ବମ୍ବେ: ଭାରତରେ ଲଗାତାର ଭାବେ ବୃଦ୍ଧି ପାଇବାରେ ଲାଗିଛି କରୋନା ସଂକ୍ରମଣ। ତଦନୁଯାୟୀ ଡାକ୍ତରଖାନାରେ ଭେଣ୍ଟିଲେଟର, ଅକ୍ସିଜେନ ସିଲିଣ୍ଡର ଏବଂ ଔଷଧ ଆଦିର ଅଭାବ ଦେଖାଦେଇଛି। ବିପଦର ଏଭଳି ପରିସ୍ଥିତିରେ ମନୋରଞ୍ଜନଜଗତ ସହ ଜଡ଼ିତ ଅନେକ କଳାକାର ସହାୟତା ପାଇଁ ଆଗେଇ ଆସୁଛନ୍ତି। ଏହି କ୍ରମରେ ଏବେ ପ୍ରିୟଙ୍କା ଚୋପ୍ରା ଜୋନାସ ଏବଂ ସ୍ବାମୀ ନିକ୍ ଜୋନାସ ଭାରତକୁ ସାହାଯ୍ୟର ହାତ ବଢ଼ାଇଛନ୍ତି। ଉଭୟ ନିଜର ଫାଉଣ୍ଡେଶନ ଜରିଆରେ ପାଣ୍ଠି ସଂଗ୍ରହ କରୁଛନ୍ତି।
ପ୍ରିୟଙ୍କା ନିଜର ସୋସିଆଲ ମିଡିଆରେ ଭାରତକୁ ସହାୟତା କରିବାକୁ ଅପିଲ କରୁଛନ୍ତି। କୋଭିଡ ବିରୋଧରେ ଯୁଦ୍ଧ ପାଇଁ ନିଜର ଯୋଗଦାନ ଦେବାକୁ ଅନୁରୋଧ କରୁଛନ୍ତି। ଇତିମଧ୍ୟରେ ସେ ୩.୮୪ କୋଟି ଟଙ୍କା ଜମା କରିସାରିଛନ୍ତି। ହେଲେ ସେ ୭,୪୦,୯୫,୫୦୩ କୋଟି ଟଙ୍କା ଦାନ ଦେବାକୁ ଲକ୍ଷ୍ୟ ରଖିଥିବା ଜଣାପଡ଼ିଛି।
ଫଲୋଅର୍ସମାନଙ୍କ ପାଇଁ ଏକ ବାର୍ତ୍ତାରେ ପ୍ରିୟଙ୍କା କହିଛନ୍ତି, ଭାରତ ପାଇଁ ଏକଜୁଟ ହେବାକୁ ପଡ଼ିବ। ସମସ୍ତଙ୍କର ସହଯୋଗ ଏବଂ ଦାନ ପାଇଁ ଧନ୍ୟବାଦ। ଏହା କୋଭିଡ ସହ ଯୁଦ୍ଧରେ ବହୁମୂଲ୍ୟ ଭୂମିକା ନିର୍ବାହ କରିବ। ଏବେ ବି ବହୁତ କିଛି କରିବା ବାକି ଅଛି ବୋଲି ସେ କହିଛନ୍ତି।
ପୂର୍ବରୁ ସେ ଓ ନିକ୍ ନିଜସ୍ବ ଭାବେ ଦାନ କରିସାରିଛନ୍ତି। ଅନ୍ୟମାନେ ମଧ୍ୟ ସେହିଭଳି ଦାନ କରନ୍ତୁ। ମହାମାରୀ କେତେ ଶୀଘ୍ର ବ୍ୟାପିପାରେ ତାହା ସମସ୍ତେ ଦେଖିଛୁ। ଯେତେ ପର୍ଯ୍ୟନ୍ତୁ ଗୋଟିଏ ସଂକ୍ରମିତ ଅଛନ୍ତି, ସେତେ ପର୍ଯ୍ୟନ୍ତ କେହି ସୁରକ୍ଷିତ ନାହାନ୍ତି। ବହୁତ ଲୋକ ଭିନ୍ନ ଭିନ୍ନ ପ୍ରକାରେ ସହାୟତା ପାଇଁ ଆଗକୁ ଆସୁଛନ୍ତି। ଏହା ବେଶ ସ୍ବାଗତଯୋଗ୍ୟ। ଆମକୁ ଏକଜୁଟ ହୋଇ ଏହି ଭାଇରସକୁ ହରାଇବାର ଆବଶ୍ୟକତା ଅଛି ବୋଲି ପିସି କହିଛନ୍ତି।
