ସୋନପୁର,୧୯।୮(ନି.ପ୍ର.):ସମାଜରୁ କୁସଂସ୍କାର ଏବେ ବି ଦୂର ହୋଇନି। ରୋଗ ଭଲ ନ ହେଲେ ଗ୍ରାମାଞ୍ଚଳରେ ଜାତିଭାଇଙ୍କ ସାମାଜିକ ବାସନ୍ଦର ଭୟ ରହୁଛି। ଏଭଳି ବାସନ୍ଦ ଭୟରେ ଜଣେ ରୋଗଣା ବୃଦ୍ଧାଙ୍କୁ ମହାନଦୀ କୂଳ ଶ୍ମଶାନରେ ଏକୁଟିଆ ରହିବାକୁ ପଡ଼ିଥିଲା। ଘଟଣାଟି ପ୍ରଚାରିତ ହେବା ପରେ ସମ୍ପୃକ୍ତା ମହିଳାଙ୍କୁ ଏବେ ସୁବର୍ଣ୍ଣପୁର ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।
ସୁବର୍ଣ୍ଣପୁର ଜିଲା ଉଲୁଣ୍ଡା ବ୍ଲକ ମହଦା ଗ୍ରାମର ସ୍ବର୍ଗତ ରାମ ସାହୁଙ୍କ ସ୍ତ୍ରୀ ଚଞ୍ଚଳା(୫୫)। ଚଞ୍ଚଳାଙ୍କର ଗୋଟିଏ ଝିଅ ଓ ପୁଅ। ମଧୁମେହ ରୋଗ କାରଣରୁ ଗତ ୪ବର୍ଷ ହେବ ଚଞ୍ଚଳାଙ୍କ ଦେହ ଭଲ ରହୁନି। ଅର୍ଥାଭାବ ଯୋଗୁ ଠିକ୍ ଭାବେ ଚିକିତ୍ସିତ ହୋଇ ପାରୁ ନ ଥିଲେ। ଏଭଳି ସମୟରେ ତାଙ୍କ ବାମଗୋଡ଼ରେ ୩ମାସ ତଳେ ଘା ହୋଇଥିଲା। ପରିବାର ଲୋକେ ଡାକ୍ତରଙ୍କୁ ଦେଖାଇ ଔଷଧ ଦେଇଥିଲେ। ତେବେ ମଧୁମେହ ନିୟନ୍ତ୍ରଣରେ ରହୁ ନ ଥିବାରୁ ଚଞ୍ଚଳାଙ୍କ ଘା ଶୁଖି ନ ଥିଲା। କିଛିଦିନ ହେବ ଗୋଡ଼ରେ ପୋକ ହୋଇଯାଇଥିଲା। ଜାତି ସମାଜର ଲୋକେ ନାକ ଟେକିଲେ। ବୈଠକ କରି ସମାଜରୁ ବାସନ୍ଦ କରିବାକୁ ଧମକ ଦେଲେ। ରୋଗ ଭଲ ହେଉ ନ ଥିବାରୁ ଚଞ୍ଚଳା ନିଷ୍ପତ୍ତି ନେଲେ ସେ ଗାଁଠୁ ଦୂରରେ ରହିବେ। ବୁଧବାର ପୂର୍ବାହ୍ନରେ ପୁଅ ବଶିଷ୍ଟ(୧୮)ଘରଠାରୁ ୨କିଲୋମିଟର ଦୂର ମହାନଦୀ କୂଳରେ ପଲିଥିନ ଢାଙ୍କି ଏକ ଅସ୍ଥାୟୀ ଛାଉଣି ତିଆରି କଲେ। ଗ୍ରାମର କେତେକ ଲୋକଙ୍କ ସହାୟତାରେ ମା’ଙ୍କୁ ଖଟିଆରେ ନେଇ ସେଠାରେ ରଖିଲେ। ମହାନଦୀରେ ବନ୍ୟା ଆସିଥିବା ବେଳେ କୂଳରେ ନିଛାଟିଆ ସ୍ଥାନରେ ତାଙ୍କୁ ରଖାଯାଇଥିଲା। ଗାଁର କେତେକ ଲୋକ ଏହା ଜାଣିପାରି ବିନିକା ବିଡିଓ ହେମସାଗର ଭୋଇ ଓ ମହଦା ସରପଞ୍ଚ ଆନନ୍ଦିନୀ ଶତପଥୀଙ୍କୁ ଜଣାଇଥିଲେ। ବିଡିଓ ଓ ସରପଞ୍ଚଙ୍କ ହସ୍ତକ୍ଷେପ ପରେ ଚଞ୍ଚଳାଙ୍କୁ ରାତିରେ ନଦୀକୂଳରୁ ମହଦା ଅଣାଯାଇଥିଲା। ରାତି ୧୨ଟାରେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ନିଆଯାଇଛି। ଚଞ୍ଚଳାଙ୍କ କହିବାନୁସାରେ ରୋଗ ଭଲ ହେଉନି, ଡାକ୍ତର କହୁଛନ୍ତି ତୁମର କିଡ୍ନୀ ଖରାପ ହୋଇଯାଇଛି। ଅନ୍ୟ କିଛି ରୋଗ ମଧ୍ୟ ଅଛି। ଆମେ ଗରିବ ଲୋକ, ଟଙ୍କା କେଉଁଠୁ ପାଇବୁ ଚିକିତ୍ସାପାଇଁ। ତେଣୁ ପୁଅକୁ ସମାଜରୁ ବାସନ୍ଦ କରାଯିବା ଭୟରେ ଗାଁଠୁ ଦୂରରେ ରହିବାକୁ ନିଷ୍ପତ୍ତି ନେଇଥିଲି। ବିଡିଓ ଭୋଇ କୁହନ୍ତି, ଏହା ଦୁର୍ଭାଗ୍ୟଜନକ ଘଟଣା। ବର୍ତ୍ତମାନ ସମାଜରେ ଏପରି ହେବା କଥା ନୁହେଁ। ଜଣେ ବିଧବା ବୃଦ୍ଧାଙ୍କୁ ନଦୀକୂଳ ଶ୍ମଶାନ ଘାଟରେ ଏକୁଟିଆ ଛାଡିଦେବା ନିନ୍ଦନୀୟ। ସୂଚନା ପାଇବା ପରେ ସରପଞ୍ଚଙ୍କୁ କହି ସ୍ବାସ୍ଥ୍ୟକେନ୍ଦ୍ରକୁ ପଠାଇବାର ବ୍ୟବସ୍ଥା କରିଛୁ। ସରକାରୀ ସହାୟତା ଯାହା ଯୋଗାଇ ହେବ ତାହା ନିଶ୍ଚିତ କରିବୁ। ସରପଞ୍ଚ ଆନନ୍ଦିନୀ ଶତପଥୀଙ୍କୁ ପଚାରିବାରୁ ଆମେ ଘଟଣା ସମ୍ପର୍କରେ ଜାଣି ନ ଥିଲୁ। ଜାଣିବା ପରେ ସହାୟତା ପୂର୍ବକ କିଛି ଅର୍ଥ ରାଶି ପ୍ରଦାନ କରି ତାଙ୍କୁ ଆମ୍ବୁଲାନ୍ସରେ ଡାକ୍ତରଖାନା ପଠାଇଛୁ। ଗାଁରେ ମହିଳାଙ୍କୁ ରହିବା ପାଇଁ କେହି ମନା କରିନାହାନ୍ତି। ଜାତି ଭାଇଙ୍କ ବାସନ୍ଦ ଭୟରେ ସେ ନଦୀକୂଳରେ ରହିବାକୁ ନିଷ୍ପତ୍ତି ନେଇଥିଲେ। ଆମେ ସମସ୍ତଙ୍କୁ ବୁଝାଇବା ସହ ସଚେତନ କରିବୁ ବୋଲି ସରପଞ୍ଚ କହିଛନ୍ତି।
