ରାଉରକେଲା ଅଫିସ,୧୨।୫: ରାଉରକେଲା ଶିକ୍ଷା ଜିଲାରେ ବେସରକାରୀ ସ୍କୁଲ ସଂଖ୍ୟା ଦିନକୁ ଦିନ ବଢିବାରେ ଲାଗିଛି। ଉକ୍ତ ସ୍କୁଲ ପରିଚାଳନା ପାଇଁ ସରକାରଙ୍କ ନିର୍ଦ୍ଧାରିତ ୫୧ଟି ମାନଦଣ୍ଡ ରହିଛି। ତେବେ ଏହି ମାନଦଣ୍ଡ ଅଭାବରୁ ଅନେକ ସ୍କୁଲକୁ ଗତ ଦୁଇବର୍ଷ ହେଲା ଏନ୍ଓସି ମିଳିନାହିଁ। ଏହାସତ୍ତ୍ୱେ ଉକ୍ତ ସ୍କୁଲଗୁଡିକ କିଭଳି ଚାଲିଛି ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ବିଭାଗୀୟ ସୂଚନା ଅନୁସାରେ, ରାଉରକେଲା ଶିକ୍ଷା ବିଭାଗ ଅଧିନ ରାଉରକେଲା ଓ ବିଶ୍ରା ଅଞ୍ଚଳରେ ମୋଟ ୩୧୭ଟି ସ୍କୁଲ ରହିଥିବା ବେଳେ ସେଥିମଧ୍ୟରୁ ୧୨୪ଟି ହେଉଛି ବେସରକାରୀ ସ୍କୁଲ। ୨୦୧୯-୨୦ ଶିକ୍ଷାବର୍ଷରେ ଏହିସବୁ ବେସରକାରୀ ସ୍କୁଲରେ ପ୍ରାୟ ୨୩ ହଜାର ପିଲା ରହିଥିବାବେଳେ ଚଳିତବର୍ଷ ୧୦ହଜାର ବୃଦ୍ଧି ଘଟିଛି। ତେବେ ଏହି ଶିକ୍ଷା ଜିଲାରେ ଥିବା ମୋଟ୍ ବେସରକାରୀ ସ୍କୁଲର ୪୦ପ୍ରତିଶତ ବିନା ଏନ୍ଓସିରେ ଚାଲୁଛି। ସରକାରଙ୍କ ମାନଦଣ୍ଡ ପୂରଣ କରୁ ନ ଥିବା ବେସରକାରୀ ସ୍କୁଲ ଗୁଡିକ କିଭଳି ବିନା ଏନ୍ଓସିରେ ଚାଲିଛି ସେ ନେଇ ବୁଦ୍ଧିଜୀବୀମାନେ ପ୍ରଶ୍ନ କରିଛନ୍ତି। ଏ ନେଇ ବିଶ୍ରା ସହକାରୀ ଶିକ୍ଷାଧିକାରୀ କିଶୋର ଚନ୍ଦ୍ର ଦାସଙ୍କୁ ପଚାରିବାରୁ ରାଉରକେଲା ଏମ୍ଆଇଏସ୍ ଏ ନେଇ ସବିଶେଷ ତଥ୍ୟ ରଖିପାରିବେ ବୋଲି କହିଥିଲେ। ଏ ସମ୍ପର୍କରେ ରାଉରକେଲା ଏମ୍ଆଇଏସ୍ ମନୋଜ କୁମାର ଆଚାର୍ଯ୍ୟ କୁହନ୍ତି, ଏନଓସି ନ ଥିବା ବେସରକାରୀ ସ୍କୁଲମାନଙ୍କୁ ୨ବର୍ଷ ହେଲା ବିଭାଗ ପକ୍ଷରୁ ନୋଟିସ ଜାରି କରାଯାଉଛି। ନୋଟିସ ପାଇ ବାରମ୍ବାର ଏନ୍ଓସି ପାଇଁ ସେମାନେ ଆବେଦନ କରୁଛନ୍ତି। ଆଗକୁ ଏ ଦିଗରେ ବିହିତ ପଦକ୍ଷେପ ନିଆଯିବ। ୨୦୨୩ ଶିକ୍ଷା ବର୍ଷରେ ସରକାରୀ ସ୍କୁଲରେ ପିଲା ସଂଖ୍ୟା ୨୫ ପ୍ରତିଶତ ବଢିଛି। ସରକାରୀ ସ୍କୁଲ ପ୍ରତି ପିଲାଙ୍କ ଆଗ୍ରହ ବୃଦ୍ଧି ସକାଶେ ତୃଣମୂଳ ସ୍ତରରେ ବିହିତ ପଦକ୍ଷେପ ଗ୍ରହଣ କରାଯିବ ବୋଲି ଆଚାର୍ଯ୍ୟ କହିଥିଲେ।
