ଯୋଡ଼ା,୭।୧୨(ଡି.ଏନ.ଏ.): କେନ୍ଦୁଝର ଜିଲା ଯୋଡ଼ା ବ୍ଲକ ଅଧୀନ କାଳିଆବେଡ଼ା ସରକାରୀ ପ୍ରାଥମିକ ବିଦ୍ୟାଳୟରେ ଛାତ୍ରୀଛାତ୍ର ବିପଦସଙ୍କୁଳ ଅବସ୍ଥାରେ ବାରଣ୍ଡାରେ ପାଠ ପଢ଼ୁଛନ୍ତି। ସ୍କୁଲ ଛାତ ଫାଟି ଅଁା କରିଛି। କେତେବେଳେ ଗଳି ପଡ଼ିବ,ଏନେଇ ଭୟଭୀତ ଅବସ୍ଥାରେ ଅଛନ୍ତି ଛାତ୍ରୀଛାତ୍ର।
ବ୍ଲକ ଆଦର୍ଶ ବିଦ୍ୟାଳୟକୁ ଲାଗି ରହିଥିବା ଏହି ବିଦ୍ୟାଳୟ ୧୯୯୯ରୁ ଆରମ୍ଭ ହୋଇଥିଲା। ୨୩ ବର୍ଷ ମଧ୍ୟରେ ଏହାର ମରାମତି ହୋଇଥିବା ପରିଲକ୍ଷିତ ହେଉନାହିଁ। ୨ଜଣ ଶିକ୍ଷକଙ୍କୁ ନେଇ ପାଠପଢ଼ା ଚାଲିଥିବା ବେଳେ ବିଭିନ୍ନ ସମସ୍ୟା ମଧ୍ୟରେ ଗତି କରୁଛି ଏହି ବିଦ୍ୟାଳୟ। ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ୩୦ ଝିଅ ଓ ୨୫ ଜଣ ପୁଅଙ୍କୁ ମିଶାଇ ମୋଟ ୫୫ ଛାତ୍ରୀଛାତ୍ର ଏଠାରେ ପାଠ ପଢ଼ୁଛନ୍ତି। ସ୍କୁଲରେ ଦୁଇଟି କ୍ଲାସ ରୁମ୍ ରହିଛି। ତେବେ ଏହି ଦୁଇ କ୍ଲାସ ରୁମ୍ର ଛାତରୁ ସିମେଣ୍ଟ ଖଣ୍ଡ ଖସୁଥିବା ବେଳେ ଗୋଟିଏ କ୍ଲାସରୁମ୍ ଛାତ ବିପଦ ସଙ୍କୁଳ ହୋଇପଡ଼ିଛି। ଫଳରେ ପିଲାଙ୍କ ସୁରକ୍ଷା ଦୃଷ୍ଟିରୁ ପ୍ରଧାନ ଶିକ୍ଷୟିତ୍ରୀ ଉକ୍ତ କ୍ଲାସ ରୁମ୍କୁ ତାଲା ବନ୍ଦ କରି ରଖିଛନ୍ତି। ଗତ କିଛି ଦିନ ପୂର୍ବେ ପିଲାମାନେ କ୍ଲାସରୁମ୍ରେ ପାଠ ପଢୁଥିବା ଅବସ୍ଥାରେ ଛାତରୁ ସିମେଣ୍ଟ ଖଣ୍ଡ ଖସିଥିଲା। ସୌଭାଗ୍ୟ ବଶତଃ ଏଥିରେ କାହାର କିଛି କ୍ଷତି ହୋଇ ନ ଥିଲା। ଫଳରେ ବିଦ୍ୟାଳୟର ଛାତ୍ରୀଛାତ୍ରମାନଙ୍କୁ ବାରଣ୍ଡାରେ ବସାଇ ପାଠପଢ଼ା ଯାଉଛି। ଏହାସହିତ ଛାତ କାନ୍ଥଫାଟି ଲୁହାଛଡ଼ ଦେଖାଯାଉଛି। ବର୍ଷାଦିନେ ଛାତରୁ ପାଣି ଗଳି କ୍ଲାସରେ ପାଣି ଜମି ରହୁଛି। ନିମ୍ନମାନର ନିର୍ମାଣ କାରଣରୁ ଦୁଇଟି କ୍ଲାସରୁମରେ ଛାତ ଫାଟି ଅଁା କରିଥିବାବେଳେ ବାରଣ୍ଡା ଛାତରୁ ମଧ୍ୟ ସିମେଣ୍ଟ ଖଣ୍ଡ ଖସୁଥିବା ପରିଲକ୍ଷିତ ହେଉଛି। ବାରଣ୍ଡା ଉପର ଛାତରୁ ମଧ୍ୟ ସିମେଣ୍ଟ ଖଣ୍ଡ ଖସିଥିବା ଓ ପ୍ରଧାନ ଶିକ୍ଷୟତ୍ରୀ ଗୀତାଞ୍ଜଳି ପ୍ରଧାନ ଏଥିରୁ ଅଳ୍ପକେ ବର୍ତ୍ତିଯାଇଥିବା କହିଛନ୍ତି। ବିପଦସଙ୍କୁଳ ଅବସ୍ଥାରେ ଥିବା ଏହି ସ୍କୁଲକୁ ନିଜ ପିଲାଙ୍କୁ ଛାଡ଼ିବାକୁ ଅଭିଭାବକମାନେ ଅନିଚ୍ଛା ପ୍ରକାଶ କରୁଥିବା ଜଣାପଡ଼ିଛି। ସ୍ଥାନୀୟ ନିର୍ବାଚିତ ପ୍ରତିନିଧି, ସ୍କୁଲ ପରିଚାଳନା କମିଟି ଓ ଶିକ୍ଷକ ଗୋଷ୍ଠୀ ବାରମ୍ବାର ଏ ନେଇ ଯୋଡ଼ା ଗୋଷ୍ଠୀ ଶିକ୍ଷାଧିକାରୀଙ୍କଠାରୁ ଆରମ୍ଭ କରି ଜିଲାପାଳଙ୍କ ଦୃଷ୍ଟି ଆକର୍ଷଣ କରି ଆସୁଥିଲେ ମଧ୍ୟ କୌଣସି ପ୍ରତିକାର ହେଉ ନ ଥିବା ଅଭିଯୋଗ ହୋଇଛି। ଏଭଳି ପରିସ୍ଥିତିରେ କୌଣସି ଦୁର୍ଘଟଣା ଘଟିଲେ କିଏ ଦାୟୀ ରହିବେ ବୋଲି ଅବିଭାବକମାନେ ପ୍ରଶ୍ନ କରିଛନ୍ତି। ଏ ସମ୍ପର୍କରେ କେନ୍ଦୁଝର ଜିଲାପାଳ ଆଶିଷ ଠାକରେଙ୍କୁ ପଚାରିବାରୁ ଅଗ୍ରାଧିକାର ଭିତ୍ତିରେ ଉକ୍ତ ବିଦ୍ୟାଳୟର ମରାମତି କରାଯିବ ବୋଲି କହିଛନ୍ତି।
