ଦାରିଙ୍ଗବାଡ଼ି,୩୦ା୧(ଅରୁଣ ସାହୁ): ଜନସାଧାରଣଙ୍କୁ ସାମାଜିକ ସୁରକ୍ଷା ଯୋଗାଇବା ଓ ଅଞ୍ଚଳରେ ଆଇନଶୃଙ୍ଖଳା ପରିସ୍ଥିତି ସୁଧାରିବାକୁ ପୋଲିସ ସର୍ବଦା ଯତ୍ନବାନ ହେବା ଜରୁରୀ। କିନ୍ତୁ ଏମିତି କିଛି ପୋଲିସ ଅଛନ୍ତି ସେମାନେ ନିୟମ ଉଲଘଂନ କରି ଲୋକହସା ହୁଅନ୍ତି। ଲୋକଙ୍କୁ ସୁରକ୍ଷା ଦେବା ବଦଳରେ ବିପଦରେ ପକାଇଦିଅନ୍ତି। ଏଭଳି ଦୃଶ୍ୟ ଦେଖିବାକୁ ମିଳିଛି କନ୍ଧମାଳ ଜିଲା ଦାରିଙ୍ଗବାଡ଼ି ଥାନାରେ କାର୍ଯ୍ୟରତ ଜଣେ କନଷ୍ଟେବଳଙ୍କ କ୍ଷେତ୍ରରେ। ସେ ନିଜ କାରରେ ଦାରିଙ୍ଗବାଡ଼ିର ଜନଗହଳିପୂର୍ଣ୍ଣ ୪ ଛକ ଉପରେ ନିଜ କାରକୁ ନ ଷ୍ଟାର୍ଟ ଅବସ୍ଥାରେ ରଖି ଡ୍ରାଇଭର ସିଟରେ ନିଘୋଡ଼ ନିଦରେ ଶୋଇପଡିଛନ୍ତି। ଫଳରେ ସେହି ରାସ୍ତାରେ ଦୀର୍ଘ ସମୟ ଧରି ଗାଡ଼ିମୋଟର ଯାତାୟାତରେ ବାଧା ସୃଷ୍ଟି ହୋଇଥିଲା। ଇଏ ଥରକର ଘଟଣା ନୁହଁ, ଏଭଳି କନଷ୍ଟେବଳ ଜଣଙ୍କ ଉକ୍ତ ବଜାର ଦେଇ ଯାଇଥିବା ରାଜପଥ ଉପରେ ନିଶାସକ୍ତ ଅବସ୍ଥାରେ କାର ରଖି ଶୋଇପଡ଼ନ୍ତି। ଫଳରେ ଲୋକମାନେ ହଇରାଣ ଭୋଗନ୍ତି ଆଉ ପୋଲିସ ବାବୁଙ୍କ ଭୟରେ କିଏ ମୁହଁ ଖୋଲନ୍ତି ନାହିଁ। କନଷ୍ଟେବଳ ମନୋରଞ୍ଜନ ସାବତଙ୍କୁ ପଚାରିବାରୁ ସେ ମୋ’ ଭିଡିଓ ଫଟୋ କାହିଁକି ଉଠାଉଛନ୍ତି ବୋଲି ପଚାରିବା ସହ ସେ ଜଣଙ୍କୁ କିଛି ଜିନିଷ ଆଣିବାକୁ ପଠାଇଛି ସେହି ଭିତରେ ତାଙ୍କୁ ନିଦ ହୋଇଗଲା ବୋଲି କହିବା ସହ ନିଜ କାର୍କୁ ରାଜପଥରୁ ହଟାଇ ରାସ୍ତା କଡ଼ରେ ପୁଣି ଶୋଇପଡ଼ିଥିଲେ।
ପ୍ରକାଶ ଯେ, ଦାରିଙ୍ଗବାଡ଼ି ଚାରିଛକରେ ସର୍ବାଧିକ ଭିଡ଼ ସହ ଟ୍ରାଫିକ ସମସ୍ୟା ଲାଗିରହୁଛି ଜଣେ ପୋଲିସ କର୍ମଚାରୀ ଭାବେ ଏହାର ସମାଧାନ କରି ଲୋକଙ୍କୁ ଟ୍ରାଫିକ ନିୟନ୍ତ୍ରଣ କରି ଯାତାୟାତରେ ସୁବିଧା କରିବା ବଦଳରେ ନିଜେ କାରକୁ ଜାତୀୟ ରାଜପଥ ମଝିରେ ରଖି ବେପରୁଆ ଶୋଇପଡିବା ଘଟଣାକୁ ଅଞ୍ଚଳବାସୀ ନିନ୍ଦା କରିଛନ୍ତି। ଜିଲା ପୋଲିସ ପ୍ରଶାସନ ଏହାର ତଦନ୍ତ କରି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ନ କଲେ ଅଞ୍ଚଳବାସୀ ପୋଲିସ ପ୍ରତି ରହିଥିବା ସମ୍ମାନ ଓ ଭୟ ଦୂର ହୋଇଯିବ ବୋଲି ବୁଦ୍ଧିଜୀବୀ ମହଲରେ କୁହାଯାଇଛି। ଏନେଇ ଆଇଆଇସି କନକ କୁମାର ମାଝୀ ଘଟଣା ସମ୍ପର୍କରେ ଶୁଣିବା ପରେ ଘଟଣାସ୍ଥଳକୁ ଅନ୍ୟ କର୍ମଚାରୀଙ୍କୁ ପଠାଇ କନଷ୍ଟେବଳଙ୍କୁ ଥାନାକୁ ନେଇଛନ୍ତି।
