ନୂଆଦିଲ୍ଲୀ,୧୫।୮: ପେଟ୍ରୋଲ-ଡିଜେଲ ଦରକୁ ନେଇ ଶନିବାର ଏକ ନୂଆ ଅପଡେଟ୍ ଆସିଛି। କେନ୍ଦ୍ର ସରକାର ପେଟ୍ରୋଲ ଏବଂ ଡିଜେଲ ସମେତ ପେଟ୍ରୋଲିୟମ୍ ରପ୍ତାନି ଉପରେ ଲାଗୁଥିବା ‘ୱିଣ୍ଡଫଲ୍ ଟ୍ୟାକ୍ସ’ (Windfall Tax) ରେ ହ୍ରାସ କରିଛନ୍ତି। ପେଟ୍ରୋଲ ରପ୍ତାନି ଉପରୁ ଶୁଳ୍କକୁ ସମ୍ପୂର୍ଣ୍ଣ ଭାବେ ଉଚ୍ଛେଦ କରାଯାଇଥିବା ବେଳେ, ଡିଜେଲ ଉପରେ ଲାଗୁଥିବା ଶୁଳ୍କକୁ ମଧ୍ୟ କମାଯାଇଛି। ଏହି ନୂଆ ଦର ୧୫ ଅଗଷ୍ଟ ୨୦୨୬ ରୁ ଲାଗୁ ହୋଇଛି। ଏବେ ବଡ଼ ପ୍ରଶ୍ନ ହେଉଛି, ୱିଣ୍ଡଫଲ୍ ଟ୍ୟାକ୍ସ କମିବା ପରେ ଆଜି ପେଟ୍ରୋଲ ଏବଂ ଡିଜେଲ ମଧ୍ୟ ଶସ୍ତା ହୋଇଛି କି? ତେବେ ଏହାର ସିଧାସଳଖ ଉତ୍ତର ହେଉଛି: ନା।
ୱିଣ୍ଡଫଲ୍ ଟ୍ୟାକ୍ସ କେତେ କମିଲା?
ସରକାର ପେଟ୍ରୋଲିୟମ ଦ୍ରବ୍ୟର ରପ୍ତାନି ଉପରେ ଲାଗୁଥିବା ଟ୍ୟାକ୍ସରେ ପରିବର୍ତ୍ତନ କରିଛନ୍ତି। ପେଟ୍ରୋଲ ରପ୍ତାନି ଉପରେ ଲାଗୁଥିବା ଶୁଳ୍କ ଲିଟର ପିଛା ୩.୫ ଟଙ୍କାରୁ କମାଯାଇ ଶୂନ୍ୟ (Zero) କରିଦିଆଯାଇଛି। ସେହିପରି ଡିଜେଲ ରପ୍ତାନି ଉପରେ ଲାଗୁଥିବା ଶୁଳ୍କ ୨୫.୫ ଟଙ୍କାରୁ କମାଯାଇ ଲିଟର ପିଛା ୨୪ ଟଙ୍କା କରାଯାଇଛି। ଏଟିଏଫ୍ (ATF – ବିମାନ ଇନ୍ଧନ) ଉପରେ ମଧ୍ୟ ରପ୍ତାନି ଶୁଳ୍କ କମାଯାଇ ଲିଟର ପିଛା ୧୯.୫ ଟଙ୍କା କରାଯାଇଛି।
ସିଧାସଳଖ ଫାଇଦା ମିଳିବ କି?
ୱିଣ୍ଡଫଲ୍ ଟ୍ୟାକ୍ସ ହ୍ରାସକୁ ଦେଖି ଲାଗିପାରେ ଯେ ପେଟ୍ରୋଲ ପମ୍ପରେ ପେଟ୍ରୋଲ ଏବଂ ଡିଜେଲ ଦର ମଧ୍ୟ କମିଯିବ। କିନ୍ତୁ ୱିଣ୍ଡଫଲ୍ ଟ୍ୟାକ୍ସ ଏବଂ ଘରୋଇ ଖୁଚୁରା ପେଟ୍ରୋଲ-ଡିଜେଲ ଦର ଏକା ଜିନିଷ ନୁହେଁ। ୱିଣ୍ଡଫଲ୍ ଟ୍ୟାକ୍ସ ବିଶେଷ କରି ପେଟ୍ରୋଲିୟମ୍ ରପ୍ତାନି ଉପରେ ଆଦାୟ କରାଯାଉଥିବା ଏକ ଶୁଳ୍କ।
ଆଜି ପେଟ୍ରୋଲ-ଡିଜେଲ ଦର କେତେ?
୧୫ ଅଗଷ୍ଟ ଦିନ ମଧ୍ୟ ଦରରେ କୌଣସି ପରିବର୍ତ୍ତନ ହୋଇନାହିଁ। ଆଜି ପେଟ୍ରୋଲ ଏବଂ ଡିଜେଲ ଦରରେ କୌଣସି ନୂଆ ପରିବର୍ତ୍ତନ ହୋଇନାହିଁ। ଦିଲ୍ଲୀରେ ପେଟ୍ରୋଲ ଲିଟର ପିଛା ୧୦୨.୧୨ ଟଙ୍କା ଏବଂ ଡିଜେଲ ୯୫.୨୦ ଟଙ୍କା ଆଖପାଖରେ ରହିଛି। ମୁମ୍ବାଇରେ ପେଟ୍ରୋଲ ୧୧୧.୨୧ ଟଙ୍କା ଏବଂ ଡିଜେଲ ଲିଟର ପିଛା ୯୭.୮୩ ଟଙ୍କା ରହିଛି। ପେଟ୍ରୋଲ ଉପରେ ସାଢ଼େ ୩ ଟଙ୍କା, ଡିଜେଲ ଉପରେ ୧.୫୦ ଟଙ୍କା କମିଲା ୱିଣ୍ଡଫଲ୍ ଟ୍ୟାକ୍ସ, ଅଧରାତିରେ ଘୋଷଣା
କେବେ ଶସ୍ତା ହେବ ପେଟ୍ରୋଲ-ଡିଜେଲ?
ପେଟ୍ରୋଲ-ଡିଜେଲର ଘରୋଇ ଦର ଅନେକ ଜିନିଷ ଉପରେ ନିର୍ଭର କରେ। ଏଥିରେ ଅନ୍ତର୍ଜାତୀୟ ଅଶୋଧିତ ତୈଳ (Crude Oil) ର ମୂଲ୍ୟ, ଟଙ୍କା ଏବଂ ଡଲାରର ବିନିମୟ ହାର, ରିଫାଇନିଂ ଖର୍ଚ୍ଚ ଏବଂ କେନ୍ଦ୍ର ଓ ରାଜ୍ୟ ସରକାରଙ୍କ ଟ୍ୟାକ୍ସ ସାମିଲ ଅଛି। ତେଣୁ କେବଳ ୱିଣ୍ଡଫଲ୍ ଟ୍ୟାକ୍ସ କମିବା ଦ୍ୱାରା ପେଟ୍ରୋଲ-ଡିଜେଲ ଦର ତୁରନ୍ତ କମିବା ଜରୁରୀ ନୁହେଁ।
