ଚଣ୍ଡିଗଡ଼,୧୧।୩: ପଞ୍ଜାବରେ ଆମ ଆଦମୀ ପାର୍ଟି(ଏଏପି)ର ବିପୁଳ ପରିମାଣରେ ବିଜୟ ପରେ ଏବେ ଭଗଓ୍ବନ୍ତ ମାନ ମୁଖ୍ୟମନ୍ତ୍ରୀ ପଦ ପାଇଁ ଶପଥ ନେବେ। ପଞ୍ଜାବର ମୁଖ୍ୟମନ୍ତ୍ରୀ ପ୍ରାର୍ଥୀ ଭଗଓ୍ବନ୍ତ ମାନ ମାର୍ଚ୍ଚ ୧୬ରେ ଶପଥ ଗ୍ରହଣ କରିବେ ବୋଲି ସୂଚନା ମିଳିଛି। ଏହାପୂର୍ବରୁ ମାର୍ଚ୍ଚ ୧୩ରେ ଏଏପି ସଂଜଯୋକ ଅରବିନ୍ଦ କେଜ୍ରିୱାଲ ଓ ଭାଗଓ୍ବନ୍ତ ମାନ ଅମୃତସରରେ ଏକ ରୋଡ ଶୋ’ କରିବେ। ଭଗଓ୍ବନ୍ତ ବର୍ତ୍ତମାନ ଦିଲ୍ଲୀରେ ଥିବା ବେଳେ ସେ ଶୁକ୍ରବାର ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ତାଙ୍କ ବାସଭବନରେ ଭେଟିଛନ୍ତି। ଏହି ଅବସରରେ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ ଏବଂ ଏଏପି ନେତା ରାଘବ ଚଡ୍ଡା ମଧ୍ୟ ଉପସ୍ଥିତ ଥିଲେ। ସାକ୍ଷାତକାର ପରେ ଅରବିନ୍ଦ କେଜ୍ରିୱାଲ ଟୁଇଟ କରି କହିଛନ୍ତି, ‘ମୋର ସାନଭାଇ ଭଗଓ୍ବନ୍ତ ମାନ ପଞ୍ଜାବର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବ’। ଶୁକ୍ରବାର ସେ ମୋ ଘରକୁ ଆସି ଶପଥ ଗ୍ରହଣର ନିମନ୍ତ୍ରଣ ଦେଇଛନ୍ତି। ଜଣେ ମୁଖ୍ୟମନ୍ତ୍ରୀ ଭାବେ ଭଗଓ୍ବନ୍ତ ପଞ୍ଜାବର ଜନସାଧାରଣଙ୍କ ସମସ୍ତ ଆଶା ପୂରଣ କରିବେ ବୋଲି କ୍ରେଜିଓ୍ବାଲ ବିଶ୍ୱାସ ପ୍ରକଟ କରିଛନ୍ତି।
