ନୂଆଦିଲ୍ଲୀ,୩୦।୮: ନିକଟରେ ପ୍ରକାଶିତ ସରକାରୀ ମାନଚିତ୍ରରେ ଚାଇନା ଅରୁଣାଚଳ ପ୍ରଦେଶ ଏବଂ ଅକ୍ସାଇ ଚୀନର ଅଂଶ ଦେଖାଇବା ପରେ ଭାରତ ଅସନ୍ତୋଷ ବ୍ୟକ୍ତ କରିଛି। ଚାଇନା ଦାବିକୁ ବୈଦେଶିକ ମନ୍ତ୍ରୀ ଏସ ଜୟଶଙ୍କର ମଧ୍ୟ ପ୍ରତ୍ୟାଖ୍ୟାନ କରିଛନ୍ତି। ଅନ୍ୟପକ୍ଷରେ ଏହି ପ୍ରସଙ୍ଗରେ ରାଜନୈତିକ ମହଲରେ ବାକ୍ଯୁଦ୍ଧ ମଧ୍ୟ ଆରମ୍ଭ ହୋଇଛି। କଂଗ୍ରେସ ନେତା ରାହୁଲ ଗାନ୍ଧୀ ଏହି ପ୍ରସଙ୍ଗରେ ମୋଦି ସରକାରଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ, ଲଦାଖରେ ମଧ୍ୟ ଏକ ଇଞ୍ଚ ଜମି ନଷ୍ଟ ହୋଇନାହିଁ ବୋଲି ପ୍ରଧାନମନ୍ତ୍ରୀ ମୋଦି କହୁଛନ୍ତି। କିନ୍ତୁ ଏହା ସମ୍ପୂର୍ଣ୍ଣ ମିଛ ବୋଲି ମୁଁ ପୂର୍ବରୁ କହିସାରିଛି। ମୁଁ ନିକଟରେ ଲଦାଖରୁ ଫେରି ଆସିଛି। ସେଠାରେ ସମସ୍ତେ ଜାଣନ୍ତି ଯେ ଚାଇନା ଆମ ଜମି ଅକ୍ତିଆର କରିଛି। ଏହାକୁ ନେଇ ଭାଜପା ନେତା ତଥା କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ରାହୁଲଙ୍କୁ ସମାଲୋଚନା କରିଛନ୍ତି।
ରାହୁଲ ଗାନ୍ଧୀଙ୍କୁ ଟାର୍ଗେଟ କରି କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ରାହୁଲ ଗାନ୍ଧୀ ବାରମ୍ବାର ଏମିତି କହି ନିଜର ମାନସିକ ସ୍ଥିତି ଦେବାଳିଆ ଥିବା ଦର୍ଶାଇଛନ୍ତି। ସେ ଭାରତର ବିକାଶକୁ ହଜମ କରିବାରେ ସକ୍ଷମ ନୁହଁନ୍ତି। ତାଙ୍କର ଆଭିମୁଖ୍ୟ ସର୍ବଦା ଚାଇନା ସମର୍ଥକ ରହିଆସିଛି। ଆଜି ଭାରତର ନେତୃତ୍ୱ ଏବଂ ଏହାର ପ୍ରତିରକ୍ଷା ଶକ୍ତି ସାରା ବିଶ୍ୱରେ ଜଣାଶୁଣା। ଭାରତ ପ୍ରତି ରାହୁଲଙ୍କର ପାରିବାରିକ ନିରାଶା ଅଛି ଏବଂ ତାଙ୍କ ମନ୍ତବ୍ୟ ତାହା ଦର୍ଶାଉଛି।
