ମାନିଲା,୧୧।୮: ବିଶ୍ୱର ପ୍ରଥମ କରୋନା ଭାଇରସ୍ ଭ୍ୟାକ୍ସିନର ପଞ୍ଜିକରଣ କରିଛି ରୁଷ। ଏନେଇ ମଙ୍ଗଳବାର ଭ୍ଲାଡିମିର ପୁଟିନ ସୂଚନା ଦେଇଛନ୍ତି। ସ୍ବାସ୍ଥ୍ୟ ମନ୍ତ୍ରଣାଳୟର ମଞ୍ଜୁରୀ ପରେ ଭ୍ଲାଡିମିର ପ୍ରଥମେ ନିଜ ଝିଅଙ୍କୁ ଏହି ଭ୍ୟାକ୍ସିନ ଦେଇଥିବା ଜଣାପଡ଼ିଛି। ଅନ୍ୟପଟେ ରୁଷର ଏହି ଭ୍ୟାକ୍ସିନ ଉପରେ ଫିଲିପାଇନ୍ସ ରାଷ୍ଟ୍ରପତି ରେଡ୍ରିଗୋ ଦୁତର୍ତେ ବିଶ୍ୱାସ ପ୍ରକଟ କରିଛନ୍ତି। କରୋନା ଭାଇରସ୍ ଭ୍ୟାକ୍ସିନ ତିଆରିରେ ରୁଷର ଉଦ୍ୟମକୁ ଫିଲିପାଇନ୍ସ ରାଷ୍ଟ୍ରପତି ପ୍ରଶଂସା କରିଛନ୍ତି। ଏଥିସହ ଏହି ପରୀକ୍ଷାରେ ସେ ସ୍ବେଚ୍ଛାକୃତ ଭାବେ ସାମିଲ ହେବାକୁ ଇଛା ପ୍ରକାଶ କରିଛନ୍ତି। କାରଣ ଏହି ଭ୍ୟାକ୍ସିନକୁ ନେଇ କୌଣସି ଲୋକଙ୍କ ମନରେ ଭୟ ସୃଷ୍ଟି ନ ହେଉ। କେବଳ ସେତିକି ନୁହେଁ ଭ୍ୟାକ୍ସିନ ପରୀକ୍ଷା, ଯୋଗଣ ଓ ଉତ୍ପାଦନରେ ଫିଲିପାଇନ୍ସ ରୁଷ ସହ କାର୍ଯ୍ୟ କରିବାକୁ ପ୍ରସ୍ତୁତ ଅଛି ବୋଲି ଦୁତର୍ତେ କହିଛନ୍ତି। ତେବେ ରୁଷ ତାଙ୍କ ଦେଶକୁ ମାଗଣାରେ ଭ୍ୟାକ୍ସିନ ଯୋଗାଇଦେବା ବୋଲି ଦୁତର୍ତେ ଆଶା ପ୍ରକାଶ କରିଛନ୍ତି। ସୂଚନାଯୋଗ୍ୟ, ଏସିଆ ଦେଶମାନଙ୍କରେ ସର୍ବାଧିକ କରୋନା ସଂକ୍ରମଣ ଥିବା ଦେଶ ମଧ୍ୟରେ ଫିଲିପାଇନ୍ସ ମଧ୍ୟ ସାମିଲ ରହିଛି। ଉକ୍ତ ଦେଶରେ କରୋନା ସଂକ୍ରମଣ ଦ୍ରୁତଗତିରେ ବୃଦ୍ଧି ପାଇବାରେ ଲାଗିଛି। ସୋମବାର ଉକ୍ତ ଦେଶରେ ଗୋଟିଏ ଦିନରେ ୬,୯୫୮ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି। ଏହାକୁ ମିଶାଇ ଦେଶରେ ମୋଟ କରୋନା ଆକ୍ରାନ୍ତ ସଂଖ୍ୟା ୧୩୬,୬୩୮ରେ ପହଞ୍ଚିଛି।
