ଗୋଆ, ୨୮ା୧୦: ଗୋଆରେ ଚାଲିଥିବା ଜାତୀୟ କ୍ରୀଡ଼ାର ୩୭ ତମ ସଂସ୍କରଣରେ ଓଡ଼ିଶା ଶୁକ୍ରବାର ୬ ପଦକ ହାସଲ କରିଛି। ଫର୍ମରେ ଥିବା ପ୍ରଣତି ନାୟକ ମହିଳା ଆର୍ଟିଷ୍ଟିକ୍ ଜିମ୍ନାଷ୍ଟିକ୍ସର ଭଲ୍ଟ ଓ ଅନଇଭେନ ବାର୍ ଇଭେଣ୍ଟରେ ଗୋଟିଏ ଲେଖାଏଁ ସ୍ବର୍ଣ୍ଣ ପଦକ ପାଇଛନ୍ତି। ପ୍ରଣତି ପୂର୍ବରୁ ଅନୁଷ୍ଠିତ ହୋଇଯାଇଥିବା ଅଲରାଉଣ୍ଡ ଇଭେଣ୍ଟରେ ସ୍ବର୍ଣ୍ଣ ପଦକ ହାସଲ କରିଥିବାରୁ ଚଳିତ ଜାତୀୟ କ୍ରୀଡ଼ାରେ ତାଙ୍କ ବ୍ୟକ୍ତିଗତ ସ୍ବର୍ଣ୍ଣ ପଦକ ସଂଖ୍ୟା ୩କୁ ବୃଦ୍ଧି ପାଇଛି। ତପନ ମହାନ୍ତି ମଧ୍ୟ ପୁରୁଷ ଜିମ୍ନାଷ୍ଟିକ୍ସରେ ଗୋଟିଏ ରୌପ୍ୟ ଜିତିଛନ୍ତି। ଓଡ଼ିଶା ମହିଳା ରଗ୍ବୀ ଦଳ ଚମତ୍କାର ପ୍ରଦର୍ଶନ ସହ ଫାଇନାଲରେ ବିହାରକୁ ୧୨-୭ରେ ପରାସ୍ତ କରି ସ୍ବର୍ଣ୍ଣ ପଦକ ହାସଲ କରିଛି। ପୁରୁଷ ରଗ୍ବୀ ଦଳ ପଶ୍ଚିମବଙ୍ଗକୁ ପରାସ୍ତ କରି ବ୍ରୋଞ୍ଜ ପଦକ ପାଇଛି। ସେହିପରି ଭାରୋତ୍ତୋଳନରେ ସୁରେଶ କୁମାର ଯାଦବ ବ୍ରୋଞ୍ଜ ପଦକ ଆଣି ପଦକ ସଂଖ୍ୟାକୁ ବୃଦ୍ଧି କରିଥିଲେ। ସୁରେଶ ୯୬ କାଟେଗୋରୀରେ ମୋଟ ୩୨୧କେଜି (ସ୍ନାଚରେ ୧୪୦କେଜି ଏବଂ କ୍ଲିନ ଆଣ୍ଡ ଜର୍କରେ ୧୮୧କେଜି) ଉଠାଇଥିଲେ। ଅନ୍ୟପକ୍ଷରେ ଓଡ଼ିଶାର ଆଶୁତୋଷ ପୂଜାରୀ, ଗଣେଶ ପୂଜାରୀ ଓ ରବୀନ୍ଦ୍ର ଭଟ୍ଟ ପ୍ରମୁଖ ପେନକାକ୍ ସିଲଟ ରେଗୁ ଇଭେଣ୍ଟର ଫାଇନାଲରେ ପ୍ରବେଶ କରିଛନ୍ତି। ସୂଚନାଯୋଗ୍ୟ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରତିଯୋଗିତା ପୂର୍ବରୁ ଜାତୀୟ କ୍ରୀଡ଼ାର ପଦକ ବିଜେତାଙ୍କ ଲାଗି ଆର୍ଥିକ ପୁରସ୍କାର ଘୋଷଣା କରିଛନ୍ତି। ତଦନୁସାରେ ସ୍ବର୍ଣ୍ଣ ପଦକ ବିଜେତା ୫ ଲକ୍ଷ ଟଙ୍କା, ରୌପ୍ୟ ବିଜେତା ୩ ଲକ୍ଷ ଏବଂ ବ୍ରୋଞ୍ଜ ବିଜେତାଙ୍କୁ ୨ଲକ୍ଷ ଟଙ୍କା ପାଇବେ।
