ନୂଆଦିଲ୍ଲୀ,୭ ।୧: କେନ୍ଦ୍ର ସରକାରଙ୍କ ନୂଆ କୃଷି ଆଇନକୁ ବିରୋଧ କରି ପ୍ରାୟ ୪୩ ଦିନ ହେବ ଆନ୍ଦୋଳନରେ ବସିଛନ୍ତି ବିଭିନ୍ନ ରାଜ୍ୟର କୃଷକ । ସରକାରଙ୍କ ସହ କେତେଥର କଥା ହୋଇଥିଲେ ବି ଏହାର କୌଣସି ସମାଧାନ ଏପର୍ଯ୍ୟନ୍ତ ବାହାରି ପାରି ନାହିଁ । ଫଳରେ ଗୁରୁବାର ଦିଲ୍ଲୀର ସବୁ ସୀମାରେ ଥିବା ପେରିଫେରାଲ ଏକ୍ସପ୍ରେସ୍ ୱେରେ କୃଷକମାନେ ଟ୍ରାକ୍ଟର ରାଲି ବାହାର କରିଛନ୍ତି । ଗାଜିପୁର ବର୍ଡରରୁ ପ୍ରଥମେ ଟ୍ରାକ୍ଟର ରାଲି ବାହାରିଛି । ପଞ୍ଜାବର କୃଷକ ନେତା ଓ ଭାରତୀୟ କୃଷକ ୟୁନିୟନର ମହାସଚିବ ହରିନ୍ଦର ସିଂ ଲଖୋୱାଲ ବୁଧବାର କହିଥିଲେ କି ପଞ୍ଜାବର କୃଷକ ନିଜ ନିଜ ଟ୍ରାକ୍ଟର ସହ ଆସୁଛନ୍ତି । ହରିୟାଣା, ଉତ୍ତରପ୍ରଦେଶ ଓ ରାଜସ୍ଥାନର କୃଷକ ମଧ୍ୟ ଏହି ରାଲିରେ ସାମିଲ ହେଉଛନ୍ତି । ବିଭିନ୍ନ ସ୍ଥାନରୁ ବାହାରିଥିବା ଏହି ଟ୍ରକ୍ଟର ରାଲି ଫଳରେ ସାଧାରଣ ଜନତାଙ୍କ ଯାତାୟତରେ ଅସୁବିଧା ସୃଷ୍ଟି ହୋଇଥିବା କୁହାଯାଉଛି ।