ଲୁଧିଆନା,୧୬।୧: କଂଗ୍ରେସର ଭାରତ ଯୋଡୋ ଯାତ୍ରା ଏବେ ଲୁଧିଆନା ଦେଇ ଯାଉଛି। ଏହି ସମୟରେ କଂଗ୍ରେସ ଏମ୍ପି ରାହୁଲ ଗାନ୍ଧୀଙ୍କ ନିଜ ପରି ଅବିକଳ ଦେଖାଯାଉଥିବା ବ୍ୟକ୍ତିଙ୍କୁ ଭେଟିଛନ୍ତି। ଏହି ବ୍ୟକ୍ତିଙ୍କ ନାମ ମହମ୍ମଦ ଫୈଜଲ ଚୌଧୁରୀ। ସେ ଜଣେ କଂଗ୍ରେସ କର୍ମୀ ଏବଂ ମିରୁଟର ବାସିନ୍ଦା। ଫୈଜଲ ‘ଛୋଟା ରାହୁଲ’ ଭାବରେ ପ୍ରସିଦ୍ଧ।
ଜଣେ କୃଷକ ପରିବାରରେ ଜନ୍ମିତ ଫୈଜଲ ମିରୁଟରେ ପାର୍ଟି ୟୁନିଟର ଏକ ଅଂଶ। ଫୈଜଲ ଯାତ୍ରା ଶେଷ ହେବା ପର୍ଯ୍ୟନ୍ତ ଏଥିରେ ଜଡିତ ରହିବାକୁ ଚାହାଁନ୍ତି। ସେ କହିଛନ୍ତି, ମୋ ବାପା ଏବଂ ଜେଜେବାପା କଂଗ୍ରେସ ଦଳର ଆଦର୍ଶ ଦ୍ୱାରା ଅନୁପ୍ରାଣିତ ହୋଇଥିଲେ ଏବଂ ଏଥିରେ ସମ୍ପୂର୍ଣ୍ଣ ବିଶ୍ୱାସ କରିଥିଲେ। ଏହି କାରଣରୁ ମୁଁ ତିନି ବର୍ଷ ପୂର୍ବେ କଂଗ୍ରେସ ଦଳରେ ମଧ୍ୟ ଯୋଗ ଦେଇଥିଲି। ଆଲ୍ଲାଙ୍କର ଆଶୀର୍ବାଦ ଯେ, ମୋର ଚେହେରା ଦେଖି ଲୋକମାନେ ପ୍ରାୟତଃ ମୋତେ ଛୋଟା ରାହୁଲ ଗାନ୍ଧୀ ବୋଲି ଡାକନ୍ତି। ମୋ ସହ ଫଟୋ ମଧ୍ୟ ଉଠନ୍ତି।
ସୋମବାର ପଞ୍ଜାବର ଆଦମପୁରରୁ ପୁଣି ଭାରତ ଯୋଡୋ ଯାତ୍ରା ଆରମ୍ଭ ହୋଇଛି। ପ୍ରବଳ ଶୀତ ସତ୍ତ୍ୱେ ରାହୁଲ ଗାନ୍ଧୀଙ୍କ ସହ ଶହ ଶହ ଲୋକ ଯୋଗ ଦେଇଥିଲେ। କଂଗ୍ରେସ ରାଜ୍ୟ ୟୁନିଟ ମୁଖ୍ୟ ଅମରିନ୍ଦର ସିଂ ରାଜାଙ୍କ ସହ ଅନେକ ଦଳର ନେତା ରାହୁଲ ଗାନ୍ଧୀଙ୍କ ସହ ଯାତ୍ରାରେ ବୁଲୁଥିବାର ନଜର ଆସିଥିଲେ।
