ମୁମ୍ୱାଇ,୧୬।୬: ମହାରାଷ୍ଟ୍ରର ପୂର୍ୱତନ ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେଙ୍କ ନେତୃତ୍ୱାଧୀନ ଶିବସେନା(ୟୁବିଟି) ପୁଣିଥରେ ଭାଙ୍ଗିପାରେ ବୋଲି ଚର୍ଚ୍ଚା ହେଉଛି। ୧୪ରୁ ୧୬ ଜଣ ବିଧାୟକ ଏବଂ ୭ ଜଣ ଏମ୍ପି ଦଳ ଛାଡ଼ିବାକୁ ପ୍ରସ୍ତୁତ ହେଉଥିବା ସୂତ୍ରରୁ ଜଣାପଡ଼ିଛି। ଆଗାମୀ ୬/୭ ଦିନ ମଧ୍ୟରେ ଦଳ ଭାଙ୍ଗିପାରେ। ଏହି ଚର୍ଚ୍ଚା ଯଦି ବାସ୍ତବ ରୂପ ନିଏ, ତେବେ ଉଦ୍ଧବଙ୍କୁ ଆଉ ଏକ ବଡ଼ ଝଟକା ହେବ। ୨୦୨୨ରେ ଏକନାଥ ଶିନ୍ଦେଙ୍କ ନେତୃତ୍ୱରେ ଶିବସେନାର ଗୋଟିଏ ଗୋଷ୍ଠୀ ଦଳରୁ ବାହାରିଯିବାରୁ ମହାରାଷ୍ଟ୍ରର ରାଜନୈତିକ ସମୀକରଣ ବଦଳିଯାଇଥିଲା। ଏବେ ଶିବସେନା(ୟୁବିଟି)ରୁ ସାଂସଦମାନଙ୍କୁ ଅନ୍ୟ ଦଳକୁ ନେଇଯିବା ପାଇଁ ଉଦ୍ୟମ ଚାଲିଥିବାବେଳେ ଏକନାଥ ଶିନ୍ଦେଙ୍କ ନେତୃତ୍ୱ ଉପରେ ବିଶ୍ୱାସ ରଖୁଥିବା ଯେକୌଣସି ବ୍ୟକ୍ତିଙ୍କ ପାଇଁ ଦଳର ଦ୍ୱାର ଖୋଲା ରହିଛି ବୋଲି ମଙ୍ଗଳବାର ଶିବସେନା ନେତା ପ୍ରତାପ ସରନାଏକ କହିଛନ୍ତି।
ଶିବସେନା(ୟୁବିଟି) ଏମ୍ପି ସଞ୍ଜୟ ଦେଶମୁଖ ସୋମବାର କେନ୍ଦ୍ରମନ୍ତ୍ରୀ ତଥା ଶିନ୍ଦେଙ୍କ ନେତୃତ୍ୱାଧୀନ ଶିବସେନାର ନେତା ପ୍ରତାପରାଓ ଯାଦବଙ୍କୁ ଭେଟିଥିଲେ। ଏହାର ଦିନକ ପୂର୍ୱରୁ ଉଦ୍ଧବ ଡାକିଥିବା ବୈଠକରେ ଶିବସେନା (ୟୁବିଟି)ର ୯ ଜଣ ଲୋକ ସଭା ସଦସ୍ୟଙ୍କ ମଧ୍ୟରୁ ମାତ୍ର ୪ ଜଣ ଯୋଗ ଦେଇଥିଲେ। ଯେଉଁମାନେ ଶିବସେନାର ପ୍ରତିଷ୍ଠାତା ବାଲ୍ ଠାକ୍ରେଙ୍କ ଆଦର୍ଶ ଏବଂ ଉପମୁଖ୍ୟମନ୍ତ୍ରୀ ଶିନ୍ଦେଙ୍କ ନେତୃତ୍ୱ ଉପରେ ବିଶ୍ୱାସ କରନ୍ତି, ସେମାନଙ୍କୁ ଦଳରେ ସ୍ୱାଗତ କରାଯିବ। ଆଗାମୀ ଦିନରେ ଯଦି ସେମାନେ ଏକନାଥ ଶିନ୍ଦେଙ୍କ ଦଳରେ ସାମିଲ ହେବାକୁ ଚାହାନ୍ତି, ତେବେ ସେମାନଙ୍କୁ ପ୍ରାଥମିକତା ଦିଆଯିବ ବୋଲି ସରନାଏକ କହିଛନ୍ତି।
ଯେତେବେଳେ ଆମ ଦିନ ଆସିବ, ଦଳ କିପରି ଭାଙ୍ଗେ, ତାହା ଦେଖାଇଦେବୁ ବୋଲି ଦଳ ଭାଙ୍ଗିବା ଚର୍ଚ୍ଚାକୁ ନେଇ ଶିବସେନା(ୟୁବିଟି) ନେତା ସଞ୍ଜୟ ରାଉତ କହିଛନ୍ତି। ଦଳର କେତେଜଣ ଲୋକ ସଭା ସଦସ୍ୟ ଭାଜପା ନେତୃତ୍ୱାଧୀନ ଏନ୍ଟିଏକୁ ଯିବା କଳ୍ପନାଜଳ୍ପନାକୁ ରାଉତ ଖଣ୍ଡନ କରିଛନ୍ତି। ଦଳରେ ଏବେ କୌଣସି ସଙ୍କଟ ନାହିଁ। ଯଦି କୌଣସି ସଙ୍କଟ ଆସେ ତାହାର ସମାଧାନ କରାଯିବ ବୋଲି ପାର୍ଲାମେଣ୍ଟ ହାଉସ୍ କମ୍ପ୍ଲେକ୍ସଠାରେ ରାଉତ ଖବରଦାତାମାନଙ୍କୁ କହିଛନ୍ତି।
