ଗଞ୍ଜାମ,୨୮।୭(ବିଦ୍ୟାଧର ସାହୁ ): ଗତ କିଛି ଦିନ ତଳେ ପୁଇଁତୋଳା ଛକଠାରେ ପାନ ଦୋକାନ କରିଥିବା ଦୁଇ ଭାଇଙ୍କୁ ଚୋରା ଗଞ୍ଜେଇ ଚାଲାଣ ଅଭିଯୋଗରେ କର୍ନାଟକ ପୋଲିସ ଉଠାଇ ନେଇଥିଲା l ଏହି ଘଟଣା ସମ୍ପର୍କରେ ବିଭିନ୍ନ ଗଣମାଧ୍ୟମରେ ଖବର ପ୍ରକାଶିତ ହେବା ପରେ ପୋଲିସ ପ୍ରଶାସନ ପକ୍ଷରୁ ତତ୍ପରତା ଦେଖାଦେଇଛି। ଏପରିକି ପୋଲିସ ସେହି ଦିନଠାରୁ ଜାତୀୟ ରାଜପଥ ପାର୍ଶ୍ୱ ଦୋକାନ ଉପରେ ଗଞ୍ଜାମ ଥାନା ପୋଲିସ ପକ୍ଷରୁ କଡା ନଜର ରଖାଯାଇଛି l ଏନେଇ ଥାନା ଅଧିକାରୀ ସନ୍ତୋଷ କୁମାର ବେହେରାଙ୍କ ନେତୃତ୍ୱରେ ଏକ ପୋଲିସ ଟିମ୍ ଥାନା ଅଧୀନରେ ଥିବା ରାଜପଥ ପାର୍ଶ୍ୱ ପାନ ଦୋକାନ ସହ ବିଭିନ୍ନ ଭେରାଇଟି ଷ୍ଟୋର ଉପରେ ଶୁକ୍ରବାର ଚଢ଼ାଉ କରାଯାଇଥିଲା l ଏପରିକି ରାତିରେ ଖୋଲି ବେପାର କରିବା ଉପରେ ପୋଲିସ ପକ୍ଷରୁ ରୋକ ଲଗାଇଛି। ରାତି ୧୦ ପରେ ଦୋକାନଗୁଡିକୁ ବନ୍ଦ କରିବା ପାଇଁ ନିର୍ଦ୍ଦେଶ ଦିଆଯାଇଛି l ଏପରିକି ଲାଇନ ଟ୍ରକରୁ ଡିଜେଲ ଚୋରି ପ୍ରତି ମଧ୍ୟ ଦୃଷ୍ଟି ରଖାଯାଇଛି ବୋଲି ଥାନା ଅଧିକାରୀ ସନ୍ତୋଷ କୁମାର ସାହୁ ସୂଚନା ଦେଇଛନ୍ତି l ରାତି ୧୦ଟା ପରେ ଦୋକାନ ଖୋଲା ବ୍ୟବସାୟ କରୁଥିବା ଦୋକାନ ମାଲିକଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ଗଞ୍ଜାମ ଥାନା ପୋଲିସ ପକ୍ଷରୁ କୁହାଯାଇଛି l ଏନେଇ ପାଟ୍ରୋଲିଂ ବ୍ୟବସ୍ଥାକୁ କଡାକଡି କରାଯିବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି।
ସୂଚନା ଯୋଗ୍ୟ, ୨୦ ତାରିଖ ରାତିରେ ବେଆଇନ ମାଦକ ଦ୍ରବ୍ୟ ତଥା ଗଞ୍ଜେଇ ଚାଲାଣ ମାମଲାରେ କର୍ନାଟକ ପୋଲିସ ଦୋକାନୀ କୃଷ୍ଣଚନ୍ଦ୍ର ସାହୁ ଏବଂ ତାଙ୍କ ସାନଭାଇ ପଞ୍ଚୁ ସାହୁଙ୍କୁ ଉଠାଇ ନେଇଥିଲା l ସେହି ସମୟରେ ତାଙ୍କୁ କେହି ଦୃବୁର୍ତ୍ତ ବନ୍ଧୁକ ଦେଖାଇ ଅପହରଣ କରି ନେଇଥିବା ଦାବିରେ ଦୋକାନ ମାଲିକଙ୍କ ସହ ଗ୍ରାମବାସୀ ଦୀର୍ଘ ସମୟ ଧରି ରାସ୍ତା ଅବରୋଧ କରିଥିଲେ। ଉକ୍ତ ଘଟଣାରେ ଜିଲା ପୋଲିସକୁ ନାକେଦମ ହେବାକୁ ପଡିଥିଲା।
