କେନ୍ଦୁଝର, ୨୫ା୮(ସ୍ବ.ପ୍ର.)-କେନ୍ଦୁଝର ଜିଲା ବଣପାହାଡରେ ଏକଦା ବହୁ ଜାତିପ୍ରଜାତିର ପକ୍ଷୀ ଦେଖିବାକୁ ମିଳୁଥିଲେ ା ଜଙ୍ଗଲ କ୍ଷୟ, ପ୍ରଦୂଷଣ ଓ ଶିକାର ଯୋଗୁ ବହୁ ପକ୍ଷୀଙ୍କୁ ଆଉ ଦେଖିବାକୁ ମିଳୁନାହିଁ। ବନ ବିଭାଗ ପକ୍ଷରୁ ପଦକ୍ଷେପ ନିଆଯାଉଥିଲେ ମଧ୍ୟ ପକ୍ଷୀମାନଙ୍କ ସୁରକ୍ଷା କରାଯାଇ ପାରୁ ନ ଥିବାରୁ ପରିବେଶବିତ୍ମାନେ ଚିନ୍ତା ପ୍ରକଟ କରିଛନ୍ତି। ଏଭଳି ସୁରକ୍ଷା ଅଭାବରୁ ବାଦୁଡି ବଂଶ ଲୋପ ପାଇବାକୁ ବସିଛି ା ହେଲେ ବାଂଶପାଳ ବ୍ଲକ ତାରମାକାନ୍ତ ଗ୍ରାମର ବନବାସୀମାନେ ବାଦୁଡିର ସୁରକ୍ଷା ଲାଗି ଭିନ୍ନ ଉପାୟ ଆପଣେଇଛନ୍ତି। ଏହି ଗ୍ରାମରେ ପୂଜା ପାଉଛନ୍ତି ଗ୍ରାମଦେବୀ କଣ୍ଡେଇବିରା। ଏହି ଗ୍ରାମଦେବୀ ପରିସରରେ ରହିଛି ବହୁ ପୁରୁଣା ବଟବୃକ୍ଷ ା ବଟବୃକ୍ଷରେ ରହିଛନ୍ତି ଶହ ଶହ ବାଦୁଡି ା ଗ୍ରାମବାସୀଙ୍କ ବିଶ୍ୱାସ ଯେ, ବାଦୁଡିମାନେ ଗ୍ରାମଦେବୀଙ୍କ ଅଂଶ ବିଶେଷ ା ଏଣୁ ଗ୍ରାମବାସୀ ବାଦୁଡିଙ୍କର କ୍ଷତି କରନ୍ତି ନାହିଁ ବରଂ ବାହ୍ୟ ଶିକାରୀଙ୍କଠାରୁ ରକ୍ଷା କରିଥାନ୍ତି। ସ୍ଥାନୀୟ ବାସିନ୍ଦା ରାମଚନ୍ଦ୍ର ବେହେରା କୁହନ୍ତି, ଗ୍ରାମଦେବୀ ଉଭୟ ଗ୍ରାମବାସୀ ଓ ବାଦୁଡିର ସୁରକ୍ଷା କରୁଛନ୍ତି ା ପ୍ରାକୃତିକ ଦୈବି ଦୁର୍ବିପାକ ଆସିଲେ ସେମାନଙ୍କର କ୍ଷତି ହୁଏ ନାହିଁ ବୋଲି ସେମାନଙ୍କ ପ୍ରଗାଢ ବିଶ୍ୱାସ ରହିଛି। କାରଣ ଯାହା ବି ହେଉ ବାଦୁଡି ବଂଶ ରକ୍ଷା ଲାଗି ଗ୍ରାମବାସୀଙ୍କ ଏଭଳି ଉଦ୍ୟମ ନିଶ୍ଚିତ ସ୍ବାଗତଯୋଗ୍ୟ ା ଏଭଳି ଅନ୍ୟାନ୍ୟ ଅଞ୍ଚଳରେ ସୁରକ୍ଷା ପାଇଁ ବନ ବିଭାଗ ପକ୍ଷରୁ ଉଦ୍ୟମ କରିବା ଆବଶ୍ୟକ ବୋଲି ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ହରେକୃଷ୍ଣ ମହାନ୍ତ କହିଛନ୍ତି ା
