ଜାକର୍ତ୍ତା,୧୧।୩: ଇଣ୍ଡୋନେସିଆରେ ତୀର୍ଥଯାତ୍ରୀଙ୍କୁ ନେଇ ଯାଉଥିବା ଏକ ବସ୍ ୨୦ ମିଟର ତଳକୁ ଖସି ପଡ଼ିଛି। ଏଥିରେ ୨୭ ଜଣଙ୍କ ମୃତ୍ୟୁ ଘଟିଛି। ଏଥିରେ ୩୯ ଲୋକ ଆହତ ହୋଇଛନ୍ତି। ଆହତଙ୍କୁ ଉଦ୍ଧାର କରି ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି। ପଶ୍ଚିମ ଜାଭାର ସୁବାଙ୍ଗ ସହରରୁ ଏମ ମାଧ୍ୟମିକ ସ୍କୁଲର ଶିକ୍ଷାର୍ଥୀ ଏବଂ ଅଭିଭାବକମାନେ ସ୍ଥାନୀୟ ତାସିକାମଳୟ ଜିଲାରେ ଥିବା ଏକ ଧାର୍ମିକସ୍ଥଳକୁ ଯାଉଥିଲେ ବୋଲି ପୋଲିସ ଅଧିକାରୀ ପ୍ରାସିତ୍ୟୋ ରୋବିୟାନ୍ତୋ ସୂଚନା ଦେଇଛନ୍ତି। ପାହାଡ଼ିଆ ରାସ୍ତାରେ ବସ୍ଟି ଯାଉଥିବାବେଳେ ଡ୍ରାଇଭର ଏହାକୁ ନିୟନ୍ତ୍ରଣ କରିପାରି ନ ଥିଲେ। ଫଳରେ ବସ୍ଟି ତଳକୁ ଖସି ପଡ଼ିଥିଲା। ଆହତଙ୍କ ମଧ୍ୟରୁ ୧୩ ଜଣଙ୍କ ଅବସ୍ଥା ଗୁରୁତର ଥିବା ସେ କହିଛନ୍ତି।
