ଭୁବନେଶ୍ୱର, ୨୦।୩(ବ୍ୟୁରୋ): ପିପିଲି ଉପନିର୍ବାଚନ ୧୭ ଏପ୍ରିଲରେ ଅନୁଷ୍ଠିତ ହେବ। ପିପିଲିବାସୀଙ୍କ ଭୋଟକୁ ନିଜ ସପକ୍ଷରେ ନେବା ପାଇଁ ଶାସକ ବିଜେଡି ପ୍ରସ୍ତୁତି ଆରମ୍ଭ କରିଛି। ଏଥିପାଇଁ ଗୋଟିଏ ଗୋଟିଏ ପଞ୍ଚାୟତରେ ଏକାଧିକ ନେତାକୁ ଦାୟିତ୍ୱ ଦିଆଯାଇଛି। ମୁଖ୍ୟତଃ ପିପିଲି ଏବଂ ଡେଲାଙ୍ଗ ଉପରେ ଦଳ ମାତ୍ରାଧିକ ଗୁରୁତ୍ୱ ଦେଇଛି। ମନ୍ତ୍ରୀ ସମୀରରଞ୍ଜନ ଦାସ ଏବଂ ବିଧାୟକ ଅତନୁ ସବ୍ୟସାଚୀ ନାୟକଙ୍କୁ ପିପିଲି ବ୍ଲକ୍ ଦାୟିତ୍ୱ ଦିଆଯାଇଛି। ପିପିଲି ବ୍ଲକ୍ ଅଞ୍ଚଳରେ ୨୫ଟି ଗ୍ରାମପଞ୍ଚାୟତ ରହିଛି। ପ୍ରତ୍ୟେକ ପଞ୍ଚାୟତ ଦାୟିତ୍ୱରେ ଜଣେ ଲେଖାଏ ବିଧାୟକ ଏବଂ ବରିଷ୍ଠ ନେତା ଅଛନ୍ତି। ଗୋଟିଏ ଗୋଟିଏ ପଞ୍ଚାୟତରେ ୫ଜଣ ଲେଖାଏଁ ଦାୟିତ୍ୱରେ ରହିଛନ୍ତି। ସେହିପରି ଡେଲାଙ୍ଗ ବ୍ଲକ୍ ଦାୟିତ୍ୱ ମନ୍ତ୍ରୀ ସୁଶାନ୍ତ ସିଂଙ୍କୁ ଦିଆଯାଇଛି। ଏହି ବ୍ଳକରେ ୩ରୁ ୪ଟି ଲେଖାଏ ପଞ୍ଚାୟତ ଦାୟିତ୍ୱ ଜଣେ ଲେଖାଏ ବିଧାୟକ ଓ ବରିଷ୍ଠ ନେତାଙ୍କୁ ଦିଆଯାଇଛି। ସେହିପରି ବିଧାୟକ ସୁଧୀର କୁମାର ସାମଲଙ୍କୁ ପିପିଲି ଏନ୍ଏଏସିର ୧୬ଟି ଓ୍ବାର୍ଡ ଦାୟିତ୍ୱ ଦିଆଯାଇଛି। ତାଙ୍କ ଅଧୀନରେ ମଧ୍ୟ ଏକାଧିକ ନେତା ଅଛନ୍ତି, ଯେଉଁମାନେ ଏକ ପାଖିଆ ଭାବେ ଏନ୍ଏଏସି ବୁଥ୍କୁ ନିଜ ସପକ୍ଷରେ ନେବାକୁ ଚେଷ୍ଟା କରିବେ। ଶାସକ ଦଳ ପକ୍ଷରୁ ପ୍ରକାଶ କରାଯାଇଥିବା ଏହି ତାଲିକାରେ ବହୁ ନୂଆ ଚେହେରାକୁ ଦେଖିବାକୁ ମିଳୁଛି। ଦଳର ଅନୁଭବୀ ଏବଂ ଅଭିଜ୍ଞ ନେତା ଏପର୍ଯ୍ୟନ୍ତ ତାଲିକାରେ ସାମିଲ ହୋଇନାହନ୍ତି। ପିପିଲି ପାଇଁ ଆଗକୁ ଆଉ ଏକ ତାଲିକା ପ୍ରକାଶ ପାଇବ ବୋଲି ଆଲୋଚନା ହେଉଛି।
