ଚଣ୍ଡିଗଡ଼,୧୩।୯: ପଞ୍ଜାବରେ ଆମ ଆଦମୀ ପାର୍ଟି (ଏଏପି)ର ସରକାରରେ ଥିବା ଅର୍ଥମନ୍ତ୍ରୀ ହରପାଲ ସିଂ ଚିମା ଭାଜପା ଉପରେ ଏକ ବଡ଼ ଅଭିଯୋଗ କରିଛନ୍ତି। ହରପାଲ କହିଛନ୍ତି ଯେ, ଭାଜପା ଦ୍ୱାରା ପଞ୍ଜାବରେ ଅପରେଶନ୍ ଲୋଟସ୍ ପରିଚାଳିତ ହେବା ସହ ଏଏପି ବିଧାୟକଙ୍କୁ କିଣିବାକୁ ଚେଷ୍ଟା କରାଯାଉଛି। ଭାଜପା ପ୍ରତ୍ୟେକ ଏଏପି ବିଧାୟକଙ୍କୁ ୨୫କୋଟି ଟଙ୍କାର ଅଫର ପ୍ରଦାନ କରୁଛି ବୋଲି ସେ କହିଛନ୍ତି। ଏହାକୁ ନେଇ ଏଏପି ପଞ୍ଜାବ ମଙ୍ଗଳବାର ଟୁଇଟ କରି କହିଛି, ସିରିଏଲ୍ କିଲର ଭାଜପା ବର୍ତ୍ତମାନ ପଞ୍ଜାବରେ ନିଜର ଅପରେଶନ୍ ଲୋଟସ୍ ଚଳାଉଛି। ରାଜ୍ୟର ଏଏପି ବିଧାୟକମାନଙ୍କୁ ୨୫-୨୫ କୋଟି ଅଫର୍ ଦେଉଛି। କିନ୍ତୁ ଭାଜପା ଭୁଲି ଯାଉଛି ଯେ, ଏଏପିର ଜଣେ ବି ବିଧାୟକ ଏହି ଘୋଡ଼ାବେପାରରେ ସାମିଲ ହେବେ ନାହିଁ। ଦିଲ୍ଲୀ ଭଳି ପଞ୍ଜାପରେ ମଧ୍ୟ ଭାଜପାର ଅପରେଶନ୍ ଲୋଟସ୍ ବିଫଳ ହେବ ବୋଲି ସେ କହିଛନ୍ତି। ସୂଚନାଯୋଗ୍ୟ, ମଙ୍ଗଳବାର ଚଣ୍ଡିଗଡ଼ରେ ଏକ ଖବରଦାତା ସମ୍ମିଳନୀରେ ପଞ୍ଜାବ ଅର୍ଥମନ୍ତ୍ରୀ ହରପାଲ ଭାଜପା ଉପରେ ଅଭିଯୋଗ ଆଣିିଛନ୍ତି। ଏଏପି ବିଧାୟକଙ୍କୁ କିଣି ପଞ୍ଜାବରେ କ୍ଷମତାରେ ଥିବା ସରକାରଙ୍କୁ ଭାଙ୍ଗିବାକୁ ଉଦ୍ୟମ କରୁଛି ଭାଜପା। ପଞ୍ଜାବରେ ଅପରେଶନ୍ ଲୋଟସ୍ ପାଇଁ ଭାଜପା କେନ୍ଦ୍ରୀୟ ଏଜେନ୍ସି ସହିତ ଟଙ୍କାର ମଧ୍ୟ ବ୍ୟବହାର କରୁଛି। କେବଳ ଏତିକି ନୁହେଁ, ବିଧାୟକମାନଙ୍କୁ ବଡ଼ ପଦବୀର ମଧ୍ୟ ଭାଜପା ପ୍ରଲୋଭନ ଦେଖାଉଥିବା ହରପାଲ ଅଭିଯୋଗ କରିଛନ୍ତି।
