ଭଦ୍ରକ ଅଫିସ, ୮ା୮- ଦେଶବାସୀ କରୋନା ମହାମାରୀ କବଳିତ ହୋଇଥିବା ବେଳେ କେନ୍ଦ୍ର ସରକାର ଦରଦାମକୁ ନିୟନ୍ତ୍ରଣ କରୁନାହିଁ। ସରକାରୀ ଶିଳ୍ପ କଳ କାରଖାନାକୁ ବେପାରୀଙ୍କୁ ଟେକି ଦେଉଛି। ବ୍ୟାଙ୍କ, ରେଳ, ଉଡ଼ାଜାହାଜ ଓ ଜୀବନବୀମା ସବୁଠି ପୁଞ୍ଜି ପ୍ରତ୍ୟାହାର ଓ ଘରୋଇ କରଣର କାର୍ଯ୍ୟରେ ବ୍ୟସ୍ତ। ଦେଶରେ ସ୍କିମ ଶ୍ରମିକ ଆଶାକର୍ମୀ, ଅଙ୍ଗନୱାଡ଼ି କର୍ମୀ, ମଧ୍ୟାହ୍ନଭୋଜନ ପାଚିକା, ସେବିକା ମା’ ଭଉଣୀମାନେ ରାତିଦିନ ଖଟି ଦେଶସାରା କରୋନାରେ ଆକ୍ରାନ୍ତ ଦେଶବାସୀଙ୍କୁ ସେବା ଯୋଗାଇବାରେ ଲାଗିଛନ୍ତି। ହେଲେ ସେମାନଙ୍କ ଚାକିରି ଠିକା ମୂଲିଆ ଭଳି। ତାଙ୍କ ଚାକିରିର ସ୍ଥାୟୀତ୍ୱ ନାହିଁ, ବଜେଟ୍ରେ ସେମାନଙ୍କ ପାଇଁ ଅଧିକ ଅର୍ଥ ବ୍ୟୟବରାଦ ହୁଏ ନାହିଁ। ଏହି ବ୍ୟବସ୍ଥାକୁ ବିରୋଧ କରି ସ୍ଥାୟୀ ପଦବୀ ଘୋଷଣା ଦାବିରେ ଶୁକ୍ରବାର ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ସାମାଜିକ ଦୂରତା ରକ୍ଷା କରି ଆଶା, ଅଙ୍ଗନୱାଡ଼ି ପାଚିକା ସଂଘ ତରଫରୁ ସିଟୁ ନେତା ଦିବ୍ୟସିଂହ ନାୟକ, ଶାନ୍ତିଲତା ନାୟକ, ସରସ୍ବତୀ ହାତୀ, ସବିତା ବାନାର୍ଜୀ, ଗିରିଧାରୀ ନାଥ, ବିନୋଦ ସାହୁ ପ୍ରମୁଖ ବିକ୍ଷୋଭ ପ୍ରଦର୍ଶନ କରିଥିଲେ। ଏନେଇ ଏକ ଦାବିପତ୍ର ପ୍ରଧାନମନ୍ତ୍ରୀଙ୍କ ନିକଟକୁ ଜିଲା ପ୍ରଶାସନ ମାଧ୍ୟମରେ ପଠାଇଥିଲେ । ଆସନ୍ତା ୧୦ ତାରିଖରେ କେନ୍ଦ୍ରୀୟ ଟ୍ରେଡ଼ ୟୁନିଅନ ପକ୍ଷରୁ ଭାରତ ବଞ୍ଚାଓ ଦିବସରେ ଯୋଗ ଦେବା ପାଇଁ ଆହ୍ବାନ ଦେଇଥିଲେ।
