ନୂଆଦିଲ୍ଲୀ,୯।୫: ବୁଧବାର ଅର୍ଥାତ୍ ୧୦ ମେ’ରେ କର୍ନାଟକରେ ମତଦାନ ଅନୁଷ୍ଠିତ ହେବାକୁ ଯାଉଛି। ତେବେ ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କର୍ନାଟକବାସୀଙ୍କ ପାଇଁ ଏକ ଭିଡିଓ ବାର୍ତ୍ତା ପ୍ରକାଶ କରିଛନ୍ତି। ପ୍ରଧାନମନ୍ତ୍ରୀଙ୍କ ଏହି ଭିଡିଓ ଭାଜପାର ଟୁଇଟର ହ୍ୟାଣ୍ଡେଲରେ ଅପଲୋଡ ହୋଇଛି। ଏହି ଭିଡିଓ ବାର୍ତ୍ତାରେ ପ୍ରଧାନମନ୍ତ୍ରୀ କହିଛନ୍ତି, ମୋତେ କର୍ନାଟକ ବାସୀଙ୍କଠାରୁ ବହୁତ ଭଲ ପାଇବାଳ ମିଳିଛି, ଯାହା ମୋ ପାଇଁ ଭଗବାନଙ୍କ ଆଶୀର୍ବାଦ ସଦୃଶ। ଭାରତର ଲୋକମାନେ ଭାରତକୁ ଏକ ବିକଶିତ ଦେଶ କରିବାକୁ ନିଷ୍ପତ୍ତି ନେଇଛନ୍ତି। ଏହି ବିକଶିତ ଭାରତର ସଂକଳ୍ପକୁ ଆଗେଇ ନେବା ପାଇଁ କର୍ନାଟକ ଶକ୍ତିରେ ପରିପୂର୍ଣ୍ଣ। ବର୍ତ୍ତମାନ ଭାରତ ହେଉଛି ବିଶ୍ୱର ପଞ୍ଚମ ବୃହତ୍ତମ ଅର୍ଥନୀତି। ବର୍ତ୍ତମାନ ଆମର ସଂକଳ୍ପ ହେଉଛି ଦେଶକୁ ଶ୍ରେଷ୍ଠ ତିନୋଟି ଅର୍ଥନୀତିରେ ଅନ୍ତର୍ଭୁକ୍ତ କରିବା ଏବଂ କର୍ନାଟକର ଅର୍ଥନୀତି ଦ୍ରୁତ ଗତିରେ ବୃଦ୍ଧି ପାଇବା ପରେ ଏହା ସମ୍ଭବ ହେବ।
ପ୍ରଧାନମନ୍ତ୍ରୀ କହିଛନ୍ତି, କର୍ନାଟକକୁ ଏକ ଟ୍ରିଲିୟନ ଅର୍ଥନୀତି କରିବା ପାଇଁ ଏକ ଡବଲ ଇଞ୍ଜିନ ସରକାର ଆବଶ୍ୟକ। ପ୍ରଧାନମନ୍ତ୍ରୀ ମୋଦି ଏହା ମଧ୍ୟ କହିଛନ୍ତି, ‘ତୁମର ସ୍ବପ୍ନ, ମୋର ସ୍ବପ୍ନ, ଯାହାକୁ ମିଶିକି ପୂରଣ କରିବା। ଭାଜପା ସରକାର ସମ୍ପୂର୍ଣ୍ଣ ସଚ୍ଚୋଟତାର ସହ କାର୍ଯ୍ୟ କରିବେ। ବର୍ତ୍ତମାନ କର୍ନାଟକର ଲୋକମାନେ ଡବଲ ଇଞ୍ଜିନ ସରକାରଙ୍କ ସାଢେ ତିନି ବର୍ଷର କାର୍ଯ୍ୟ ଦେଖିଛନ୍ତି। କର୍ନାଟକର ଅର୍ଥନୀତି ବିସ୍ତାରରେ ଭାଜପା ସରକାରଙ୍କ ଧ୍ୟାନ ଏବଂ ଭବିଷ୍ୟତ ନୀତି ଏକ ବିଶେଷ ଭୂମିକା ଗ୍ରହଣ କରୁଛି।
