ବରଗଡ଼,୧୭।୪(ପ୍ରେମାନନ୍ଦ ଖମାରୀ):ବରଗଡ଼ ସହରକୁ ବିକଶିତ କରିବା ଲକ୍ଷ୍ୟ ନେଇ ପ୍ରଶାସନ ପକ୍ଷରୁ ଉଚ୍ଛେଦ ଅଭିଯାନ ଚାଲିଛି। ସହରର ବିଭିନ୍ନ ସ୍ଥାନରେ ପର୍ଯ୍ୟାୟକ୍ରମେ ଜବରଦଖଲ ଉଚ୍ଛେଦ କରାଯାଉଛି। ତେବେ ଟାଣଖରା, ଗୁଳୁଗୁଳି ଯୋଗୁ ଘରୁ ପଦାକୁ ବାହାରିବା ମୁସ୍କିଲ ହୋଇପଡୁ ଥିବାବେଳେ ସହରର ୱାର୍ଡ ନଂ-୧୪ ଅଧୀନ ଗଙ୍ଗାଧର ନଗର କେନାଲପଡ଼ା ବସ୍ତିକୁ ବର୍ତ୍ତମାନ ପ୍ରଶାସନର ଉଚ୍ଛେଦ ନିଷ୍ପତ୍ତିକୁ ନେଇ ଅସନ୍ତୋଷ ବଢ଼ିବାରେ ଲାଗିଛି। ଏହି କ୍ରମରେ ଗୁରୁବାର ବହୁଜନ ସମାଜ ପାର୍ଟି ନେତୃତ୍ୱରେ ପଡ଼ାର ପ୍ରଭାବିତ ଲୋକେ ବରଗଡ଼ ଜିଲାପାଳଙ୍କୁ ଫେରାଦ ହୋଇଥିଲେ। ଜିଲାପାଳ ଆଦିତ୍ୟ ଗୋୟଲଙ୍କ ସହିତ ଆଲୋଚନା କରି ବର୍ତ୍ତମାନ ଗ୍ରୀଷ୍ମ ପ୍ରବାହ ସାଙ୍ଗକୁ ଗୁଳୁଗୁଳି ଲାଗି ରହିଥିବାରୁ ଏଭଳି ସ୍ଥିତିରେ ଉଚ୍ଛେଦ ନ କରିବାକୁ ସେମାନେ ନିବେଦନ କରିଥିଲେ। ଏହା ସହିତ ଉଚ୍ଛେଦ ପୂର୍ବରୁ ସେମାନଙ୍କୁ ଗୃହ ନିର୍ମାଣ ପାଇଁ ବାସୋପଯୋଗୀ ଘରଡ଼ିହ ପ୍ରଦାନ ଏବଂ ସେହି ଜାଗା ଚିହ୍ନଟ କରିବାକୁ ପଡ଼ାବାସୀ ଦାବି କରିଥିଲେ। ଅନ୍ୟଥା ସେମାନେ ଘର ଖାଲି କରିବେ ନାହିଁ କିମ୍ବା ସେଠାରୁ ଆଉ ହଟିବେ ନାହିଁ ବୋଲି ଚେତାବନୀ ଦେଇଥିଲେ।
ଗତମାସ ଉକ୍ତ ପଡ଼ାକୁ ଉଚ୍ଛେଦ କରିବା ପାଇଁ ପୌର ପ୍ରଶାସନ ଅଣ୍ଟା ଭିଡ଼ିଥିଲା। ତେବେ ପଡ଼ାବାସୀଙ୍କ ବିରୋଧ ପରେ ଅଧାରୁ ଉଚ୍ଛେଦ ଅଟକି ରହିଥିଲା। ସେତେବେଳେ ମଧ୍ୟ ବହୁଜନ ସମାଜ ପାର୍ଟି ଜିଲାପାଳଙ୍କୁ ଫେରାଦ ହୋଇ ଉଚ୍ଛେଦ ପୂର୍ବରୁ ପ୍ରଭାବିତ ଲୋକଙ୍କୁ ଥଇଥାନ କରିବାକୁ ଦାବି କରିଥିଲା। ଅନ୍ୟପଟେ ଏପର୍ଯ୍ୟନ୍ତ ସେମାନଙ୍କୁ ଥଇଥାନ କରାଯାଇ ନ ଥିବାବେଳେ ବୁଧବାର ପୌର ପ୍ରଶାସନର କର୍ମଚାରୀମାନେ ଉକ୍ତ ପଡ଼ାକୁ ଆସି ଶୁକ୍ରବାର ସୁଦ୍ଧା ଘର ଖାଲି କରିବାକୁ ସୂଚନା ଦେଇଥିଲେ। ଏହାପରେ ପଡ଼ାବାସୀଙ୍କ ମଧ୍ୟରେ ପୁଣି ଅସନ୍ତୋଷର ତାତି ବୃଦ୍ଧି ପାଇଥିବାବେଳେ ବିହିତ ପଦକ୍ଷେପ ସକାଶେ ଜିଲାପାଳଙ୍କୁ ଫେରାଦ ହୋଇଥିଲେ। ବହୁଜନ ସମାଜ ପାର୍ଟିର ବରିଷ୍ଠ ନେତା ନାରାୟଣ ଭେସ୍ରା, ଜୟରାମ ବାଘଙ୍କ ନେତୃତ୍ୱରେ ପଡ଼ାବାସୀ ଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ। ଏତେ ଟାଣଖରା ସତ୍ତ୍ୱେ ଥଇଥାନ ନ କରି ପଡ଼ାବାସୀଙ୍କୁ ଉଚ୍ଛେଦ କରାଗଲେ ଆଗକୁ ଦୁର୍ବାର ଆନ୍ଦୋଳନ କରାଯିବ ବୋଲି ବହୁଜନ ସମାଜ ପାର୍ଟିର ବରିଷ୍ଠ ନେତା ଭେସ୍ରା ଚେତାବନୀ ଦେଇଛନ୍ତି।
Dharitri – Odisha’s No.1 Odia Daily
