ମୁମ୍ବାଇ,୧୬ା୮: ଶନିବାର ମୁମ୍ବାଇ ବିମାନବନ୍ଦରରେ ଏକ ବଡ଼ ଦୁର୍ଘଟଣା ଟଳିଯାଇଛି। ବ୍ୟାଙ୍କକରୁ ମୁମ୍ବାଇ ଯାଉଥିବା ଇଣ୍ଡିଗୋ ଏୟାରବସ୍ A321 ବିମାନ (ଉଡ଼ାଣ ନମ୍ବର 6E 1060) ଅବତରଣ ସମୟରେ ରନ୍ଓ୍ବେରେ ଧକ୍କା ଖାଇଥିଲା।
ଖରାପ ପାଗ ଏବଂ ପ୍ରବଳ ବର୍ଷା ମଧ୍ୟରେ ବିମାନର ପଛ ଅଂଶ ରନଓ୍ବେ ସହିତ ଧକ୍କା ଖାଇଥିଲା, ଯାହାକୁ ବିମାନ ଭାଷାରେ ଟେଲ୍ ଷ୍ଟ୍ରାଇକ୍ କୁହାଯାଏ। ଏହି ଘଟଣାରେ ବିମାନରେ ଥିବା ସମସ୍ତ ଯାତ୍ରୀ ଏବଂ କର୍ମଚାରୀ ସୁରକ୍ଷିତ ଅଛନ୍ତି। ଏହା ପରେ ପୁନର୍ବାର ଅବତରଣ ଚେଷ୍ଟା କରାଯାଇଥିଲା ଏବଂ ତା’ପରେ ଏହାକୁ ସଫଳତାର ସହ ଅବତରଣ କରାଯାଇଥିଲା।
ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) ଏହି ଘଟଣାର ତଦନ୍ତ ନିର୍ଦ୍ଦେଶ ଦେଇଛି। ଜଣେ ବରିଷ୍ଠ ଅଧିକାରୀ କହିଛନ୍ତି, ‘ଆମେ ଏହି ବିଷୟରେ ଏକ ଆନୁଷ୍ଠାନିକ ତଦନ୍ତ କରିବୁ ଏବଂ ଶୀଘ୍ର ନିର୍ଦ୍ଦେଶ ଜାରି କରାଯିବ।’ ଘଟଣା ପରେ, ବିମାନକୁ ଗ୍ରାଉଣ୍ଡ କରାଯାଇଛି ଏବଂ ଏହାର ସମ୍ପୂର୍ଣ୍ଣ ତଦନ୍ତ ଏବଂ ମରାମତି ପରେ ଏହାକୁ ପୁଣି ଉଡ଼ାଣ କରିବାକୁ ଅନୁମତି ଦିଆଯିବ।
