ବେଙ୍ଗାଲୁରୁ,୨୭।୩: ବେଙ୍ଗାଲୁରୁ ଗ୍ରାମୀଣ ଜିଲାର ଟି. ବେଗୁରରେ ଥିବା ଶ୍ରୀ ସିଦ୍ଧାର୍ଥ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସେସ ଆଣ୍ଡ ରିସର୍ଚ୍ଚ ସେଣ୍ଟରରେ ବୁଧବାର ଏକ ଅଜବ ଏବଂ ଲଜ୍ଜାଜନକ ଘଟଣା ଘଟିଛି। ପ୍ରଫେସର କ୍ଲାସ୍ରୁମ୍ରେ ଜଣେ ଛାତ୍ରୀଙ୍କୁ ପ୍ରେମ ପ୍ରସ୍ତାବ ଦେଇଥିବା ଘଟଣା ସମଗ୍ର କ୍ୟାମ୍ପସରେ ହଇଚଇ ସୃଷ୍ଟି କରିଛି।
ମୋବାଇଲ ଫୋନରେ ଛାତ୍ରୀଛାତ୍ରଙ୍କ ଦ୍ୱାରା ରେକର୍ଡ କରାଯାଇଥିବା ଭିଡିଓ ସୋସିଆଲ ମିଡିଆରେ ଶୀଘ୍ର ଭାଇରାଲ ହୋଇଥିଲା, ଯାହା ଘଟଣାଟିକୁ ଲୋକଲୋଚନକୁ ଆଣିଥିଲା। ଘଟଣାଟି ସେତେବେଳେ ଆରମ୍ଭ ହୋଇଥିଲା ଯେତେବେଳେ ପ୍ରଫେସର ମହମ୍ମଦ କ୍ଲାସ୍ରୁମ୍ରେ ଛାତ୍ରୀଛାତ୍ରଙ୍କୁ ସମ୍ବୋଧିତ କରିବା ସମୟରେ ଦାବି କରିଥିଲେ ଯେ ତାଙ୍କ ବ୍ୟାଚର ଜଣେ ଛାତ୍ରୀ ତାଙ୍କୁ ପ୍ରେମ ପ୍ରସ୍ତାବ ଦେଇଥିଲେ ଏବଂ ସେ ମଧ୍ୟ ତାଙ୍କୁ ଭଲ ପାଉଛନ୍ତି। ଖୁସି ମନାଇବା ପାଇଁ, ସେ ସମଗ୍ର ଶ୍ରେଣୀକୁ ଚକୋଲେଟ ମଧ୍ୟ ବାଣ୍ଟଥିଲେ।
ଭାଇରାଲ ଭିଡିଓରେ ପ୍ରଫେସର କହୁଥିବା ଶୁଣାଯାଉଛି କି “ତୁମେ କ’ଣ କହି ନ ଥିଲ ? ‘ମୁଁ ତୁମକୁ ଭଲ ପାଏ ବୋଲି” ଛାତ୍ରୀଜଣଙ୍କ ତୁରନ୍ତ ପ୍ରତିବାଦ କରି ଦାବି କରିଥିଲେ ଯେ ସେ ଏପରି କିଛି କହିନାହାଁନ୍ତି। ସେ ପ୍ରଫେସରଙ୍କୁ ପଚାରିଥିଲେ ଯେ ଏହି ଘଟଣା କେବେ ଘଟିଥିଲା ଏବଂ ଏହି ମାମଲାକୁ ପ୍ରିନ୍ସିପାଲଙ୍କ ଦୃଷ୍ଟି ଆକର୍ଷଣ କରିବାକୁ ଦାବି କରିଥିଲେ। ପ୍ରଫେସର ସିସିଟିଭି ଫୁଟେଜ ଉଦ୍ଧୃତ କରିଥିଲେ, ଯାହାକୁ ଛାତ୍ରୀ ଜଣକ ତୁରନ୍ତ ଦେଖାଇବାକୁ ଦାବି କରିଥିଲେ।
ପ୍ରଫେସର ଶ୍ରେଣୀଗୃହ ଛାଡି ଚାଲିଯାଉଥିଲେ ଏବଂ ତା’ ପରଦିନ ଏହି ବିଷୟରେ ଆଲୋଚନା କରିବେ କହିଥିଲେ। କିନ୍ତୁ ସେ ଯିବା ମାତ୍ରେ ଛାତ୍ରୀ ଜଣଙ୍କ କ୍ରୋଧିତ ହୋଇ ପ୍ରଫେସରଙ୍କୁ ଚପଲରେ ମାଡ଼ ମାରିଥିବା ଅଭିଯୋଗ ହୋଇଛି। ଅନ୍ୟ ଛାତ୍ରୀଛାତ୍ରମାନେ ଏଥିରେ ସାମିଲ ହୋଇ ପ୍ରଫେସରଙ୍କୁ ଗାଳିଗୁଲଜ ଏବଂ ଆକ୍ରମଣ କରିଥିଲେ। କିଛି ମିନିଟ ମଧ୍ୟରେ, ସମଗ୍ର କ୍ୟାମ୍ପସରେ ଶାନ୍ତ ଶ୍ରେଣୀଗୃହ ପରିବେଶ ରଣକ୍ଷେତ୍ରରେ ପରିଣତ ହୋଇଯାଇଥିଲା।
ନେଲାମଙ୍ଗଳା ଗ୍ରାମୀଣ ପୋଲିସର ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି ଯେ ଛାତ୍ରୀ କିମ୍ବା ପ୍ରଫେସରଙ୍କ ଦ୍ୱାରା ଏପର୍ଯ୍ୟନ୍ତ କୌଣସି ଅଭିଯୋଗ ଦାଖଲ ହୋଇନାହିଁ। ପୋଲିସ ଏହି ଘଟଣାର ତଦନ୍ତ କରୁଛି ଏବଂ ଭାଇରାଲ ଭିଡିଓ ଆଧାରରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ବିଚାର କରୁଛି।
