କଣ୍ଟାମାଳ/ବାଉଁଶୁଣୀ,୨୧ା୩(ଡି.ଏନ.ଏ.): ବୌଦ୍ଧ ଜିଲା ମନମୁଣ୍ଡା ଥାନା ଶଗଡା ପଞ୍ଚାୟତରେ ନିର୍ବାଚନ ପରବର୍ତ୍ତୀ ହିଂସା ଦେଖାଦେଇଛି। ସମର୍ଥକଙ୍କ ସହ ଜଣେ ବିଜେଡି ନେତା ୨ ଜଣଙ୍କୁ ଅପହରଣ ପରେ ମାଡ଼ ମାରିଥିବା ନେଇ ମନମୁଣ୍ଡା ଥାନାରେ ଅଭିଯୋଗ ହୋଇଛି।
ଅଭିଯୋଗ ଅନୁଯାୟୀ, ଶଗଡା ପଞ୍ଚାୟତ ଡୋରସିଂ ଗାଁର ନାରାୟଣ କହଁର ଏବଂ ତାଙ୍କର ଜଣେ ସମ୍ପର୍କୀୟ ବଡଭାଇ ତୁମ୍ବେଶ୍ୱର କହଁର କୌଣସି କାମରେ ମନମୁଣ୍ଡା ଆସି ଘରକୁ ଫେରୁଥିଲେ। ଏହି ସମୟରେ ଶଗଡା ପଞ୍ଚାୟତର ଖଣ୍ଡିକନପା ଗାଁ ମୁଣ୍ଡରୁ ଜିଲା ପରିଷଦ ୪ ନମ୍ବର ଜୋନର ବିଜେଡି ପ୍ରାର୍ଥୀଙ୍କ ସ୍ବାମୀ ବିପିନ ପଧାନ ଏବଂ ତାଙ୍କର ଅନ୍ୟ ୭ ଜଣ ସହଯୋଗୀ ଉଭୟଙ୍କୁ ଅପହରଣ କରି ନିକଟସ୍ଥ ଜଙ୍ଗଲକୁ ନେଇ ଯାଇଥିଲେ। ନିର୍ବାଚନରେ ଭୋଟ ଦେଇ ନ ଥିବାରୁ ଦୁହିଁଙ୍କୁ ପ୍ରବଳ ମାଡ ମାରିବା ସହ ଟଙ୍କା ଲୁଟି ନେଇଥିଲେ। ସ୍ଥାନୀୟ ଲୋକେ ଏହା ଦେଖିବା ପରେ ସେମାନଙ୍କୁ ସନ୍ଧ୍ୟାରେ ଛାଡି ଦେଇଥିଲେ। ଚଳିତ ନିର୍ବାଚନରେ ଜିଲା ପରିଷଦ ଜୋନ ୪ରେ ଭାଜପା ପ୍ରାର୍ଥୀ ବିଜୟ ଲାଭ କରିଥିବାରୁ ବିଜେଡି ପ୍ରାର୍ଥୀଙ୍କ ସ୍ବାମୀ ଏଭଳି କାଣ୍ଡ ଭିଆଇଥିବା ଅଭିଯୋଗ ହୋଇଛି। ଏନେଇ ମନମୁଣ୍ଡା ଥାନାରେ ଅଭିଯୋଗ ହୋଇଛି। ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା (ନଂ ୬୨/୨୨) ରୁଜୁ କରି ଘଟଣାର ତଦନ୍ତ ଚଳାଇଛି। ହେଲେ ପୋଲିସ କାହାରିକୁ ଗିରଫ କରିନାହିଁ।
