କୋରାପୁଟ,୨୯ା୩(ସ୍ବ.ପ୍ର.): କୋରାପୁଟସ୍ଥିତ କୋଲାବ ଜଳଭଣ୍ଡାରର ଟିକରପଡ଼ା ଘାଟରେ ବୁଧବାର ଅପରାହ୍ନରେ ଟିକରପଡ଼ା ପୋଷ୍ଟମାଷ୍ଟର ପ୍ରିୟଙ୍କା ପ୍ରହରାଜ ପାଣିକୁ ଡେଇଁ ଆତ୍ମହତ୍ୟା କରିଥିବା ଜଣାଯାଇଛି। ହେଲେ ଆତ୍ମହତ୍ୟାର ପ୍ରକୃତ କାରଣ ଏବେବି ଜଣାପଡ଼ି ନ ଥିବା ବେଳେ ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଦୁଃଖ ଖେଳିଯାଇଛି।
ସୂଚନାରୁ ପ୍ରକାଶ ଯେ, କଟକର ମାହାଙ୍ଗା ଗୋପାଳପୁର ଅଞ୍ଚଳର ପ୍ରିୟଙ୍କା ପ୍ରହରାଜ ଦୀର୍ଘଦିନ ହେଲା କୋରାପୁଟ ଜିଲାର ଲମତାପୁଟ ବ୍ଲକର ଟିକରପଡ଼ା ଡାକଘରେ ପୋଷ୍ଟ ମାଷ୍ଟର ଭାବେ କାର୍ଯ୍ୟରତ ଥିଲେ। ସେ ଟିକରପଡ଼ାରେ ନିଜ ମାଆଙ୍କ ସହିତ ରହୁଥିଲେ। ଗତ ମାସରେ ସେ ଛୁଟିରେ ଯାଇ କିଛି ଦିନ ତଳେ ଟିକରପଡ଼ା ଫେରିବା ପରେ କାର୍ଯ୍ୟରେ ଯୋଗ ଦେଇଥିଲେ। ବୁଧବାର ପୂର୍ବାହ୍ନରେ ସେ ପୋଷ୍ଟ ଅଫିସକୁ ଯାଇଥିଲେ। କିନ୍ତୁ ଅପରାହ୍ନରେ କାର୍ଯ୍ୟାଳୟରୁ ବାହାରି ଟିକରପଡ଼ା ନୀଦ ଘାଟକୁ ଯାଇ ପାଣିକୁ ଡେଇଁ ପଡ଼ିଥିଲେ। ସ୍ଥାନୀୟ କିଛି ଲୋକ ଏହା ଦେଖି ପାଣିରେ ପଶି ପ୍ରିୟଙ୍କାଙ୍କୁ ଉଦ୍ଧାର କରି ସ୍ଥାନୀୟ ମେଡିକାଲକୁ ନେଇଥିଲେ ମଧ୍ୟ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏନେଇ ଖବର ପାଇ ସ୍ଥାନୀୟ ପୋଲିସ ମେଡିକାଲରେ ପହଞ୍ଚି ମୃତଦେହ ଜବତ କରିଥିବା ବେଳେ ଏଠାରେ ତାଙ୍କର କେହି ପରିବାର ସଦସ୍ୟ ନ ଥିବାରୁ ପ୍ରିୟଙ୍କାଙ୍କ ବାପାଙ୍କୁ ଆସିବା ପାଇଁ ପୋଲିସ କହିଥିବା ଜଣାପଡ଼ିଛି।
