ନବରଙ୍ଗପୁର,୨୯।୫(ବି.ପ୍ର.): ସରକାରଙ୍କ ମୁଖ୍ୟ ମୌଳିକ ସୁବିଧା ସୁଯୋଗ ବ୍ୟବସ୍ଥା ଭିତରେ ପାନୀୟ ଜଳ ଯୋଗାଣ ରହିଛି। ତେବେ ନବରଙ୍ଗପୁର ଜିଲା ସଦର ମହକୁମ୍ମାରୁ ମାତ୍ର ୮ କିମି ଦୂରରେ ଥିବା ସାନ ମସିଗାଁ ପଞ୍ଚାୟତ ସଦରରେ ପାଇପ ଯୋଗେ ପାନୀୟ ଜଳ ବ୍ୟବସ୍ଥା ସ୍ବପ୍ନ ପାଲଟିଛି। ପାନୀୟ ଜଳ ଯୋଗାଣ ପାଇଁ ଟାଙ୍କି ନିର୍ମାଣ ହୋଇ ପାଇପ ବିଛା ଯାଇଛି। ତେବେ ଜନ ସାଧାରଣ ଟୋପାଏ ପାଣି ପାଇବାରୁ ବଞ୍ଚତ୍ତ ହେଉଛନ୍ତି। ଅଭିଯୋଗ ହେଉଛି ତଥାପି ବିଭାଗ ଏହାର ସମାଧାନ କରିବା ପରିବର୍ତ୍ତେ ରକ୍ଷଣାବେକ୍ଷଣ ଓ ଟାଙ୍କିକୁ ରଙ୍ଗ ଦେଇ ହାତ ଚିକ୍କଣ କରି ବସିଛି। ଏପଟେ ପାଣିପାଇଁ ଜନସାଧାରଣ ହନ୍ତସନ୍ତ ହେଉଛନ୍ତି।
ନବରଙ୍ଗପୁର ବ୍ଲକ ସାନ ମସିଗାଁ ପଞ୍ଚାୟତ ସଦର ମହକକୁମା ୪ଟି ୱାର୍ଡରେ ବିଭକ୍ତ ହୋଇଛି। ଜନସଂଖ୍ୟା ୫ ହଜାରରୁ ଉର୍ଦ୍ଧ ହେବ। ମାଝି ସାହି, ଉପରସାହି, ଆଦିବାସୀ ସାହି, ଚାଲାଣ ସାହି, ଗୌଡ଼ ସାହି, ତନ୍ତି ସାହି , ଇନ୍ଦ୍ରା କଲୋନୀ ପ୍ରମୁଖ ସାହି ରହିଛି। ୫ ହଜାର ଲୋକଙ୍କ ପାଇଁ ଗାଁରେ ରହିଛି ମାତ୍ର ୯ ଗୋଟି ନଳକୂପ। ସେଥି ମଧ୍ୟରୁ ୨ ଟି ନଳକୂପ ଅଚଳ ଅବସ୍ଥାରେ ରହିଛି। ଗାଁରେ ପାଇପ ପାଣି ଯୋଗାଇବା ପାଇଁ ଆଂଶିକ ଭାବେ ପାଇପ ବିଛା ଯାଇଛି। ତାହା ମଧ୍ୟ ଅତି ନିମ୍ନମାନର। ଅଧାଅଧିକ ପାଇପ ଫାଟି ଗଲାଣି। ଦୁଇଟି ପିଣ୍ଡି କରାଯାଇଛି। ପିଣ୍ଡିକୁ ମଧ୍ୟ ପାଣି ଆସୁନାହିଁ। ଗାଁ ଉପର ମୁଣ୍ଡରେ ବସୁନ୍ଧରା ଯୋଜନାରେ ପାଣି ମଟର ଓ ଟାଙ୍କି କରାଯାଇଛି। ପାଣି ଟାଙ୍କି ହୋଇ ୧୫ ବର୍ଷ ହେଲାଣି। ଟାଙ୍କିରୁ ଟୋପାଏ ପାଣି ଗାଁ ଲୋକେ ପାଇଲେ ନାହିଁ। ଟାଙ୍କି ଉପରେ ବଡ଼ବଡ଼ ଅକ୍ଷରରେ ଲେଖା ଯାଇଛି ପ୍ରତେକ ଘରକୁ ପାଣି। ଗାଁରେ ପାଇପ ପାଣି ଆସୁ ନ ଥିବା ବେଳେ ପ୍ରତେକ ଘରକୁ ପାନୀୟ ଜଳ ବ୍ୟବସ୍ଥା କଥା ସ୍ବପ୍ନ ହୋଇ ରହିଯାଇଛି। ଗାଁରେ ମାତ୍ର ୮ଟି ସଚଳ ନଳକୂପ ରହିଛି। ଜନସଂଖ୍ୟା ଦୃଷ୍ଟିରୁ ପାଣି ପାଇଁ ଗାଁରେ ବିଭିନ୍ନ ସମୟରେ ଲୋକେ ପାଟିତୁଣ୍ଡ ହେଉଛନ୍ତି। ଗୃହପାଳିତ ପ୍ରାଣୀଙ୍କ ପାଇଁ ପାଣିର ମଧ୍ୟ ଘୋର ଅଭାବ । ଗାଁ ନିକଟରେ ୨ଟି ପୋଖରୀ ରହିଛି। ଗୋଟିଏ ପୋଖରୀରେ ପାଣି ରହୁଥିବାରୁ ଗାଁ ଲୋକେ ଗାଧୋଇବା, ଶୌଚ ଓ ଗୃହପାଳିତ ଗାଈ, ଛେଳି ମେଣ୍ଢା ପାଇଁ ବ୍ୟବହାର କରୁଛନ୍ତି। ଗାଁରେ ସ୍ବଚ୍ଛ ଭାରତ ମିଶନ ନାଁରେ ପାଇଖାନା ନାହିଁ। କିନ୍ତୁ ବାହ୍ୟ ମଳ ମୁକ୍ତ ଗାଁ ଭାବେ ପ୍ରଶାସନ ପ୍ରଚାର କରୁଛି। ଏନେଇ ସରପଞ୍ଚ ପୁଷ୍ପଳତା ମାଝିଙ୍କୁ ପଚାରିବାରୁ ପାନୀୟ ଜଳ ସମସ୍ୟା ନେଇ ଜିଲାପାଳ, ସମିତି ବୈଠକ, ଓ ଜିଲା ଗ୍ରାମୀଣ ପାନୀୟ ଜଳ ଯୋଗାଣ ବିଭାଗକୁ ଅନେକ ଥର ଚିଠି କରି ଜଣାଇବା ସହ ଅଭିଯୋଗ ମଧ୍ୟ କରାଯାଇଛି। ୨୦ ବର୍ଷ ହେବ ପାଣି ସମସ୍ୟା ଗାଁର ସମାଧାନ ହେଉନାହିଁ। ପଞ୍ଚାୟତକୁ ଆସିଥିବା ଅନୁଦାନ ୫-ଟି ବିଦ୍ୟାଳୟ ପାଇଁ ନେଇଗଲେ। ଉକ୍ତ ଅନୁଦାନ ଥିଲେ ଜନସାଧାରଣଙ୍କ ମୌଳିକ ସୁବିଧା ପାଇଁ ଖର୍ଚ୍ଚ ହୋଇପାରନ୍ତା। କିଛି ନଳକୂପ ଖନନ ହୋଇପାରନ୍ତା ବୋଲି କହିଛନ୍ତି।
