ମସ୍କୋ,୮।୧୧: ସୁପରପାଓ୍ବାରର ମୁକୁଟ ପିନ୍ଧିଛନ୍ତି ଡୋନାଲ୍ଡ ଟ୍ରମ୍ପ। ଆଗାମୀ ବର୍ଷ ଜାନୁଆରୀ ୨୦ରେ ଶପଥ ନେବେ। ଟ୍ରମ୍ପଙ୍କ ଆମେରିକା ଦଖଲ ପରେ ଚାରିଆଡୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି। ପ୍ରଧାନମନ୍ତ୍ରୀ ମୋଦିଙ୍କ ସମେତ ବିଶ୍ୱର ସବୁ ଦେଶର ମୁଖ୍ୟ ତାଙ୍କୁ ଶୁଭେଚ୍ଛା ଜଣାଇଛନ୍ତି। କିନ୍ତୁ ଋଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ୍ ଶୁଭେଚ୍ଛା ଜଣାଇବେ ନାହିଁ ବୋଲି ଖୋଲାଖୋଲି କହିଥିଲେ। ସେ କହିଥିଲେ, ଟ୍ରମ୍ପ କହିଥିଲେ ଜିତିବା ପରେ ସେ ପ୍ରଥମେ ଋଷିଆ-ୟୁକ୍ରେନ ଯୁଦ୍ଧ ବନ୍ଦ କରିବେ। ଯୁଦ୍ଧ ବନ୍ଦ କରିବା ପରେ ଋଷିଆ ତାଙ୍କୁ ଶୁଭେଚ୍ଛା ଜଣାଇବ।
ତେବେ ଏପରି କହିବାର ୩ଦିନ ନଜାଉଣୁ ପୁଟିନ୍, ଟ୍ରମ୍ପଙ୍କୁ ରାଷ୍ଟ୍ରପତି ନିର୍ବାଚନ ବିଜୟୀର ଶୁଭେଚ୍ଛା ଜଣାଇଛନ୍ତି। ଏଥିସହ ସେ କହିଛନ୍ତି, ମସ୍କୋ ନବ ନିର୍ବାଚିତ ରାଷ୍ଟ୍ରପତିଙ୍କ ସହ କଥାବାର୍ତ୍ତା କରିବା ପାଇଁ ପ୍ରସ୍ତୁତ ଅଛି। ଏଥିରୁ ସଙ୍କେତ ମିଳୁଛି ଯେ, ଟ୍ରମ୍ପ ଆସିବା ପରେ ମସ୍କୋ-ଓ୍ବାଶିଂଟନ୍ ମଧ୍ୟରେ ସମ୍ପର୍କ ବଦଳିପାରେ। ଇଣ୍ଟରନାଶନାଲ ଡିଶକଶନ କ୍ଲବର ଏକ ଅଧିବେଶନକୁ ସମ୍ଭୋଧିତ କରି ପୁଟିନ୍ କହିଛନ୍ତି, ଆମେରିକା ରାଷ୍ଟ୍ରପତି ନିର୍ବାଚନରେ ଟ୍ରମ୍ପ ବିଜୟୀ ହୋଇଥିବାରୁ ତାଙ୍କୁ ଶୁଭେଚ୍ଛା ଜଣାଉଛି। ଆମେରିକାବାସୀ ଟ୍ରମ୍ପଙ୍କ ଉପରେ ଭରସା କରିଥିବାରୁ ତାଙ୍କ ସହ ମିଶି ଆମେ କାମ କରିବାକୁ ପ୍ରସ୍ତୁତ ଅଛୁ।
ପୁଟିନ୍ଙ୍କ ଏହି ଅଭିନନ୍ଦନ ଏହି ସମୟରେ ଆସିଛି ଯେତେବେଳ ଆମେରିକା ଏବଂ ଋଷିଆ ମଧ୍ୟରେ ସମ୍ପର୍କ ବିଶେଷ ତିକ୍ତ ରହିଛି। ବିଶେଷ କରି ୟୁକ୍ରେନ ଯୁଦ୍ଧକୁ ନେଇ ଆମେରିକା ୟୁକ୍ରେନକୁ ସମର୍ଥନ କରିଛି। ଟ୍ରମ୍ପଙ୍କୁ ଶୁଭେଚ୍ଛା ଜଣାଇବା ସହ ପୁଟିନ ତାଙ୍କୁ ସାହସୀ ନେତା ବୋଲି କହିଛନ୍ତି।
ଟ୍ରମ୍ପଙ୍କ ସାହସିକତାକୁ ପୁଟିନ ମଧ୍ୟ ପ୍ରଶଂସା କରିଛନ୍ତି। କେବଳ ଏତିକି ନୁହେଁ, ଜୁଲାଇରେ ତାଙ୍କ ଉପରେ ହୋଇଥିବା ହତ୍ୟା ଉଦ୍ୟମ ପରେ ଟ୍ରମ୍ପଙ୍କ ସାହାସିକତାକୁ ମଧ୍ୟ ସେ ପ୍ରଶଂସା କରିଛନ୍ତି। ପୁଟିନ କହିଛନ୍ତି, ମୁଁ ଟ୍ରମ୍ପଙ୍କ ଆଚରଣ ଦେଖିଛି, ସେ ବହୁତ ସାହସ ଦେଖାଇଛନ୍ତି। ପୁଟିନ ଏହା ମଧ୍ୟ କହିଛନ୍ତି ଯେ ସେ ଟ୍ରମ୍ପଙ୍କ ସହ ଆଲୋଚନା ପାଇଁ ପ୍ରସ୍ତୁତ ଏବଂ ଆମେରିକା ସହ ସମ୍ପର୍କକୁ ପୁନଃସ୍ଥାପିତ କରିବାରେ ତାଙ୍କର କୌଣସି ଆପତ୍ତି ନାହିଁ, କିନ୍ତୁ ଏହା ସମ୍ପୂର୍ଣ୍ଣ ଭାବେ ଆମେରିକା ଉପରେ ନିର୍ଭର କରେ।
ଋଷିଆ-ୟୁକ୍ରେନ ଯୁଦ୍ଧ ହେତୁ ଆମେରିକା ଏବଂ ଋଷିଆ ମଧ୍ୟରେ ସମ୍ପର୍କକୁ ନେଇ ଅନେକ ତିକ୍ତତା ଦେଖାଦେଇଛି। ଆମେରିକା ଋଷିଆ ବିରୋଧରେ ଅନେକ ପ୍ରତିବନ୍ଧକ ଲଗାଇଛି। ପୁଟିନ ଅଭିନନ୍ଦନ ଜଣାଇବା ପରେ ସୂଚାଇ ଦେଇଛନ୍ତି ଯେ ସେ ଏହି ପ୍ରସଙ୍ଗରେ ଟ୍ରମ୍ପଙ୍କ ସହ କଥାବାର୍ତ୍ତା କରିବାକୁ ପ୍ରସ୍ତୁତ, କିନ୍ତୁ ଏଥିପାଇଁ ଆମେରିକାର ଆଭିମୁଖ୍ୟ ଜାଣିବା ଜରୁରୀ।
