ଫିରୋଜପୁର,୨୫ ।୧: ପଞ୍ଜାବ ବିଧାନସଭା ନିର୍ବାଚନ ଲାଗି ଅକାଳିଦଳ ଭାରତୀୟ ଜନତା ପାର୍ଟି(ଭାଜପା) ସହ ମେଣ୍ଟ କଲାନାହିଁ । ହେଲେ ଦଳର ମୋଦି ପ୍ରେମ ଏବେ ପ୍ରଚାର ସମୟରେ ଦେଖିବାକୁ ମିଳିଛି । ଫିରୋଜପୁର ଜିଲାର ଜଲାଲାବାଦ ବିଧାନସଭା ଆସନରୁ ଶିରୋମଣି ଅକାଳିଦଳର ଅଧ୍ୟକ୍ଷ ସୁଖବିର ବାଦଲ ନିର୍ବାଚନ ଲଢୁଛନ୍ତି । ଏବେ ସେଠାରେ ନିର୍ବାଚନ ପ୍ରଚାର ଯୋରସୋରରେ ହେଉଛି । ଏକ ଅଟୋ ରିକ୍ସାରେ ଅକାଳି ଦଳର ବ୍ୟାନର ଲାଗିଥିବା ଦେଖାଯାଇଛି, ଯାହା ଏବେ ସାରା ରାଜ୍ୟରେ ଚର୍ଚ୍ଚାର କେନ୍ଦ୍ର ପାଲଟିଛି । କାରଣ ଭାଜପା ସହ ମେଣ୍ଟ କରି ନଥିଲେ ବି ଉକ୍ତ ବ୍ୟାନରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଫଟୋ ରହିଛି । ଏହାସହ ପୂର୍ବତନ ମୁଖ୍ୟମନ୍ତ୍ରୀ ପ୍ରକାଶ ସିଂ ବାଦଲଙ୍କର ଫଟୋ ବି ରହିଛି । ଏହାସହ ସେଥିରେ ବହୁଜନ ସମାଜ ପାର୍ଟିର ପତାକା ବି ରହିଛି । ଏବେ ଲୋକେ ଏହି ବ୍ୟାନରକୁ ଦେଖି କହୁଛନ୍ତି, ‘ଓ ସାଥିରେ ତେରେ ବିନା ଭି କ୍ୟା ଜିନା…’ ।
