ବ୍ରହ୍ମପୁର ଅଫିସ, ୨ା୧୨:ବ୍ରହ୍ମପୁରକୁ ପ୍ଲାଷ୍ଟିକମୁକ୍ତ ସହରରେ ପରିଣତ କରିବା ପାଇଁ ପୁରୁଣା ବସ୍ଷ୍ଟାଣ୍ଡଠାରେ ରିଭର୍ସ ଭେଣ୍ଡିଂ ମେଶିନ ସ୍ଥାପନ କରାଯାଇଛି। ଏହି ଅଞ୍ଚଳଟି ଜନଗହଳିପୂର୍ଣ୍ଣ ଅଞ୍ଚଳ ହୋଇଥିବା ବେଳେ ପ୍ରତ୍ୟହ ସ୍କୁଲ କଲେଜ ଛାତ୍ରୀଛାତ୍ରଙ୍କଠାରୁ ଆରମ୍ଭ କରି ବହୁ ଲୋକଙ୍କ ଯାତାୟାତ ଲାଗି ରହିଥାଏ। ଏହାକୁ ଦୃଷ୍ଟିରେ ରଖି ଉକ୍ତ ଅଞ୍ଚଳ ସମେତ ସହରକୁ ପ୍ଲାଷ୍ଟିକମୁକ୍ତ କରିବା ଲକ୍ଷ୍ୟ ନେଇ ରିଭର୍ସ ଭେଣ୍ଡିଂ ମେଶିନ ବସାଗଲା। ଏହି ମେଶିନରେ ପ୍ଲାଷ୍ଟିକ ବୋତଲ, ପଲିଥିନ ପକାଇଲେ ଏକ ରସିଦ ମିଳିବ। ଉକ୍ତ ରସିଦକୁ ଅନ୍ଲାଇନ ଖାଦ୍ୟ ଅର୍ଡର ବେଳେ ଦେଖାଇଲେ ରିହାତି ମିଳିବ। ନଚେତ ଉକ୍ତ ରସିଦ ସ୍ଥାନୀୟ ନନ୍ଦନ ହୋଟେଲରେ ଦେଖାଇଲେ ମଧ୍ୟ ରିହାତି ମିଳିବ। ବ୍ରହ୍ମପୁର ମହାନଗର ନିଗମ (ବିଏମ୍ସି) ପକ୍ଷରୁ ଦିଆଯାଇଥିବା ଜାଗାରେ ଏଚ୍ଡିଏଫସି ବ୍ୟାଙ୍କର ଆର୍ଥତ୍କ ସହାୟତା ରିଭର୍ସ ଭେଣ୍ଡିଂ ମେଶିନ ବସିବା ପରେ ଗତ ଜୁନ ୧୬ ତାରିଖରେ ତାହା ଉଦ୍ଘାଟିତ ହୋଇଛି। ପରିବେଶ ଶିକ୍ଷା କେନ୍ଦ୍ରକୁ ଏହାର ପରିଚାଳନା ଦାୟିତ୍ୱ ଦିଆଯାଇଥିଲା। ତେବେ ମେଶିନଟି ଠିକ ଭାବେ ପରିଚାଳନା ହେଉ ନ ଥିବା ଅଭିଯୋଗ ହୁଏ। ଏପରି କି ଅନେକ ସମୟରେ ଏହା ବନ୍ଦ ହୋଇ ରହୁଥିବାରୁ ପ୍ଲାଷ୍ଟିକ ମୁକ୍ତ ସହର ଲକ୍ଷ୍ୟ ଫେଲ୍ ମାରିଛି।
ମେଶିନ୍ଟିର ଠିକ ରକ୍ଷଣାବେକ୍ଷଣ କରାଯାଉ ନ ଥିବା ବେଳେ ଚତୁଃପାର୍ଶ୍ୱରେ ଅଳିଆ ଆବର୍ଜନା ଓ ପାଣି କାଦୁଅ ଭର୍ତ୍ତି ହୋଇରହିଛି। ମେଶିନ ଚଳାଇବା ପାଇଁ କର୍ମଚାରୀ ମଧ୍ୟ ଠିକ ଭାବେ ଆସୁ ନ ଥିବା ଅଭିଯୋଗ ହୋଇଛି। ତେଣୁ ଅନେକ ସମୟରେ ପ୍ଲାଷ୍ଟିକ ବୋତଲ ପକାଇବା ନିମନ୍ତେ ଆସୁଥିବା ଲୋକେ ଫେରି ଯାଉଛନ୍ତି। ସେହିପରି ଉକ୍ତ ମେଶିନ ନିକଟରେ ଥିବା ଏକ ଫଳକରେ ପ୍ଲାଷ୍ଟିକ ଆଣନ୍ତୁ ମାସ୍କ ଓ ବ୍ୟାଗ ପାଆନ୍ତୁ ବୋଲି ମଧ୍ୟ ସୂଚନା ରହିଛି। କିନ୍ତୁ କର୍ମଚାରୀ ରହୁ ନ ଥିବା କାରଣରୁ ଲକ୍ଷ୍ୟ ସାଧନ ହୋଇପାରୁ ନ ଥିବା ସହରବାସୀ ମତ ପ୍ରକାଶ କରିଛନ୍ତି। ଜନଗହଳିପୂର୍ଣ୍ଣ ସ୍ଥାନରେ ଥିବା ଏହି ରିଭର୍ସ ଭେଣ୍ଡିଂ ମେଶିନର ସଦୁପଯୋଗ ପାଇଁ ସାଧାରଣରେ ଦାବି ହୋଇଛି।
