ନନ୍ଦପୁର, ୧୪।୨:ଥମୁନି ଜନନୀ ଯନ୍ତ୍ରଣା। ପୁଣି ଷ୍ଟ୍ରେଚରରେ ବୁହାହେଲେ ଗର୍ଭବତୀ। ଏଭଳି ଘଟଣା ସୋମବାର କୋରାପୁଟ ଜିଲା ନନ୍ଦପୁର ବ୍ଲକ ଖିନବର ପଞ୍ଚାୟତର ତୋଟାଗୁଡ଼ା ଗ୍ରାମରେ ଦେଖିବାକୁ ମିଳିଛି। ଗାଁକୁ ରାସ୍ତା ନ ଥିବାରୁ ପ୍ରାୟ ୧କି.ମି. ଦୂରରେ ଆମ୍ବୁଲାନ୍ସ ଅଟକିଥିଲା। ସେପର୍ଯ୍ୟନ୍ତ ଗର୍ଭବତୀଙ୍କୁ ବୋହି ନିଆଯାଇଥିଲା।
ସୂଚନାନୁଯାୟୀ, ସୋମବାର ସକାଳେ ଗାଁର କୁମୁଳୁ ପାଙ୍ଗୀଙ୍କ ସ୍ତ୍ରୀ ଟିକମଙ୍କ ଗର୍ଭଯନ୍ତ୍ରଣା ଆରମ୍ଭ ହୋଇଥିଲା। ପରିବାର ଲୋକେ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ। ଖବର ପାଇ ଆମ୍ବୁଲାନ୍ସ ଗାଁ ଅଭିମୁଖେ ଯାଇଥିଲା। କିନ୍ତୁ ଗାଁକୁ ରାସ୍ତା ନ ଥିବାରୁ ୧ କିମି ଦୂରରେ ଗାଡ଼ି ରଖି ଡ୍ରାଇଭର କିରଣ କୁମାର ଚୌଧୁରୀ, ଇଏମ୍ଟି କମଲ ରାଜୁ ଖରା ଓ ସହାୟକ କୈଳାସ ଚନ୍ଦ୍ର ଦାଶ ଷ୍ଟ୍ରେଚର ନେଇ ଗାଁରେ ପହଞ୍ଚତ୍ଥିଲେ। ପରିବାର ଲୋକଙ୍କ ସହଯୋଗରେ ଟିକମଙ୍କୁ ଷ୍ଟ୍ରେଚରରେ ଆମ୍ବୁଲାନ୍ସ ପର୍ଯ୍ୟନ୍ତ ଅଣାଯାଇଥିଲା। ପରେ ତାଙ୍କୁ ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରଯାଇଥିଲା। ସେଠାରେ ଟିକମ ଏକ ଶିଶୁପୁତ୍ରକୁ ଜନ୍ମ ଦେଇଥିଲେ। ଉଭୟ ଏବେ ସୁସ୍ଥ ଥିବା ଡାକ୍ତର କହିଛନ୍ତି। ଟିକମଙ୍କୁ ପ୍ରସବ ପୂର୍ବରୁ ସହାୟତା କେନ୍ଦ୍ରରେ ରଖିବା ବ୍ୟବସ୍ଥା କରାଯାଇଥିଲା। ତାଙ୍କ ପ୍ରସବ ତାରିଖ ୧୦ ମାର୍ଚ୍ଚ ଥିଲା। ମାସକ ପୂର୍ବରୁ ଟିକମଙ୍କୁ ପ୍ରସବ ବେଦନା ହେବାରୁ ଏଭଳି ପରିସ୍ଥିତି ହୋଇଛି ବୋଲି ମା’ ଗୃହ ପକ୍ଷରୁ କୁହାଯାଇଛି। ନନ୍ଦପୁର ବ୍ଲକ ଅଞ୍ଚଳରେ ବାରମ୍ବାର ଏଭଳି ରୋଗୀ ଓ ଗର୍ଭବତୀ ବୁହାହେବା ଘଟଣା ସାଧାରଣରେ ଆଲୋଚନାର ବିଷୟ ହୋଇଥିବା ବେଳେ ବ୍ଲକ ଓ ଜିଲା ପ୍ରଶାସନ ରାସ୍ତାଘାଟ ନିର୍ମାଣ ନିମନ୍ତେ ପଦକ୍ଷେପ ନେବାକୁ ବୁଦ୍ଧିଜୀବୀ ଅନୁରୋଧ କରିଛନ୍ତି। ନନ୍ଦପୁର ବିଡିଓ ସୁଜିତ ମିଶ୍ର ୨୩ ପଞ୍ଚାୟତର ରାସ୍ତା ନିର୍ମାଣ ପ୍ରତି ପ୍ରାଥମିକତା ଦିଆଯାଉଥିବା କହିଛନ୍ତି।
