ଛତ୍ରପୁର, ୩।୯(ଡି.ଏନ୍.ଏ.)- ଗଞ୍ଜାମ ଜିଲାରେ ପୁଣି ୨ ଜଣ କରୋନା ଯୋଦ୍ଧା ଗୁରୁବାର ପ୍ଲାଜମା ଦାନ କରିଛନ୍ତି। ସେମାନେ ହେଲେ ଆସିକା ବ୍ଲକର ଆରଡ଼ବ୍ଲ୍ୟୁଏସ୍ଏସ୍ ଜେଇ ଶ୍ରୀନିବାସ ରାଓ ଓ ଗଞ୍ଜାମ ପୋଲିସ ଅଧୀନ ଧରାକୋଟ ଥାନାର ଏସ୍ଆଇ କୁମୁଦ ଚନ୍ଦ୍ର ସେଠୀ ଉଭୟ ବ୍ରହ୍ମପୁର ଏମ୍କେସିଜି ମେଡିକାଲ କଲେଜ ଓ ହସ୍ପିଟାଲସ୍ଥିତ ପ୍ଲାଜମା ବ୍ୟାଙ୍କରେ ପ୍ଲାଜମା ଦାନ କରିଛନ୍ତି। ଏହି ଦୁଇ ଯୋଦ୍ଧା କାର୍ଯ୍ୟ କରୁଥିବା ବେଳେ ସଂକ୍ରମିତଙ୍କ ସଂସ୍ପର୍ଶରେ ଆସି କରୋନାରେ ଆକ୍ରାନ୍ତ ହୋଇଥିଲେ। ପରେ ଉଭୟ କରୋନା ରୁ ସୁସ୍ଥ ହୋଇଥିଲେ। ତେବେ ଆର୍ଡ଼ବ୍ଲ୍ୟୁଏସ୍ଏସ୍ ଜେଇ ପ୍ଲାଜମା ଦାନ କରିଥିବା ନେଇ ଗୁରୁବାର ଜ଼ିଲାପାଳ ବିଜୟ ଅମୃତା କୁଲାଙ୍ଗେ ଟୁଇଟ୍ କରି ସୂଚନା ଦେଇଛନ୍ତି। କରୋନା ମହାମାରୀ ସମୟରେ ତାଙ୍କର ମାନବଜାତି ପ୍ରତି ସହାୟତା ପାଇଁ ମହତ ଉଦ୍ଦେଶ୍ୟ ରହିବା ସହ ଉତ୍ସର୍ଗିକୃତ ସେବାକୁ ଜ଼ିଲାପାଳ ସାଲୁଟ ଜଣାଇଛନ୍ତି। ସେହିପରି ଏସ୍ଆଇ ପ୍ଲାଜମା ଦାନ କରିଥିବା ସମ୍ପର୍କରେ ଗଞ୍ଜାମ ଏସ୍ପି ବ୍ରିଜେଶ କୁମାର ରଏ ଗୁରୁବାର ଟୁଇଟ କରି ସୂଚନା ଦେଇଛନ୍ତି। କୋଭିଡ ୧୯ ମହାମାରୀ ସମୟରେ ମାନବଜାତିଙ୍କ ପାଇଁ ତାଙ୍କର ଏହି ସେବା ପାଇଁ ଏସ୍ପି ସାଲୁଟ ଜଣାଇଛନ୍ତି।
