ନୂଆଦିଲ୍ଲୀ,୧୯।୩: ଇଂଲଣ୍ଡ ବିପକ୍ଷ ଦିନିକିଆ ସିରିଜ ପାଇଁ ଶୁକ୍ରବାର ଭାରତୀୟ ଦଳ ଘୋଷଣା କରାଯାଇଛି। ଏଥିରେ ସ୍ଥାନ ପାଇଛନ୍ତି ୨୫ ବର୍ଷୀୟ ତଥା ୬ ଫୁଟ ୨ ଇଞ୍ଚ ଉଚ୍ଚତାର ଦ୍ରୁତ ବୋଲର ପ୍ରସିଦ୍ଧ କୃଷ୍ଣା। କର୍ନାଟକ ପ୍ରିମିୟର ଲିଗ୍ରେ ଦମ୍ ଦେଖାଇବା ପରଠାରୁ କ୍ୟାରିୟରର ଗୋଟିଏ ପରେ ଗୋଟିଏ ପାହାଚ ଚଢ଼ି ଚାଲିଛନ୍ତି ଏହି ବୋଲର୍। ସେ ବିଜୟ ହଜାରେ ଟ୍ରଫିରେ ଭାଗ ନେଇ ଦ୍ୱିତୀୟ ସର୍ବାଧିକ ଉଇକେଟ ନେଇଥିବା ଖେଳାଳି ପାଲଟିଥିଲେ। ଏହାପରେ ତାଙ୍କୁ ଆଇପିଏଲ୍ରେ ସୁଯୋଗ ମିଳିଥିଲା। କେକେଆର୍ ପକ୍ଷରୁ ସେ ୨୦୧୮ରେ ଖେଳି ସମସ୍ତଙ୍କୁ ପ୍ରଭାବିତ କରିଥିଲେ। ଏଯାବତ ସେ ୨୪ ଆଇପିଏଲ୍ ମ୍ୟାଚ୍ରେ ୧୮ ଉଇକେଟ ନେଇଛନ୍ତି।
ଇନ୍ଦୋରରେ ଖେଳାଯାଇଥିବା ଟି୨୦ ମ୍ୟାଚ୍ ବେଳେ କୋହଲି ଏହି ବୋଲରଙ୍କ ପ୍ରଶଂସା କରିଥିଲେ। ତାଙ୍କ ପାଖରେ ଭଲ ଗତି ରହିଛି। ଘରୋଇ କ୍ରିକେଟରେ ତାଙ୍କର ପ୍ରଦର୍ଶନ ବେଶ ଉଲ୍ଲେଖନୀୟ ରହିଛି। ସମସ୍ତ ଫର୍ମାଟରେ ଏଭଳି ବୋଲର୍ ରହିବା ଉଚିତ। ବିଶ୍ୱକପ୍ ପାଇଁ ଆମ ପାଖରେ ଉପଯୁକ୍ତ ବିକଳ୍ପ ଅଛି ବୋଲି ସେ କହିଥିଲେ।
ଆଗାମୀ ଦିନରେ ଟି୨୦ ବିଶ୍ୱକପ୍ ଖେଳାଯିବ। ଏଣୁ ଏଥିପାଇଁ ପ୍ରସିଦ୍ଧଙ୍କ ଆଗରେ ନିଜକୁ ପ୍ରମାଣ କରିବା ପାଇଁ ବଡ଼ ଅବସର ରହିଛି। ଯଦି ସେ ସଫଳ ହୁଅନ୍ତି ତେବେ ଦଳରେ ସ୍ଥାନ ପାଇବାକୁ ଯୋଗ୍ୟ ବିବେଚିତ ହେବେ ବୋଲି କୁହାଯାଉଛି।
