ରୂପସା, ୫ା୪(ଡି.ଏନ.ଏ.): ବାଲେଶ୍ୱର ଜିଲା ରୂପସା ଥାନା ଅଧୀନ ଲଚ୍ଛମନଖୁଣ୍ଟା ଅଞ୍ଚଳରୁ ଏକ ଟ୍ରକ୍ ଯୋଗେ ପ୍ରାୟ ୫ ଲକ୍ଷ ଟଙ୍କାର ମୂଲ୍ୟବାନ କାଠ ସୋମବାର ରାତିରେ ଚୋରାଚାଲାଣ ହେଉଥିବା ବେଳେ ଲଚ୍ଛମନଖୁଣ୍ଟା-ଗଡ଼ପଦା ରାସ୍ତାର ଖଣ୍ଡିଆଘାଇ ପୋଲଠାରେ କାଦୁଅରେ ଫସିଯାଇଥିଲା। ଏ ସମ୍ପର୍କରେ ସ୍ଥାନୀୟ ଲୋକେ ଜାଣିବା ପରେ ରୂପସା ଥାନା ଆଇଆଇସିଙ୍କୁ ଖବର ଦେଇଥିଲେ। ମାତ୍ର ସେଠାରେ ପୋଲିସ ନ ପହଞ୍ଚତ୍ବାରୁ ଡ୍ରାଇଭର ଟ୍ରକ ନେଇ ଫେରାର ହୋଇଯାଇଥିଲେ। ଏହାକୁ ନେଇ ସ୍ଥାନୀୟ ଲୋକେ ଉତ୍ତେଜନା ପ୍ରକାଶ କରିବାରୁ ପୋଲିସ ଓ ବନବିଭାଗ ପରସ୍ପର ଉପରେ ଦୋଷ ଲଦାଲଦି ହୋଇଥିବା ଜଣାପଡିଛି।
ଡିଏଫ୍ଓଙ୍କ ନିର୍ଦ୍ଦେଶକ୍ରମେ ରେଞ୍ଜର ଗଣେଶ ପ୍ରସାଦ ଲେଙ୍କାଙ୍କ ତତ୍ତ୍ୱାବଧାନରେ ବାଲେଶ୍ୱର ଫରେଷ୍ଟର ଇତିଶ୍ରୀ ମହାପାତ୍ର, ଲଙ୍ଗଳେଶ୍ୱର ଫରେଷ୍ଟର ଶଶୀଧର ମହାନ୍ତି ତାଳପଦା ଫରେଷ୍ଟର ପ୍ରହ୍ଲାଦ ନାୟକ, ଫରେଷ୍ଟ ଗାର୍ଡ଼ ଶଶାଙ୍କ ଜେନା ପ୍ରମୁଖ ୨ଜଣ ସବୁଜ ବାହିନୀଙ୍କ ସହ ସେଠାରେ ପହଞ୍ଚିଥିଲେ। ହେଲେ ବନବିଭାଗ ଉପସ୍ଥିତିରେ କାଠ ବେପାରୀ ଓ ସହଯୋଗୀମାନେ ଟ୍ରକରୁ କାଠ ଅନଲୋଡ଼ିଂ କରି କିଛି କାଠ ଭ୍ୟାନ ଯୋଗେ ବୋହିନେଇ ପଳାଇଯାଇଥିଲେ। ଟ୍ରକ୍କୁ ଜେସିବି ମେଶିନ ସାହାଯ୍ୟରେ ଉଠାଯିବା ପରେ ଡ୍ରାଇଭରଜଣକ ଟ୍ରକ୍ ନେଇ ଚମ୍ପଟ ମାରିବା ଘଟଣା ସମସ୍ତଙ୍କୁ ବିସ୍ମିତ କରିଛି। ଏହା ପରେ ପୋଲିସ ପହଞ୍ଚତ୍ବାରୁ ପୋଲିସର ଭୂମିକା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଘଟଣାସ୍ଥଳରୁ ବନବିଭାଗ ୨ ଲକ୍ଷ ଟଙ୍କାର ଆକାଶୀ କାଠ ଜବତ କରି ନିଜ ହେପାଜତକୁ ନେଇଥିଲା। ଏ ସଂକ୍ରାନ୍ତରେ ୨୭ ଫରେଷ୍ଟ ଆକ୍ଟ, ୧୯୭୨ ମୂଳେ ୧/୨୩ ଓ ୨/୨୩ ନମ୍ବରରେ ଦୁଇଟି ପୃଥକ୍ ମାମଲା ରୁଜୁ କରି ତଦନ୍ତ ଜାରିରଖିଛି। ଆଇଆଇସି ପ୍ରଫୁଲ୍ଲ ମଲ୍ଲିକ ଚୋରା କାଠ ବ୍ୟବସାୟ ଓ କାଠ ଚାଲାଣ ବନବିଭାଗ ନିୟନ୍ତ୍ରଣରେ ବୋଲି କହିଛନ୍ତି। ରେଞ୍ଜର ଲେଙ୍କାଙ୍କୁ ପଚରାଯିବାରୁ ସେ କହିଲେ ଘଟଣାସ୍ଥଳରେ ବହୁ ଲୋକ ପହଞ୍ଚତ୍ ଉତ୍ତେଜନା ଦେଖାଯିବାରୁ ପୋଲିସକୁ ଖବର ଦିଆଯାଇଥିଲା। ହେଲେ ପୋଲିସ ବିଳମ୍ବରେ ପହଞ୍ଚିଥିଲେ। କାଠ ବ୍ୟବସାୟୀ ଟ୍ରକ୍କୁ ନେଇ ପଳାଇଥିଲେ। ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
