କୋରାପୁଟ,୨୯ା୨(ଅମିତାଭ ବେହେରା): ସାଧାରଣ ନିର୍ବାଚନ ଯେତେ ପାଖେଇ ଆସୁଛି କୋରାପୁଟ ବିଧାନସଭା ନିର୍ବାଚନମଣ୍ଡଳୀରେ ରାଜନୀତି ସେତେ ସରଗରମ ହେଉଛି । ଦଳୀୟ ଟିକେଟ ହାତେଇବା ପାଇଁ ବିଜେଡି ସମେତ କଂଗ୍ରେସ ଓ ଭାଜପା ଆଦି ୩ ପ୍ରମୁଖ ଦଳରେ ଆଶାୟୀଙ୍କ ସଂଖ୍ୟା ବଢ଼ିବାରେ ଲାଗିଛି।୨୦୦୯ରେ କୋରାପୁଟ ନିର୍ବାଚନମଣ୍ଡଳୀ ବିଜେଡି ହାତରେ ଥିବା ବେଳେ ୨୦୧୪ରେ ଏହା କଂଗ୍ରେସ ହାତକୁ ଯାଇଥିଲା । ପୁଣି ୨୦୧୯ରେ ବିଜେଡି ଏହି ଆସନକୁ ଅକ୍ତିଆର କଲା। ୨୦୧୯ରେ ଏହି ନିର୍ବାଚନମଣ୍ଡଳୀରୁ ଭାଜପାରୁ ତ୍ରିପୁରାରୀ ଗରଡ଼ା ପ୍ରାର୍ଥୀ ହୋଇଥିଲେ। ସେ ଏବେ ବିଜେଡିରେ। ବର୍ତ୍ତମାନ ବିଜେଡି ବିଧାୟକ ଥିବା ରଘୁରାମ ପଡ଼ାଲଙ୍କୁ ଦଳ ଯଦି ଟିକେଟ ଦେବ ତେବେ ପଡ଼ାଲଙ୍କ ବାଟରେ ଜୟରାମ ପୂଜାରୀ କଣ୍ଟା ସାଜିପାରନ୍ତି। ରଘୁରାମ ମିଥ୍ୟା ପ୍ରମାଣପତ୍ର ଦେଇ ୨ ଥର ବିଧାୟକ ହୋଇଥିବା ପୂର୍ବରୁ ଓଏସ୍ଏପି ତୃତୀୟ ବାଟାଲିୟନ ସିପାହି ସଂଘ ପୂର୍ବତନ ସଭାପତି ଜୟରାମ ଆରୋପ କରିବା ସହ ତା’ର ପ୍ରମାଣ ମଧ୍ୟ ଦେଇଥିଲେ। ଦଳ ଯଦି ରଘୁରାମଙ୍କୁ ଟିକେଟ ଦିଏ ତେବେ ତାଙ୍କ ରାସ୍ତାରେ ଜୟରାମ ପ୍ରତିବନ୍ଧକ ସାଜିପାରନ୍ତି। ଅନ୍ୟପକ୍ଷରେ କୋରାପୁଟରେ ନୂଆ ମୁହଁ ନେଇ ମଧ୍ୟ ଆକଳନ ଚାଲିଛି l ନୂଆ ମୁହଁଙ୍କ ମଧ୍ୟରେ ଏବେ ସାମାଜିକ କର୍ମୀ ଡମ୍ବରୁ ନାୟକ ଆଗରେ ରହିଛନ୍ତି। ବିଭିନ୍ନ ସମୟରେ ଜନକଲ୍ୟାଣମୂଳକ କାର୍ଯ୍ୟ କରିବା ସହ ସରକାରଙ୍କ ଜନହିତକର ଯୋଜନା ସମ୍ପର୍କରେ ସେ ଗାଁ ଗାଁ ବୁଲି ଲୋକଙ୍କୁ ବୁଝାଉଛନ୍ତି । ଅଧିକାରୀମାନଙ୍କ ପାଖକୁ ଯାଇ ଆଲୋଚନାକରି ଲୋକଙ୍କ ସମସ୍ୟା ସମାଧାନ କରୁଛନ୍ତି । ସେହିପରି ଭାଜପା ଟିକେଟ ପାଇଁ ରାଜ୍ୟ ସମ୍ପାଦିକା ପୂର୍ଣ୍ଣିମା ନାୟକ, ନିକଟରେ ଭାଜପାରେ ସାମିଲ ହୋଇଥିବା ରଘୁରାମ ମାଛ ମଧ୍ୟ ଆଶାୟୀ ଅଛନ୍ତି। କଂଗ୍ରେସରେ କୃଷ୍ଣ କୁଲଦୀପ, କୃଷ୍ଣ ଶଗରିଆ, ରମେଶ ବ୍ୟାଖିଆ, ନିମାଇଁ ସରକାର, ଭରତ ଖୋସ୍ଲା ପ୍ରମୁଖ ମଧ୍ୟ ଆଶାୟୀ ରହିଥିବା ଚର୍ଚ୍ଚା ହେଉଛି। ତେବେ ଆଗାମୀ ଦିନରେ ବିଭିନ୍ନ ଦଳ ପକ୍ଷରୁ କାହାକୁ ପ୍ରାର୍ଥୀ କରାଯାଉଛି ତାହା ଦେଖିବାକୁ ବାକି ରହିଲା।
