲ ଗାନ୍ଧୀ କହିଛନ୍ତି, ଆମେ ଯେତେବେଳେ ଯୁବକଙ୍କୁ ସେମାନଙ୍କ ଚାକିରିକୁ ନେଇ ପ୍ରଶ୍ନ କଲୁ ସେତେବେଳେ ଅଧିକାଂଶ ଯୁବକ କହିଲେ ଆମେ ବେକାର ଆଉ କେତେଜଣ କହିଲେ ଆମେ କ୍ୟାବ ଚଲାଉଛୁ । କୃଷକମାନେ ପିଏମ ଯୋଜନାରେ ଟଙ୍କା ପାଇ ନ ଥିବା କଥା କହିଥିଲେ । ଯେତେବେଳେ ଆଦିବାସୀମାନେ ଆଦିବାସୀ ବିଲ କଥା କହିଲେ ସେତେବେଳେ ତାଙ୍କ ଜମି ଛଡାଇ ନିଆଯାଇଛି । ଲୋକେ ଅଗ୍ନିବୀର ଯୋଜନାକୁ ନେଇ ବି କଥା ହୋଇଥିଲେ । ହେଲେ ଯୁବକମାନେ କହିଥିଲେ ଏହି ସ୍କିମରେ ଆମକୁ ୪ ବର୍ଷ ପରେ ଚାକିରି ଛାଡିବାକୁ କୁହାଯିବ ।
ରାହୁଲ ଗାନ୍ଧୀ କହିଛନ୍ତି, ଅବସରପ୍ରାପ୍ତ ସେନାର ବରିଷ୍ଠ ଅଧିକାରୀମାନେ କହିଛନ୍ତି, ଅଗ୍ନିବୀର ଯୋଜନା ଆରଏସଏସ, ସ୍ୱରାଷ୍ଟ୍ର ମନ୍ତ୍ରଣାଳୟରୁ ଆସିଛି ସେନାରୁ ନୁହେଁ । ସେମାନେ କହିଛନ୍ତି, ଅଗ୍ନିବୀର ଯୋଜନାକୁ ସେନା ଉପରେ ଥୋପି ଦିଆଯାଇଛି । ସେନାନିବୃତ୍ତ ଅଧିକାରୀମାନେ କହିଛନ୍ତି, ଲୋକଙ୍କୁ ଅସ୍ତ୍ର ଚଲାଇବାର ପ୍ରଶିକ୍ଷଣ ଦିଆଯାଉଛି ଆଉ ପୁଣିଥରେ ସମାଜକୁ ଫେରି ଯିବାକୁ କୁହାଯାଉଛି । ଏହାଦ୍ୱାରା ହିଂସା ଉପୁଜିବ । ସେନା ନିବୃତ୍ତ ଅଧିକାରୀମାନେ ଭାବୁଛନ୍ତି ଯେ ଅଗ୍ନିବୀର ଯୋଜନା ସେନାରୁ ଆସିନାହିଁ ଏନଏସଏ ଅଜିତ ଡୋଭାଲ ସେନା ଉପରେ ଏହି ଯୋଜନାକୁ ଲାଗୁ କରିଛନ୍ତି ।
