ଲଙ୍ଗଳେଶ୍ୱର, ୭।୧୨: ଶୀତର ଆଗମନ ସାଙ୍ଗକୁ ଆରମ୍ଭ ହୋଇଯାଇଛି ପର୍ଯ୍ୟଟନ ଋତୁ। କୋଭିଡ କଟକଣା ପାଇଁ ଗତ ଦୁଇବର୍ଷ ଧରି ରାଜ୍ୟର ସମସ୍ତ ପର୍ଯ୍ୟଟନସ୍ଥଳୀ ବନ୍ଦ ରହିଥିଲା। ଏବେ ଚଳଚଞ୍ଚଳ ହୋଇଉଠିଛି ଓଡ଼ିଶାର ବିଭିନ୍ନ ପର୍ଯ୍ୟଟନସ୍ଥଳୀ। ବାଲେଶ୍ୱର ଜିଲାରେ ଥିବା ପର୍ଯ୍ୟଟନସ୍ଥଳୀ ମଧ୍ୟରେ ବାଲିଆପାଳ ବ୍ଲକର ଯମୁନାଶୂଳ ବେଳାଭୂମିର ମନୋରମ ଦୃଶ୍ୟକୁ ଉପଭୋଗ କରିବା ପାଇଁ ରାଜ୍ୟ ତଥା ରାଜ୍ୟ ବାହାରୁ ହଜାର ହଜାର ପର୍ଯ୍ୟଟକଙ୍କ ସୁଅ ଛୁଟିଥାଏ। ହେଲେ ଏହା ଓଡ଼ିଶା ପର୍ଯ୍ୟଟନ ମାନଚିତ୍ରରେ ସ୍ଥାନ ପାଇ ନ ଥିବାରୁ ଆଖିଦୃଶିଆ ବିକାଶ ହୋଇପାରିନି।
ବାଲେଶ୍ୱର ଜିଲା ସଦର ମହକୁମାଠାରୁ ୭୦ କି.ମି. ଏବଂ ବାଲିଆପାଳ ବ୍ଲକ ମୁଖ୍ୟାଳୟଠାରୁ ମାତ୍ର ୨୦ କି.ମି. ଦୂରରେ ରହିଛି ଯମୁନାଶୂଳ ବେଳାଭୂମି। ଓଡ଼ିଶା ସୀମାନ୍ତରେ ଏହି ବେଳାଭୂମି ରହିଥିବାରୁ ଓଡ଼ିଶା ସମେତ ପଡ଼ୋଶୀ ପଶ୍ଚିମବଙ୍ଗ, ଝାଡଖଣ୍ଡ, ବିହାର ଆଦି ରାଜ୍ୟର ପର୍ଯ୍ୟଟକମାନେ ଏଠାକୁ ଛୁଟି ଆସିଥାନ୍ତି। ସୁବିସ୍ତୀର୍ଣ୍ଣ ବାଲୁକାଶଯ୍ୟା ସାଙ୍ଗକୁ ଝାଉଁ ବନାନୀର ସୁଁ ସୁଁ ଶବ୍ଦ ମଧ୍ୟରେ ନାଲି କଙ୍କଡ଼ାଙ୍କ ଲୁଚକାଳି ଖେଳ ମଧ୍ୟରେ ପର୍ଯ୍ୟଟକମାନେ ସତେଯେମିତି ନିଜକୁ ହଜାଇ ଦେଇଥାନ୍ତି। ସମୁଦ୍ର ନୀଳ ଜଳରାଶି ମଧ୍ୟରୁ ଉତ୍ତାଳ ତରଙ୍ଗ ପର୍ଯ୍ୟଟକଙ୍କୁ ଆନମନା କରୁଥିବା ବେଳେ ପୁଣି ସୂର୍ଯ୍ୟୋଦୟ ଓ ସୂର୍ଯ୍ୟାସ୍ତ ସମୟର ଜଳରାଶି ମନମୋହି ନେଇଥାଏ। ଏଥିପାଇଁ କେବଳ ପର୍ଯ୍ୟଟନ ଋତୁ ନୁହେଁ ବର୍ଷତମାମ ବଣଭୋଜି, ସାମୁଦ୍ରିକ ଜଳକ୍ରୀଡ଼ା ଆଦି ମନୋରମ ଦୃଶ୍ୟର ମଜା ନେବା ପାଇଁ ହଜାର ହଜାର ସଂଖ୍ୟାରେ ପର୍ଯ୍ୟଟକ ଏଠାକୁ ଆସିଥାନ୍ତି। ଏଠାରେ ଅନୁଷ୍ଠିତ ମକରମେଳା, ବାରୁଣୀ ସ୍ନାନ ପାଇଁ ମଧ୍ୟ ହଜାର ହଜାର ଲୋକଙ୍କ ସମାଗମ ହୋଇଥାଏ। ଏହି ବେଳାଭୂମିକୁ ଯିଏ ଥରେ ଆସିଥାଏ ସେ ବେଳାଭୂମିର ମନୋରମ ଦୃଶ୍ୟକୁ କେବେ ବି ମନରୁ ପାଶୋରି ପାରେନି। ଏହା ଏକ ସୁଦୀର୍ଘ ଓ ସମତଳ ବେଳାଭୂମି ହୋଇଥିବାରୁ ପର୍ଯ୍ୟଟକମାନେ ଏଠାକୁ ଆସି ବିମୋହିତ ହୋଇଥାନ୍ତି। ହେଲେ ବେଳାଭୂମିର ଉନ୍ନତୀକରଣ ଲାଗି ପଦକ୍ଷେପ ନିଆଯାଇ ନ ଥିବାରୁ ପର୍ଯ୍ୟଟକ ଓ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଦୂରଦୂରାନ୍ତରୁ ଆସୁଥିବା ପର୍ଯ୍ୟଟକମାନଙ୍କ ରାତ୍ରିଯାପନ ନିମନ୍ତେ ଏଠାରେ ରହିଛି ଏକ ପାନ୍ଥନିବାସ। ଏହି ପାନ୍ଥନିବାସରେ ପର୍ଯ୍ୟଟକଙ୍କ ରହଣି ପାଇଁ ସୁସଜ୍ଜିତ କୋଠରୀ ସାଙ୍ଗକୁ ପ୍ରଶସ୍ତ ମିଟିଂ ହଲ, ଡାଇନିଂ ହଲ, ଏକାଧିକ ସ୍ନାନାଗାର ସାଙ୍ଗକୁ ରୋଷେଇ ପାଇଁ ପର୍ଯ୍ୟାପ୍ତ ବ୍ୟବସ୍ଥା ରହିଛି। ପର୍ଯ୍ୟଟକଙ୍କ ଖାଇବା ପାଇଁ ଭୋଜନାଳୟର ବ୍ୟବସ୍ଥା ରହିଛି। ଏହି ମନୋରମ ବେଳାଭୂମିରେ ପାର୍କ ପ୍ରତିଷ୍ଠା ସହ ଅନ୍ୟାନ୍ୟ ସୌନ୍ଦର୍ଯ୍ୟକରଣ କାର୍ଯ୍ୟ, ସାମୁଦ୍ରିକ ମାଛ ଆକ୍ୱାରିୟମ ପ୍ରତିଷ୍ଠା, ଉଜ୍ଜଳ ଆଲୋକମାଳା, ଗମନାଗମନ ପାଇଁ ରାସ୍ତା ପ୍ରଶସ୍ତୀକରଣ କରାଗଲେ ପର୍ଯ୍ୟଟକଙ୍କ ସଂଖ୍ୟା ଆହୁରି ବଢ଼ିପାରନ୍ତା ବୋଲି ସ୍ଥାନୀୟ ବାସିନ୍ଦା ଏବଂ ପର୍ଯ୍ୟଟକମାନେ କହିଛନ୍ତି। ଓଡ଼ିଶାର ଅନ୍ୟ ବେଳାଭୂମି ଭଳି ଯଦି ସରକାର ଏହି ବେଳାଭୂମିର ବିକାଶ ଦିଗରେ ପଦକ୍ଷେପ ନିଅନ୍ତେ କେବଳ ବାଲିଆପାଳ ବ୍ଲକ ନୁହେଁ ସମଗ୍ର ଜିଲା ସମେତ ରାଜ୍ୟର ମଧ୍ୟ ସାମାଜିକ ଓ ଅର୍ଥନୈତିକ କ୍ଷେତରେ ପ୍ରଗତି ହୋଇପାରନ୍ତା ବୋଲି ସ୍ଥାନୀୟ ବୁଦ୍ଧିଜୀବୀମାନେ ମତ ଦେଇଛନ୍ତି।
କମଳାକାନ୍ତ ଦାସ
