ପିପିଲି,୨୨।୧୧(ସ୍ବ.ପ୍ର.): ପୁରୀ ବାସେଳି ସାହି ଥାନା ହାଜତ ମୃତ୍ୟୁ ଅଭିଯୋଗକୁ ନେଇ ଚର୍ଚ୍ଚା ଥମି ନ ଥିବାବେଳେ ଜିଲାରେ ପୁଣି ଏକ ହାଜତ ନିର୍ଯାତନା ଅଭିଯୋଗ ଆସିଛି। ପିପିଲି ଥାନା ହାଜତରେ ପୋଲିସ ମାଡ଼ରେ ୫ଜଣ ଅଭିଯୁକ୍ତ ଗୁରୁତର ହୋଇଛନ୍ତି। ସେମାନେ ଏବେ କଟକ ଶ୍ରୀରାମଚନ୍ଦ୍ର ଭଞ୍ଜ(ଏସ୍ସିବି) ମେଡିକାଲରେ ଚିକିତ୍ସାଧୀନ ଅଛନ୍ତି। ସେମାନେ ହେଲେ ପିପିଲି ପାୈରାଞ୍ଚଳ ଭବାନୀପୁରର ହାପିଜ୍ ଖାଁ (୨୫), ପିପିଲି ସୁଲ୍ତାନ ନଗରର ପ୍ରତାପ କୁମାର ବେହେରା(୨୩), ଜୟପୁର ଶାସନ ଗ୍ରାମର ଜୁମା ଓରଫ ମହମ୍ମଦ ତାଫିକ୍ (୧୮), ସାତଶଙ୍ଖ କଲୋନୀର ଜଗା ଓରଫ ଜଗନ୍ନାଥ ପୁଷ୍ପାଳକ (୧୯), ତେଇଶିପୁର କାଙ୍କନଡ଼ୁଆର ଧରଣୀଧର ବେହେରା(୨୪)। ପୋଲିସ ବର୍ବରତାର ସୀମା ଟପିଯାଇ ମାଡ଼ ମାରିବା ସହ କ୍ଷତବିକ୍ଷତ କରିପକାଇଛି ବୋଲି ଅଭିଯୁକ୍ତଙ୍କ ପରିବାର ପକ୍ଷରୁ ଅଭିଯୋଗ କରାଯାଇଛି। ଏଭଳି ଘଟଣା ଜଣାପଡ଼ିବା ପରେ ରାଜ୍ୟ ପୋଲିସ ପକ୍ଷରୁ ଶନିବାର ଘଟଣାର ଡିଆଇଜିସ୍ତରୀୟ ତଦନ୍ତ ନିର୍ଦ୍ଦେଶ ଦିଆଯାଇଥିବାବେଳେ ପିପିଲି ଥାନା ଅଧିକାରୀ ଗୌରାଙ୍ଗ ଚରଣ ପୃଷ୍ଟି ଏଭଳି ଅଭିଯୋଗକୁ ଖଣ୍ଡନ କରିବା ସହ ଭିତ୍ତିହୀନ ବୋଲି କହିଛନ୍ତି। ଏଭଳିସ୍ଥିତିରେ ପୋଲିସର କାର୍ଯ୍ୟାନୁଷ୍ଠାନ ସନ୍ଦେହ ଘେରକୁ ଚାଲିଆସିଛି। ଅପରପକ୍ଷରେ ପିପିଲି ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନ ପ୍ରତିବାଦରେ ଶନିବାର ସନ୍ଧ୍ୟାରେ କଂଗ୍ରେସ ପକ୍ଷରୁ ପିପିଲି ଥାନା ସମ୍ମୁଖରେ ଧାରଣା ଦିଆଯାଇଛି।
ସୂଚନା ମୁତାବକ, ପିପିଲି ଶିଶୁ ଉଦ୍ୟାନ ନିକଟରେ ଗତ ୧୩ ତାରିଖରେ ପୋଲିସ ଇନଫର୍ମର ସନ୍ଦେହରେ ଭବାନୀପୁରର ସାଜିଦ ହୁସେନଙ୍କୁ କେତେଜଣ ଦୁର୍ବୃତ୍ତ ଗୋଡ଼ାଇ ଗୋଡ଼ାଇ କଟୁରିରେ ଆକ୍ରମଣ କରିଥିଲେ। ଏନେଇ ସାଜିଦ୍ଙ୍କ ଭାଇ ଜାହିଦ ହୁସେନଙ୍କ ଅଭିଯୋଗକ୍ରମେ ପୋଲିସ ଆଇପିସି ଦଫା ୧୪୭/୧୪୮/ ୩୪୧/୩୨୬ /୩୦୭/୧୨୦(ବି)/୧୪୯ ଏବଂ ୨୫/୨୭ ଆମର୍ସ ଆକ୍ଟରେ ଏକ ମାମଲା (ନଂ.୩୬୭/୨୦) ରୁଜୁକରି ୬ଜଣଙ୍କୁ ଗିରଫ କରି ୧୯ ତାରିଖରେ କୋର୍ଟଚାଲାଣ କରିଥିଲା। ଜାମିନ ନାମଞ୍ଜୁର ପରେ ଏମାନଙ୍କୁ ନିମାପଡ଼ା ଜେଲକୁ ପଠାଇ ଦିଆଯାଇଥିଲା। ଅଭିଯୁକ୍ତମାନଙ୍କ ସ୍ବାସ୍ଥ୍ୟାବସ୍ଥା ଭଲ ନ ଥିବା ଦେଖି ପୋଲିସ ସହାୟତାରେ ଜେଲର ସନ୍ତୋଷିନୀ ଦାସ ଚିକିତ୍ସା ପାଇଁ ସେମାନଙ୍କୁ ନିମାପଡ଼ା ମେଡିକାଲରେ ଭର୍ତ୍ତି କରିଥିଲେ। ଏମାନଙ୍କ ମଧ୍ୟରୁ ୫ଜଣଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ଏସ୍ସିବି ମେଡିକାଲକୁ ସ୍ଥାନାନ୍ତର କରାଯାଇଛି। ଅନ୍ୟ ଜଣେ ଅଭିଯୁକ୍ତ ରାଜୁଙ୍କୁ ଜେଲରେ ଚିକିତ୍ସା କରାଯାଉଛି ବୋଲି ଜେଲର ଦାସ କହିଛନ୍ତି। ଅନ୍ୟପଟେ ପୋଲିସ ମାଡ଼ରେ ଅଭିଯୁକ୍ତମାନେ ଗୁରୁତର ହୋଇଥିବା ସେମାନଙ୍କ ସମ୍ପର୍କୀୟ ଅଭିଯୋଗ କରିଛନ୍ତି। ଏପରି କି ସେମାନେ କେଉଁଠି ଏବଂ କିଭଳି ଅବସ୍ଥାରେ ଚିକିତ୍ସିତ ହେଉଛନ୍ତି ସେନେଇ ପୋଲିସ କୌଣସି ସୂଚନା ଦେଉନାହିଁ ବୋଲି କହିଛନ୍ତି। ଏ ସମ୍ପର୍କରେ ଥାନା ଅଧିକାରୀ ପୃଷ୍ଟି କହିଛନ୍ତି, ମଙ୍ଗଳପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଅଭିଯୁକ୍ତମାନଙ୍କ କୋଭିଡ୍ ପରୀକ୍ଷା କରାଯାଇ କୋର୍ଟରେ ହାଜର କରାଯାଇଥିଲା। ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତମାନଙ୍କୁ ନିମାପଡା ଜେଲକୁ ପଠାଯାଇଥିଲା।
ପିପିଲି-ଡେଲାଙ୍ଗର କଂଗ୍ରେସ ନେତ୍ରୀ ନିରୁପମା ପାତ୍ରଙ୍କ ନେତୃତ୍ୱରେ ବହୁ ମହିଳା ପୁରୁଷ,ଅଭିଯୁକ୍ତଙ୍କ ପରିବାର ସଦସ୍ୟ ଓ କଂଗ୍ରେସ କର୍ମୀମାନେ ଧାରଣାରେ ସାମିଲ ହୋଇ ପିପିଲି ପୋଲିସ ବିରୋଧରେ ନାରାବାଜି କରିଛନ୍ତି। ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନ ବିରୋଧରେ ବର୍ଷିବା ସହ ପୋଲିସର ଏଭଳି ବର୍ବରତାକୁ ଘୋର ନିନ୍ଦା କରିଛନ୍ତି। ଏଥିସହିତ ତଦନ୍ତକାରୀ ଅଧିକାରୀଙ୍କ ବିରୋଧରେ କଂଗ୍ରେସ ନେତ୍ରୀ ନିରୁପମା ପାତ୍ର କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଏଥିସହ ଅଭିଯୁକ୍ତ ଗୁରୁତରମାନେ ଏବେ କଟକ ଏସ୍ସିବି ମେଡିକାଲରେ କେଉଁ ଅବସ୍ଥାରେ ରଖାଯାଇ ଚିକିତ୍ସା କରାଯାଉଛି ତାହାର ସାର୍ବଜନୀନ କରାଯାଇ ପରିବାର ସଦସ୍ୟଙ୍କ ସହ ସକ୍ଷାତ କରାଯାଉ ବୋଲି ଦାବି କରିଛନ୍ତି।
