ପୁରୀ ଅଫିସ,୧୩।୧୧: ଆଗକୁ ପିପିଲି ବିଧାନସଭା ଆସନ ପାଇଁ ଉପନିର୍ବାଚନ ହେବ। ପ୍ରଦୀପ ମହାରଥୀଙ୍କ ବିୟୋଗ ପରେ ଏହି ଆସନ ଖାଲିପଡ଼ିଛି। ୬ମାସ ଭିତରେ ନିର୍ବାଚନ ହେବାକୁ ନିୟମ ରହିଥିବାରୁ ଆସନ୍ତା ଏପ୍ରିଲ ୩ ତାରିଖ ସୁଦ୍ଧା ଏଠାରେ ଭୋଟ କରାଯିବ। ଏ ନେଇ ଯଦିଓ କୌଣସି ବିଜ୍ଞପ୍ତି ପ୍ରକାଶ ପାଇନାହିଁ କିନ୍ତୁ ଏହାକୁ ନଜରରେ ରଖି ଜିଲା ପ୍ରଶାସନ ପକ୍ଷରୁ ପ୍ରକ୍ରିୟା ଆରମ୍ଭ ହୋଇଯାଇଛି। ଉପନିର୍ବାଚନ ସମୟକୁ କରୋନା ପ୍ରକୋପ ଥିବ କି ନ ଥିବ ତାହା ସ୍ପଷ୍ଟ ହୋଇ ନ ଥିଲେ ମଧ୍ୟ ପ୍ରଶାସନ କିନ୍ତୁ କରୋନାକୁ ଦୃଷ୍ଟିରେ ରଖି ପ୍ରସ୍ତୁତ ହେଉଛି ବୋଲି ଗୁରୁବାର ଅତିରିକ୍ତ ଜିଲାପାଳଙ୍କ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ଡେପୁଟି କଲେକ୍ଟର (ନିର୍ବାଚନ) ସୁମନ୍ତ କର କହିଛନ୍ତି। ଡେପୁଟି କଲେକ୍ଟର କର କହିଛନ୍ତି ଯେ, ପିପିଲି ନିର୍ବାଚନମଣ୍ଡଳୀର ମୋଟ ଭୋଟର ସଂଖ୍ୟା ୨ଲକ୍ଷ ୨୬ ହଜାର। ପୂର୍ବରୁ ଏଠାରେ ୨୭୩ଟି ବୁଥ୍ କରାଯାଉଥିଲା। କିନ୍ତୁ କରୋନାକୁ ନଜରରେ ରଖି ଏଥର ପ୍ରତ୍ୟେକ ବୁଥ୍ରେ ଭୋଟର ସଂଖ୍ୟା ୧ ହଜାର ଭିତରେ ସୀମିତ ରଖାଯିବ। ପିପିଲିର ୭୭ଟି ବୁଥ୍ରେ ୧ ହଜାରରୁ ଅଧିକ ଭୋଟର ରହିଛନ୍ତି। ତେଣୁ ଆଗାମୀ ଦିନରେ ହେବାକୁ ଥିବା ଉପନିର୍ବାଚନ ପାଇଁ ଆଉ ୭୭ଟି ବୁଥ୍ କରାଯିବ। ଫଳରେ ମୋଟ ବୁଥ୍ ସଂଖ୍ୟା ୩୫୦ ହେବ। କିନ୍ତୁ କେବେ ଏଠାରେ ଉପନିର୍ବାଚନ ହେବ ସେ ନେଇ ବିଜ୍ଞପ୍ତି ପ୍ରକାଶ ପାଇନାହିଁ।
