ଜଲନ୍ଧର: ଆଜିକାଲି ପଞ୍ଜାବର ଏକ ଗାଁ ଚର୍ଚ୍ଚାରେ। ଦୂରଦୂରାନ୍ତରୁ ଲୋକମାନେ ଏଠାକାର ଘର ଦେଖିବା ପାଇଁ ଆସୁଛନ୍ତି। ବାସ୍ତବରେ ଏହି ଗାଁର ଘରଗୁଡ଼ିକର ଡିଜାଇନ ଏପରି ଯେ ଯେକେହି ଏହା ପ୍ରତି ଆକର୍ଷିତ ହୁଅନ୍ତି। ଏହି ଗାଁଟି ଜଲନ୍ଧର ଜିଲାରେ ଅଛି। ଏହାର ନାମ ଉପ୍ପଲ ଭୁପା। ଏଠାରେ ରହୁଥିବା ଲୋକମାନେ ନିଜ ଘରର ଛାତକୁ ଏପରି ଢଙ୍ଗରେ ଡିଜାଇନ କରିଛନ୍ତି ଯେ ଚାରିଆଡେ ଏହାର ଚର୍ଚ୍ଚା ହେଉଛି। କେବଳ ଏତିକି ନୁହେଁ ସୋସିଆଲ ମିଡିଆରେ ଏହା ବେଶ ଭାଇରାଲ ହେଉଛି। ତେବେ ଆସନ୍ତୁ ଜାଣିବା ଡିଜାଇନ୍ରେ କ’ଣ ବିଶେଷତା ରହିଛି?
ଗାଁର ଲୋକମାନେ ନିଜ ଘରର ଛାତ ଉପରେ ଥିବା ପାଣି ଟାଙ୍କିକୁ ବିଭିନ୍ନ ଆକୃତି ଦେଇଛନ୍ତ। ସାଧାରଣତଃ ଘର ଛାତ ଉପରେ ଥିବା ପାଣି ଟାଙ୍କି ପ୍ଲାଷ୍ଟିକ, ଷ୍ଟିଲ, ଲୁହା କିମ୍ବା ସିମେଣ୍ଟରେ ର୍ନିମିତ ହୋଇଥାଏ। ଏହାର ଆକୃତି ଗୋଲାକାର, ଆୟତାକାର କିମ୍ବା ଲମ୍ବା ହୋଇଥାଏ। ହେଲେ ଏହି ଗାଁରେ ରହୁଥିବା ଲୋକମାନେ କିଛି ଭିନ୍ନ କରିଛନ୍ତି। ପାଣି ଟାଙ୍କି ପାଇଁ ଗାଁଟି ଏବେ ଲୋକଙ୍କ ଆକର୍ଷଣର କେନ୍ଦ୍ର ପାଲଟିଛି। କିଏ ପାଣି ଟାଙ୍କିକୁ ଏକ ବିମାନ ରୂପ ଦେଇଛି ତ କିଏ ପଦ୍ମ ଫୁଲ କିମ୍ବା ଏକ ଜଳ ଜାହାଜ ଭଳି ଆକୃତି ଦେଇଛନ୍ତି। ଏହାକୁ ହଠାତ ଦେଖିଲେ ସବୁଗୁଡ଼ିକ ପାଣି ଟାଙ୍କି ବୋଲି ବିଶ୍ୱାସ ହୁଏନାହିଁ।
ସ୍ଥାନୀୟ ବାସିନ୍ଦା କୁହନ୍ତି, ଜଲନ୍ଧରର ଅପପାଲ ଭୁପା ଗାଁରେ ଲୋକମାନେ ନିଜ ଘରର ଛାତ ଉପରେ ଡିଜାଇନର୍ ପାଣି ଟାଙ୍କି ନିର୍ମାଣ କରିଛନ୍ତ। ଏହାକୁ ଲୋକମାନେ ଦୂରରୁ ଦେଖିବା ପାଇଁ ଆସନ୍ତି । ଏଠାରେ ଅଧିକାଂଶ ଲୋକ ଦେଶ ବାହାରେ ରୁହନ୍ତି। ସେମାନଙ୍କ ଚିନ୍ତାଧାରା ଅନୁଯାୟୀ ୱାଟର ଟ୍ୟାଙ୍କିଗୁଡ଼ିକୁ ଏୟାର ଇଣ୍ଡିଆ ବିମାନ, ଜାହାଜର ଆକାର ଦିଆଯାଇଛି। ଅନେକ ଲୋକ ପାଣି ଟାଙ୍କି ପାଇଁ ସିଂହ ଏବଂ ଘୋଡା ଚିତ୍ର ଚୟନ କରିଛନ୍ତି। ଦେଖିବାକୁ ଏହା ସୁନ୍ଦର ଲାଗିବା ସହ ଆକର୍ଷଣର କାରଣ ପାଲଟିଛି।
