ପାରାଦୀପ,୨୯।୧(ସ୍ବ.ପ୍ର.): ପାରାଦୀପର ସବୁଠାରୁ ପୁରୁଣା, ଶକ୍ତ କନ୍ଭେୟର ବେଲ୍ଟଲାଇନକୁ ଆବଦ୍ଧ କରିଥିବା କଂକ୍ରିଟ୍ରୁ ସିମେଣ୍ଟ ପ୍ଲାଷ୍ଟର କିଛିଦିନ ହେଲା ଖସିବାରେ ଲାଗିଛି, ଯାହାକୁ ନେଇ ଉକ୍ତ ବେଲ୍ଟଲାଇନ ତଳେ ଥିବା ବସ୍ତିର ଲୋକମାନେ ଅଭିଯୋଗ କରିଥିଲେ। ଏପରି ଅଭିଯୋଗ ଉଠିବା ପରେ ପିପିଏଲ୍ କମ୍ପାନୀ ଦୀର୍ଘସ୍ଥାୟୀ ମରାମତି କାର୍ଯ୍ୟ ଆରମ୍ଭ କରିଛି ବୋଲି ସୂଚନା ମିଳିଛି।
୧୯୮୨ରେ ଭାରତ ଓ ନାଉରୁ ସରକାରଙ୍କ ସହଭାଗିତାରେ ପିପିଏଲ୍ ସାର କାରଖାନା ନିର୍ମାଣ ହୋଇଥିଲା। ଭାରତର ନବରତ୍ନା କମ୍ପାନୀ ମଧ୍ୟରୁ ପିପିଏଲ୍ ଅନ୍ୟତମ ଭାବେ ମାନ୍ୟତା ପାଇଛି। ୧୯୮୦ ଦଶକରେ ଏହି କନ୍ଭେୟର ବେଲ୍ଟଲାଇନ ନିର୍ମାଣ ହୋଇଥିଲା। ବନ୍ଦର ପୋତାଶ୍ରୟ ବର୍ଥ ପାଖରୁ ପିପିଏଲ୍ କମ୍ପାନୀ ଉତ୍ପାଦନସ୍ଥଳ ପର୍ଯ୍ୟନ୍ତ ୩.୫ କିମି ୨ ଥାକିଆ ଏହି ବେଲ୍ଟଲାଇନ ଯୋଗେ କଞ୍ଚାମାଲ ଓ ରାସାୟନିକ ସାମଗ୍ରୀ ପରିବହନ ହୋଇଥାଏ। ବିଦେଶରୁ ଆମଦାନୀ ହେଉଥିବା ସଲ୍ଫ୍ୟୁରିକ୍ ଏସିଡ୍, ଫସ୍ଫ୍ୟୁରିକ୍ ଏସିଡ୍, ଆମୋନିଆ ଗ୍ୟାସ, ପଟାସ ଆଦି ୩୪ ପ୍ରକାର କଞ୍ଚାମାଲ ବେଲ୍ଟଲାଇନ ଜରିଆରେ କମ୍ପାନୀ ପରିସରରୁ ଯାଇଥାଏ। ସେହିପରି ଉତ୍ପାଦିତ ସାର ମଧ୍ୟ ବେଲ୍ଟଲାଇନ ଯୋଗେ ଜାହାଜକୁ ଯାଇଥାଏ। ସିମେଣ୍ଟ କଙ୍କ୍ରିଟ୍ ଆବଦ୍ଧ ଏହି ବେଲ୍ଟଲାଇନ ହେଉଛି କମ୍ପାନୀର ପ୍ରମୁଖ ଅଙ୍ଗ। ଏହା ୧୯୮୯-୯୦ରୁ କାର୍ଯ୍ୟକ୍ଷମ ହୋଇଥିଲା। ଏପରିକି ୧୯୯୯ ମହାବାତ୍ୟା ସମୟରେ ଏହା ଅକ୍ଷୁଣ୍ଣ ରହିଥିଲା। ଏବେ ସେହି ବେଲ୍ଟଲାଇନକୁ ଆବଦ୍ଧ କରିଥିବା କଂକ୍ରିଟରୁ ଖଣ୍ଡ ଖଣ୍ଡ ପ୍ଲାଷ୍ଟର ଖସୁଛି ବୋଲି ବେଲ୍ଟଲାଇନ ତଳେ ଥିବା ବୃନ୍ଦାବନ କଲୋନୀ ବାସିନ୍ଦା ଲୁଟୁ ମହାନ୍ତି କହିଛନ୍ତି। ଏପରିକି ସପ୍ତାହକ ତଳେ ଏକ ବଡ ପ୍ଲାଷ୍ଟର ବେଲ୍ଟଲାଇନ ମାର୍କେଟ ପାଖରେ ପଡିଥିଲା, ଯାହାକୁ ନେଇ ସ୍ଥାନୀୟ ଅଞ୍ଚଳର ଲୋକମାନେ ଆଲୋଚନା କରିଥିଲେ। ଏହି ଖବର କମ୍ପାନୀ ପାଇବା ପରେ ଏବେ ମରାମତି କାର୍ଯ୍ୟ ଆରମ୍ଭ କରିଛି ବୋଲି ପିପିଏଲ କର୍ପୋରେଟ ଆଫେୟାର୍ସ ଅଧିକାରୀ ସୁଧିରଞ୍ଜନ ମିଶ୍ର କହିଛନ୍ତି। ଏପରିକି ସମ୍ଭାବ୍ୟ ବିପଦକୁ ଟାଳିବାକୁ ବେଲ୍ଟଲାଇନ ଖୁଣ୍ଟରେ ଜାଲ ଘେରାଯାଇଛି। ଏହାକୁ ମଜଭୁତ କରିବା ପାଇଁ ସମ୍ପୂର୍ଣ୍ଣ ପ୍ଲାଷ୍ଟର ଛଡ଼ାଯାଇ ସେହି ସ୍ଥାନରେ ପୁଣି ସିମେଣ୍ଟ କଂକ୍ରିଟ୍ କରାଯାଉଛି। ଉକ୍ତ କନ୍ଭେୟର ବେଲ୍ଟଲାଇନ ସ୍ଥାୟିତ୍ୱ ୧୦୦ ବର୍ଷ ରହିଛି। ଏପରି ବେଲ୍ଟଲାଇନ ଓଡ଼ିଶାରେ ପ୍ରଥମ ବୋଲି ସେ କହିଛନ୍ତି। ସୂଚନାଯୋଗ୍ୟ, ପାରାଦୀପରେ ଆଉ ୨ଟି କମ୍ପାନୀର ବେଲ୍ଟଲାଇନ ରହିଛି। ତାହା ଲୁହାଖୁଣ୍ଟ ଓ ଆଜ୍ବେଷ୍ଟସ ଆବଦ୍ଧ। ସେଠାରେ ମଧ୍ୟ ବେଳେବେଳେ ଆଜ୍ବେଷ୍ଟସ ଖସିପଡିବାର ଦୃଷ୍ଟାନ୍ତ ରହିଛି। ପଣ୍ୟ ପରିବହନ ବେଳେ ଗୁଣ୍ଡ ତଳେ ପଡିଥାଏ। ପିପିଏଲ୍ କମ୍ପାନୀର ଏହି ବେଲ୍ଟଲାଇନରୁ ସେପରି ହୁଏନାହିଁ। ଭାରତ ସରକାରଙ୍କ ଅଧୀନରେ ଥିବାବେଳେ ଦେବାଳିଆ ଅବସ୍ଥାକୁ ପିପିଏଲ୍ ଚାଲି ଯାଇଥିଲା। ୨୦୦୫ରେ ଏହାକୁ ଆଡ୍ଭେଣ୍ଟେଜ୍ ଗ୍ରୁପ ଏହାର ମାଲିକାନା ପାଇବା ସହ ପରିଚାଳନା କରୁଛି।
